Mannan vahkus Ohcejogas lágiduvvui speallobargobádji, Sámi Game Jam. Speallobargobádji bisttii vihtta beaivve, ja doppe ledje mánát, nuorat ja ollesolbmot. Bargobájis oahpahedje Unity-prográmma vuođđoáššiid ja boahttevuođas háliidit ráhkadit spealu oalát sámegillii. Game Jamis buohkat plánejedje ja dahke iežaset spealuid. Spealut ledje hui máŋggabealagat.
Game Jam lei oassin Skins Workshops -prošeavttas, man bokte háliidit movttiidit eamiálbmogiid nuoraid dahkat spealuid ja muitalit máidnaseaset spealuid bokte. Skins bargobájiid lágida Aboriginal Territories in Cyberspace (AbTeC).
– Eamiálbmogiid ovddastus spealuin ii galgga beare leat duhtadahtti, muhto dat galgá lieđđut. Nu ahte eamiálbmogiid olbmot sáhttet muitalit máidnaseaset ja muitalusaset geahččanguovllusteaset, muitala AbTeC:ka veahkkebagadalli Nancy Townsend.
AbTeC lea doallan máŋggaid bargobájiid miehtá máilmmi, earret eará Hawaijas ja Ođđa Selánddas, muhto háliidit maid boahttevuođas boahtit vuot Sápmái.
– Dieđusge mátki lei guhkki ja divrras, muhto nu guhkká go gávdno mokta ja ruhtadeapmi, de háliidit gal áinnas boahtit ođđasit deike, muitala Townsend.
