Boazodoallit ožžot dievas buhtadusmávssu jagi 2022 boraspirevahágiin. Ráđđehus mearridii áššis dán vahku bušeahttaráđđádallamiin.
Giđđat stáhta mávssii boazodolliide 74 proseantta spiriid dagahan boazovahágiin. Supmi lei oktiibuot 5,86 miljovnna euro. Dalle ii lean goit makkárge sihkarvuohta das, ahte máksojuvvogo loahppaoassi obanassiige.
Go ođđa ráđđehus čakčat almmustahtii dán jagi nuppi lassibušeahttaárvalusas, de diimmá spirebuhtadusaid loahppaoasi máksin ii lean merkejuvvon bušehttii. Bušeahttaráđđádallamiin ášši goit njuolggai ja boazodoallit ožžot vel badjelaš 2 miljovnna euro diimmá boraspirevahágiid ovddas ja vahágat buhtaduvvojit dievaslaččat.
Eana- ja meahccedoalloministtar Sari Essayah muitala, ahte ná leat doaibman maid ovddit jagiid, ahte loahppa ruhtadeami leat viežžan lassibušeahtas.
– Sáhtan dadjat, ahte ministeriija bealde leamašan maid politihkalaš dáhttu máksit dievas vahátmávssuid, dadjá Essayah.
Badjeolbmo mielas ruhtadeami galggašii sihkkarastit
Muotkeduoddara bálgosa várreboazoisit Keijo Pirttijärvi lea duđavaš, ahte badjeolbmot ožžot dievas buhtadusa diimmá spirevahágiin.
– Galhan dat lea vuogas gullat, ahte dat áigot máksit daid loahpaid eret. Leahan dat vehá imaš leamašan, ahte geardde nu olu daid beađuid dollet, de eai várre doarvái ruđa vahágiidda, oaivvilda Pirttijärvi.
Pirttijärvi mielas lea váivi, ahte boazodoallit šaddet vuordit buhtadusaid guhká, bidjat olu áiggi ráppiid ohcamii ja bensiidna maid gollá.
– Dat gal lea nu boaresáigásaš systema stáhta bealis, ahte dasa galggašii bidjat dan dihto meari ruđa. Ja sii dihtet juohke jagi, ahte beađut lassánit olles áigge, de galggašii doppe stáhta bealis loktet daid mearreruđaid. Iihan badjealmmái sáhte máksit daid stáhta vahágiid, maid stáhta spiret barget dáppe min ealáhusa siste, dadjá Keijo Pirttijärvi.
Ministeriijas jáhkket, ahte boazodoallit ožžot ruđaidis loahppa jagis
Jagis 2022 spiret dagahedje boazodollui vahágiid birrasiid 10 miljovnna euro ovddas. Eanemus bohccuid speajai geatkki. Eana- meahccedoalloministeriija mielde spirevahágat bohtet dás duohko ain lassánit.
Eana- ja meahccedoalloministeriija spesiálaáššedovdi Jussi Laanikari muitala, ahte diimmá miessevahátmávssut leat maid ain mávssekeahttá oktiibuot 2,1 miljovnna euro ovddas. Laanikari jáhkká, ahte badjeolbmot ja bálgosat ožžot ruđaidis loahppa jagis.
– Miessevahátbuhtadusat máksojuvvojit boazodolliide seammá áigge, go loahppaoassi diimmá spirebuhtadusain, dadjá Laanikari.
Váikko dál boazodoallit ožžotge dievasmávssu, de muhtin jagiid buhtadusat eai leat máksojuvvon ollásit. Jagiid 2017 ja 2018 stáhta šattai geahpedit buhtadusaid. Jagis 2019 fas sihkastuvvui Lex Halla eret, mii buhtadii vahágiid dakkár bálgosiidda, mat ledje gillán erenomáš stuorra boazovahágiin.
