Saaʹmi ouddoummuvaali võboršiiʹǩǩi piijjmõš lij ååʹn puuttâm. Ouddoummuvaalin lie taʹnni kueʹhtt võboršeeʹǩǩ.
Kuʹǩesäiggsaž ouddooumaž Veikko Feodoroff lij vaalin võboršeʹǩǩen ååʹn čiiččad vuâra. Feodoroff ij leämmaž vuõššân snäätnai, haaʹlad-a son äʹlǧǧed teänab võboršeʹǩǩen.
– Teä ku oummu vaʹldde õhttvuõđ, što feʹrttai juäʹtǩǩed da tõt lij õõlǥtemvuõtt, de tõn mâŋŋa leäi miâlggâd hiâlpp vueʹlǧǧed võl tän vuâra mieʹldd.
Feodoroff särnn, što suʹst jie leäkku ođđ vaalteeʹm taʹnnʼjaž vaalin.
– Seämma vuäʹmm teeʹm-han juätkkje õinn eeʹjjest nobba. Ǩiõl da kulttuur ooudâsviikkmõš da mäddââʹnnemääʹšš lie nåkam jõnn ääʹšš, kook jie ni kuäʹss puuđ. Täid feʹrttai pâi viikkâd ooudâs.
Aikio: ”Sääʹmkulttuur vuäǯǯai muu äʹlǧǧed võboršeʹǩǩen”
Ođđ võboršeʹǩǩen ouddoummuvaalin lij musikkneǩ da Skammkaart-festivaal jååʹđteei Aimo Aikio. Čeʹvetjääuʹrest da Heʹlssnest jälsteei Aikio haaʹlad tåimmad jeäʹrben sääʹmǩiõl da kulttuur ouʹdde.
– Ǩiõl vueʹǩǩ lij juʹn pueʹrab, leâša jõs veʹrddeet aanrõšǩiõʹlle, de lij võl jiânnai tuejjeemnalla.
Aikio lij mättõõllâm vuõrâsooumžen puärrsees jieʹnnǩiõlid, aanrõš- da sääʹmǩiõl. Kõrr vueʹsttvõboršeʹǩǩen Aikiooʹje lij Feodoroff, kååʹtt lij tåimmam saaʹmi ouddooumžen juʹn 18 eeʹjj ääiʹj.
– Ij tõt hääiʹt. Kâʹl-han tõt lij šiõǥǥ, što tõʹst lij nåkam ooumaž, kååʹtt lij leämmaž tåʹben ääiʹjben, tuâtt Aikio.
Saaʹmi ouddoummuvaal ââʹnet 8.10.2023 da vaalpuäđõõzz õlmmeet 9.10.2023 vaal-luʹvddkååʹdd såbbrest Čeʹvetjääuʹrest. Vaalrekisteera kuullmõõžž vuäitt taʹrǩsted vaal-luʹvddkååʹddest 29.9.2023 räjja.