Nuntii Latini, conspectus rerum septimanalis a Radiophonia Finnica Generali (Yle) divulgatus, Kalendas Septembribus hoc anno viginti quinque annos complebunt. Nuntiis redigendis intersunt etiam nunc programmatis auctores principales Reijo Pitkäranta et Tuomo Pekkanen. Nuntii Latini sunt ubique terrarum noti et omnium longinquissimus conspectus rerum, qui regulariter Latine redigitur.
Tietolaatikko
Adiutrix Nuntiorum Latinorum, studens doctoralis linguae Latinae Laura Nissin dicit:
”Nuntios Latinos facere iucundum est."
Eruditio antiquissima adhuc vivit
Conspectus rerum septimanalis ab docente Reijo Pitkäranta, professore emerito linguae Latinae Tuomo Pekkanen et lectrice linguae Latinae Virpi Seppälä-Pekkanen redigitur. Praeterea in redactione opus subsidiarium faciunt sex latinistae ambitiosi.
Reijo Pitkäranta narrat Latinam, linguam illam cosmopolitam, iam per plus viginti quinque saecula adhiberi et usum eiusdem linguae vivum usque ad initium saeculi vicesimi active cultum esse.
Adiutrix Nuntiorum Latinorum, studens doctoralis Laura Nissin admonet statum, quem lingua Anglica hodie, linguam Latinam in saeculo undevicesimo habuisse. “Lingua”, inquit, “in Nuntiis Latinis usurpata grammaticaliter exemplum optimorum scriptorum antiquorum sequitur”.
Pitkäranta meminit Finnos annis sexagesimis multo melius quam hodie Latine scivisse, Latinitatem nihilo minus etiam nunc magni momenti in rebus scientificis esse; linguam Italicam, Francogallicam, Hispanicam originem suam ex Latina trahere atque Anglicam partem vocabularii ex Latina derivavisse.
Auscultatores electrogrammatis litterisque redactores Nuntiorum Latinorum laudant. Quinque et viginti his annis epistulae ex omnibus terrarum orbis partibus acceptae sunt, inter alios ex ipso Pontifice Romano. Pitkäranta laetus commemorat encyclopaediam rerum classicarum nomine Der Neue Pauly ad Nuntios Latinos referre.
Cum lucerna studii incenditur
Nuntii Latini vim habent ad ipsas auctrices. Adiutrix Nuntiorum Latinorum, magistra universitaria ordinis theologorum Outi Kaltio sentit commotionem programmate effectam, cum aedibus radiophonicis appropinquat, et praecipue, cum lucerna studii tandem incenditur.
Laura Nissin fatetur se semper emissione ita permotam esse, ut paululum adrenalini in venis suis fluentem sentit. Dicit in orbe Latino internationali Nuntios Latinos notissimos esse et se nonnumquam ab hominibus ignotis ex voce radiophonica recognosci.
Virpi Seppälä-Pekkanen iam viginti tres annos apud Nuntios Latinos operata est. "Hominibus", inquit, "cordi est de rebus naturalibus arctois comperire, quae rarius nuntiis vulgaribus enarrantur. Exempli gratia nuntius de certamine scridatorio vigilia Sancti Iohannis acto praecipue conspicuus erat."
Lingua Latina aliquid speciale in vitam adducit
Aliqui lingua Latina utendo e ceteris distingui volunt. Seppälä-Pekkanen censet nostris temporibus punctiones Latinas et ipsos anulos sponsalicios inscriptionibus Latinis ornatos in more esse.
Pitkäranta aestimat inter alia sententiam ”ne desperaveris umquam” Latine redditam in favore populari esse. Pekkanen quidem commemorat sermonem Latinum gloriam sui generis habere, quippe qui praecipue in orbe academico in occasionibus sollemnibus recitetur.
Quae cum ita sint, anniversarium vicesimum quintum Nuntiarum Latinorum certe sollemnitatis est dignum, cum ipsa lingua ad caerimonias pertineat.
Programma mirissimum
Productor Nuntiorum Latinorum Mika Salomaa contentus est programmate auctoribusque eius:
”Programma nostrum", inquit, "mirissimum apparet, si cum aliis programmatis comparatur. Fortasse quaerat quispiam, quam ob rem Radiophonica Finnica Generalis programma emittat redditum lingua, quam tantum pauci in Finnia intellegant. Quisquis autem significationem Latinitatis deliberare coepit, sine dubio eam vitae cotidianae adesse cernit. Exempli gratia medici diagnoses Latine dant et ipsae relationes clinicae expressionibus Latinis admixtis componuntur. Praeterea sunt nomina scientifica plantarum animaliumque ex lingua Latina derivata."
"Programma extra fines Finniae acceptum Radiophoniam Finnicam Generalem in omnibus terrarum partibus pervulgat. Auscultatores redactioni electrogrammata mittunt: alii gratias agunt pro materia institutoria eximii generis, alii auxilium petunt, si aliquem neologismum non intellexerunt."
"Gaudeo operari cum hominibus, qui linguam Latinam tanta pietate colunt. Assevero, si fas est, conspectus semptimanales adeo accurate componi, ut ne unum quidem iota in iis perperam sit.”
Audi per radiophoniam et interrete
Nuntii Latini anniversarium quintum vicesimum celebrant emissione festiva, quae die Veneris 29.8. hora 18.15 per Yle Radio 1 audietur. Textus nuntiorum atque glossarium programmatis in interreti eduntur (http://www.yle.fi/nuntii).
Collegit:
Sanna Sutela
Latine reddidit:
Antti Ijäs
