Sámeboazodoallit deaivvadedjege čakčamánu 9. beaivve Anáris Sajosis. Deaivvadeames ledje mielde sihke dábálaš boazodoallit ja bálgosiid njunnošat.
Sámi bálgosat -searvvi ságadoalli Tiina Sanila-Aikio dadjá, ahte deaivvadeapmi lei historjjálaš, go sii čohkkejedje nu ollu olbmuid boazodoalus ovtta sadjái.
– Dat čájeha, ahte sámeboazodoallu lea hui ealli ja dehálaš oassi sámekultuvrras. Dakkár sáhkavuorut ledje deaivvadeamis, ahte mii háliidit bargat sámeboazodoalu ovdii ovttas, muitala Sanila-Aikio.
Sámi bálgosiid ovttasbargu oaččui lasi leavttu Boazoparlameanttas
Suoma boazodoallu juohkásii mannán geasi guovtti sierra jovkui: sámeboazodolliide ja suopmelaš boazodolliide. Juohkáseapmi dáhpáhuvai geassit Boazoparlameantta oktavuođas, go stuorra oassi sámi bálgosiid ovddasteddjiin guđđe Bálgosiid ovttastusa čoahkkima, go sápmelaččaid ovddasteaddji dáhpii BO ságadoalli jienastusas.
Sámebálgosat eai virggálaččat earránan Bálgosiid ovttastusas, dasgo boazodoallolágas lea meroštallojuvvon, ahte bálgosat hábmejit ovttas Bálgosiid ovttastusa.
Dien dáhpáhusa maŋŋá sámi boazodoalu ovddasteaddjit namuhedjege, ahte sii háliidit ovddidit Suomas sámeboazodoalu ovtta jitnii. Sámebálgosiid ovddasteaddjit bukte maid ovdán, ahte sii áigot vuođđudit ovdduideaset vuodjimii sierra searvvi, mii ovddasta dušše beare sámeboazodoalu.
Maŋŋelis geassemánus Sámi bálgosat -searvvi ságadoalli muitalii, ahte sii bovdejit sápmelaš badjeolbmuid čoahkkái ságastit áigeguovdilis fáttáin ja vejolašvuođas vuođđudit iežas orgána, mii ovddasta sápmelaččaid.
Searvi fállá ságadoallis galledemiid bálgosiidda
Anára deaivvadeamis eai velá mearridan, galgetgo vuođđudit sierra organisašuvnna sámeboazodoalu ovddideapmái. Deaivvadeamis goittotge ságastalle das, ahte ovdamearkka dihte Sámi bálgosat -searvi lea jagi 2018 rájes bargan máŋggain áigeguovdilis fáttáiguin ja ovddidan áššiid boazodoalus.
Čuovvovaš lávki lea dieđihit sámeboazodoalus ja Sámi bálgosat -searvvis.
– Vuosttamužžan fálaimet lahttobálgosiidda ságadoalli muitalit searvvis ja áššiin bálgosiid čakča- dahje giđđačoahkkimiidda. Dakkáriidda sihkkarit geargat reageret juo dán čavčča, dadjá Sanila-Aikio.
– Mun jáhkán ahte čuovvovaš sulastahtti stuorra dilálašvuohta lea boahtte gease.