Gávpotguovlluid sápmelaččaide lea dehálaš gávdnat dakkár evttohasa Sámediggeválggain, gii muitá maid sin áššiid ja hástalusaid. Oululaš Mirka Kelahaara muittuha, ahte Suomas leat olu nu gohčoduvvon gávpotsápmelaččat.
– Miihan leat oalle olu ja lea vehá suddu, ahte mis ii leat iežaimet fásta mearri, ahte galle áirasa bohtet sámeguovllu olggobealde. Ferte hui dárkilit smiehttat, ahte gean jienasta.
Gávpotsápmelaččaid fuollan lea ovdamearkan sámegiela ja kultuvrra seailun, go ássá guhkkin guovddáš sámeguovlluid olggobealde.
Giella lea lahka váimmu
Jyväskylälaš Nea Porsanger-Rintala lea dábálaččat jienastan fuolkki, muhto dál smiehtada earáge evttohasaid.
– Munnje lea hirbmat dehálaš, ahte giella lea dehálaš maid dan evttohassii. Giella lea dakkár ášši, mii váikkuha sámeidentitehtii. Ja ferten dieđusge maid dovdat dan evttohasa.
Maiddái Inkeri Mansikka-ahoi sámevuohta ja sámegiella leat lahka váimmu, go lea máŋgalot jagi jo ássan eret sámeguovllus. Sutnje lea dehálaš diehtit, maid evttohas oaivvilda sámediggelágas ja sápmelašmeroštallamis.
– Dál lea nu olu hállojuvvon das ja dieđusge dat, ahte mat vuoigatvuođat sápmelaččaide galggašedje gullat dan ektui, ahte ásatgo davvin vai eará báikegottis.
Gulahallandáiddut leat dehálaččat
Oululaš Ida-Maria Helander lea jo gávdnan evttohasa, gean jienasta. Son válddii vuosttas bargun vuos sihkkut eret listtus daid evttohasaid, geat eai juoge seamma oaiviliid suinna. Loahpain son dasto válljii alccesš heivvolaš evttohasa.
– Munnje lea dehálaš, ahte evttohas lea áŋgirit muitalan iežas oaiviliid iešguđetlágan lávddiin ja máhttá gulahallat earáiguin.
Raahelaš Jussi Isokoski lea doaibman fitnodatdoallin jo guhká ja hálida muittuhit maid fitnodatdoaimma ovddideamis sápmelaččaid gaskkas.
– Mu mielas ealáhusdoaimma galgá ovddidit sámegiela ja kultuvrra vuođul iige dakkár globála jurddašeami vuođul. Evttohas ferte doarjut luonddu suodjaleami ja doaimmaid, maid esttadit dálkkádatrievdama.