Vuossaargâ Suáluičielgi kuávlust lâi ohtâ čoovčâ muččâdumosijn šooŋâin. Peivi paaštij, lâi liegâs já luándust ruške. Taat oinui meid ulmui meereest Sijduáiváá vandârdem pálgáin. Iiđeedpeeivi lâi jo parkkisaje tievvâm autoin, já koskâpeeivi äigin luoddâpiällást lâi jo paijeel kilomeetter kukkosâš autoráiđu. Ruške lii puáttám tavas.
Taan ohhoost aalgij ohtâ tuuriistkuávdái hoppuumus ohoin čohčuv. Tai ohoi ääigi láá joođoost iänááš puárásub ulmuuh, kiäh puátih ivveest ihán tavas ihástâllâđ luándu já ruške.
Ilpo Kokkila lii iällám Suáluičielgist 30 kerdid čohčuv nomâlâssân rušken. Kokkila áásá Jyväskyläst, mutâ sust lii kámppá Suáluičielgist. Veikkâ sun lii nyevt 150 kerdid iällám Suáluičielgist, te ain kávnojeh uđđâ ääših.
– Tast lii šoddâm tääpi. Kal siämmáá saajeest puáhtá eelliđ maŋgii-uv já ain puáhtá teivâđ uđđâ ulmuid, muštâl Kokkila.
Kokkila lii hokâttâllâm Suáluičiälgán fárusis meid Eija Kontusii Mikkelist. Kontunen lii lamaš rušken Suáluičielgist jo lovmat keerdi. Tääl suoi lává monâmin vandârdiđ uápis paihijd.
– Ruške muččâdvuotâ kiäsut, jis tot sáttoo leđe. Luámut tääbbin mun kale nuuvt muásum, rámmoo Kontunen
Nuorâb kerdi-uv poođij navdâšiđ Säämi luándust
Ruške ihástâllei juávhust láá kuittâg meid nuorâbeh, tego kuopioliih Katariina Korhonen já Tuomas Kosonen. Suoi lává moddii iällám Suáluičielgi kuávlust já mučis luándu puovtij tääl-uv sunnuu teehin.
– Mun lam šoddâm čohčuv já ruške lii muu iveäigi já lijkkuum taan iveääigi šooŋâst já luándust. Tanen vuolgijn teehin tääl, muštâl Korhonen.
Suáluičielgist puáhtá teivâđ meid ulmuid, kiäh iä lah ovdil iällám Suáluičielgist. Neelji ulmuu juávkku áigu kuárŋuđ Sijduáiváá oolâ. Teija Koivumäki, Matti Koivumäki, Päivikki Pekkarinen já Timo Pekkarinen láá meddâl Vantaast já Tamperest. Táválávt sij eelih Ylläsist, mutâ tääl mielâ toovâi uápásmuđ Suáluičiälgán.
Veikkâ juávkku lii viättám kuávlust eskin muáddi peeivi, te tääl jo oro, ete ij lah majemuš kerdi.
– Mist lii lamaš tuođâi suotâs leđe oovtâst, kuávlu já puoh. Te mij lep avžuuttâm mii párnáid puáttiđ teehin já toh láá-uv oholoppân puátimin, muštâl Matti Koivumäki.
Suáluičielgi kuávlust ij lah maailm muččâdumos ruške, mut mađhâšeijeeh láá aaibâs pyereest. Stuárráámus uási láá syemmiliih puárásub ulmuuh, kiäh vandârdah ennuv já keksejeh jieijah puđâldem, muštâl Suáluičielgi Lapponia Tours-irâttâsâst Anssi Väänänen.
Ylläs kuávlust oppeet eennâmruške puárrán peivi peeivist. Mađhâšeijeeh láá vittâ–love prooseent ucceeb ko maid sij lijjii vuárdám, suijân ulmui ruttâtile, osko Destination Lapland toimâjođetteijee Mauri Kuru Äkäslompolost. Sun lii meid huámmášâm, et lii ruške mađhâšeijein monâmin suhâpuolvâ molsom. Nuorah láá perustškuáttám meid ruškeääigist.
14.9.2023 tme 9:58 Tivvojum Sijduáiváá nommâ sämikielân