Vaikke Lappi buresveadjinguovllus lea ulbmilin álggahit garra seastindoaimmaid, de Avvila dearvvašvuođaguovddážis eai leat fuolas gohcindivššu heaittiheamis.
Lappi buresveadjinguovllus áigot dás ovddos geahpedit goluid 45 miljovnna euro ovddas jahkásaččat. Dasa lassin leat earáge seastindoaimmat, maid geažil árvalit, ahte dán jagi bušeahta báhcá 58,9 miljovnna euro táhpaga beallái.
Dát seastindoaimmat bohtet oidnot Lappi guovllu dearvvašvuođaguovddážiin. Buresveadjinguovllu hoavda Jari Jokela ii leat vuos sihkkar, mo konkrehtalaččat sestet, muhto gohcindikšu boahtá goittot seailut Avvila dearvvašvuođaguovddážis.
Gohcindikšu lea álo doaibman Avvilis spiehkastatlobiin, man galgá sierra ohcat. Dál spiehkastatlohpi lea fámus 2024 lohppii. Avvila dearvvašvuođaguovddáža bajitdoavttir Outi Liisanantti muitala, ahte ulbmilin livččii oažžut dan ordnemii bissovaš lobi.
Turisma barggaha dearvvašvuođasuorggi
Avvila dearvvašvuođaguovddáš lea Suoma davimus báiki, gos gohcet ja fállet divššu birra jándora juohke beaivve. Dasa lassin ahte doppe dikšot báikkálaččaid, de sii fuolahit maiddái Ohcejoga ja Soađegili gielddaid gohcima. Dan lassin vel gohcindivššu dárbbašit turisttat.
–– Turisma barggaha hui olu dáppe davvin dearvvašvuođasuorggi. Dat lea hástalus olles Lappi buresveadjinguvlui, go ruhtadeamis ii leat dát váldojuvvon vuhtii, čilge Jari Jokela.
Eandalitge dálvesesoŋŋaáigge turisma vuhtto Avvila dearvvašvuođaguovddáža gohcindivššus. Olgoriikalaš turisttaide muohta ja njaláhas geainnut leat apmasat, nuba sii máŋgii bártidit ja lápmašuvvet.
Outi Liisanantti sávášiige eambo doarjaga ja resurssa gohcindikšui buot seastindoaimmain fuolakeahttá.
– Go lea sesoŋŋaáigi, de eará doaimmaid ovddideapmái ii báze áigi go gártat sirdit bargiid gohcindivššu beallái. Mis lea goittotge dat seamma bargoveahka barggus, de dakkár vuođđodikšunbarggut ja doavttiráiggit báikkálaččaide eai leat de nu olu fidnemis, muitala Liisanantti.
Jari Jokela oaidná buorrin goittotge dan, ahte turisttaid dikšuma meriin sáhttet ákkastallat dárbbu gohcindikšui Avvilis.
– Dieđus lea nuge, ahte go turisttat fitnet dearvvašvuođaguovddážiin, de dat dollet olles dan dearvvašvuođaguovddážiid fierpmádaga badjin. Dat lea máŋggabealát gažaldat, oaivvilda Jokela.
Seaŋgaossodaga báikkiin ja bargiid meriin ii sáhte seastit
Avvila dearvvašvuođaguovddáža bajitdoavttir Outi Liisanantti oaidná seastindoaimmaid buorrin ja dárbbašlažžan, muhto leat liikká áššit, maidda dat eai su mielas oaččo váikkuhit.
45 miljon euro seastin sáhttá dárkkuhit ovdamearkka dihte dearvvašvuođaguovddážiid rabasáiggiid oanedeami, seaŋgaossodagaid heaittiheami, spesiáladivššu bargojuogus soahpama ja juobe olles dearvvašvuođaguovddáža giddema.
Liisanantti ii leat Avvila dearvvašvuođaguovddážis moge erenomáš fuolas, muhto su mielas lea dehálaš, ahte seastindoaimmain mearridit ovttas singuin.
– Galhan dakkárat, main sáhttá seastit, gávdnojit ja lea leamašan positiiva, go mis leat jearran mo sáhtášeimmet seastit. Nu dat galgá leat, ahte dat eai fal doppe Roavvenjárggas mearrit, muhto baicca ovttas ságastallat das mo ja mas mii sáhttit seastit.
Seastindoaimmat vuhttojit jo Avvila dearvvašvuođaguovddážis ovdamearkka dihte seaŋgaossodagas. Dán áigge seaŋgaossodaga gohčodit akuhta- ja veajuidahttinossodahkan, muitala Liisanantti. Maiddái seaŋgabáikemeari leat geahpedan.
– Go mun dán dearvvašvuođaguovddážis álggahin 10 jagi áigi, seaŋgabáikkit ledje 37. Giđđat ledje vel 30 báikki, muhto dál dat leat 25. Das ii sáhte šat geahpedit, vai mii bastit dikšut daid turisttaidge, deattuha Liisanantti.
Nubbi ášši, mas ii su mielas sáhte seastit lea bargiid mearri. Avvila dearvvašvuođaguovddážis barget dál guhtta doaktára.
– Dan ii sáhte gal geahpedit, go datge ii leat doarvái. Mii leat iskkan jo máŋggaid jagiid lasihit doaktáriid meari, buresveadjinguovluge oaivvilda ahte dat lea menddo unnán. Áššit ovdánit nu njozet. Doavttirresurssaid ii oaččo geahpedit, ja divššáriid resurssa galgá lasihit, lohká Liisanantti.