Lappi oarje- ja gaskaosiin lea ievttá eahkeda ja ija áigge muohttán báikkuid valjis. Eanemus muohta lea odne iđđes mihtiduvvon Dálkedutkanlágádusa mihtidanbáikkis Gihttela Kenttärovas. Gaskavahko iđđes Gihttelis mihtiduvvui 24 sentte. Suoločielggis muohta lea odne mihtiduvon 21 sentte muohta ja Vuohčus 3 sentte.
Dálkedutkanlágádus nanne, ahte odne iđđes leatge mihtidan dán čavčča virggálaš vuosttasmuohttaga. Vuosttas muohta oaivvilda dan, ahte mihtidanbáikkis mihtiduvvo iđđes diibmu 9 unnimustá okta sente muohta.
Yle meteorologa Nina Karusto dadjá, ahte dán háve muhtii earenomáš olu nu daddjon vuosttasmuohtan.
Geassejuvllaiguin ii gánnet vuolgit dál johtolahkii, jus ii leat bággu
Ollu muohta lea dagahan váttisvuođaid johtolahkii ja eandalitge stuorát ja losit biillat leat bártidan. Sihke Giehtagierragis go maid Suoločielggis leat tráilarat darvánan geainnuid ala olu muohttaga geažil.
Máŋgga sajis geainnuid alde leamašan beanta várálaš dálvejuvllaid haga. Gohcci gádjunmeašttir Tuomas Korhonen Lappi gádjunlágádusas muittuhage, ahte dál ii gánnet vuolgit geassejuvllaiguin geainnu ala, jus ii leat aivve bággu.
Gihttela ja Giehtagierraga guovllus leat leamašan odne gaskabeaivve sulaid logenar plogabiilla jođus. Biillat leat plogen geainnuid juo ievttá eahkeda rájes Oarje-Lappis.
Muohtarádji johtá gaskabeaivve áigge Soađegili buohta, dan vuola bealde ii leat eanan vilggodan. Muđuige máŋggain sajiin davimus Sámis eanan lea ain čáhppadin. Dálkedutkanlágádusa mihttáriid mielde Ohcejogas ja Gilbbesjávrris ii leat vehášge muohta.
Muohta goit ii bisán vuos ja jáhkkimis dat suddáge oalle fárttain jođánit. Vahkkolohppii lea lohpiduvvon davimus Sápmái lagabui 15 gráda liekkas.