Yle Sámi nuoraidkanála Sohkaršohkka lea dál almmustahttán erenomážit nuoramus jienasteddjiide oaivvilduvvon válgavideoráiddu.
Videoin leat oktiibuot 14 evttohasa ja videot šadde čieža. Videoid doaimmaheaddji Xia Torikka lea duđavaš dasa, ahte videoráidu beroštahtii sámediggeválgaevttohasaid.
– Sávvamis dát ráidu buktá evttohasaid persovnnaid oidnosii ja dan bokte buvttášii sin vehá lagabui daid 18–23-jahkásaš jienasteddjiid, lohká Torikka.
Sohkaršohka pubbagilvu -nammasaš ráiddus evttohasat dievasmahttet cealkagiid ja vástidit mii boahtá iešguđet sániin vuosttažin millii.
Cealkagat ja sánit gusket áigeguovdilis politihkalaš fáttáid dego ruoná sirdašumi, psykososiálalaš doarjaga fállama ja ruoššaluosa.
Daid lassin videoin čielgá maid earret eará makkár musihka sii liikojit guldalit go vulget sámefestii ja mii lea sidjiide red flag, nappo mat áššit ožžot sin oaivve sis alárpmaid čuodjat.
Videoráiddus leat mielde Pirita Näkkäläjärvi ja Inka Musta, Pentti Pieski ja Tuomas Aslak Juuso, Mari Gauriloff ja Tauno Ljetoff, Kari Guttorm ja Leena Niittyvuopio-Jämsä, Janne Hirvasvuopio ja Maarit Kiprianoff, Anu Avaskari ja Tinja Semenoff sihke Anni-Sofia Niittyvuopio ja Margareetta Suoninen.
Sohkaršohka pubbagilvu -ráidu lea oaidninláhkai Yle Areenas sámediggeválggaid 2023 evttohasvideoid vuolde.