Sara Wesslin
Yle
Eeʹjjest 1981 vaʹlljeeš ođđ ouddooumaž. Matti Sverloff tuåimi tõn räjja ouddooumžen eeʹjjest 1968.
Eeʹttǩeejin ouddooumžen leʹjje eeʹjjest 1981 Matti Sverloff Âʹvvlest, Jaakko Afanasjeff Keväjääuʹrest, Jouni Moshnikoff Čeʹvetjääuʹrest, Sergei K. P. Fofonoff Jorbbâljääuʹrest.
Tän vueʹzzest kuulât ouddoummuvaaʹli eeʹttǩǩeei Sergei Kp. Fofonooff da Jaakko Afanasjeeff mainstâʹttmõõžž, mõõk leʹjje tuåimteei Elli Rantala vuõlttõõzzâst mieʹldd 2. skamm-mannu 1981.
Looǥǥ vuõssmõs vueʹss täʹst: Siidsåbbar da ouddoummi histoor vueʹss 1 - Matti Sverloff da Jouni Moshnikoff eeʹttǩeeʹjen ouddooumžen
Nuõrttsäʹmmlai eeʹttǩeei vuäinlmõõžž ouddoummu veeʹrjest: Jaakko Afanasjeff
Jaakko Afanasjeff lij kueʹllteknikk Âʹvveel Keväjääuʹrest. Son lij 42-ekksaž piârlaž säʹmmlaž da son lij šõddâm Peäccmest paaččjooǥǥ siidâst. Suu kõʹčče njeäʹllemneeʹǩǩ sääʹmouddoummu eeʹttǩeeʹjen.
Son smiõtti vuõššân mäʹhtt son ǩiõrggan, pâstt-a, haalad-a son tän tuõjju, lopp looppâst son lij jiijjâs heärr, kâʹl son ǩiõrggan da haaʹlad tän tuõjju da tueʹjjad siidsåbbri aaʹššid da veekk ooudâs tõid nuʹtt puârast ǥu pâi silttad, säärni Afanasjeff
Son lij jälstam Lääʹddjânnmest 20 eeʹjj da lij leämmaž 20 eeʹjj oummi vuäʹpstem tuejast da âânn ååʹn da puõttiääiʹjest jeeʹres škooultõõzzid ouddm. jäuʹrrkueʹllšeeʹllemkuursid Čeʹvetjääuʹrest, ʹvvlest, Aanrest, Njeäʹllmest, son vuäitt seämma poodd oummid mainstâʹtted mâiʹd sij haaʹlee sääʹmouddoummu håiddam sääʹmaaʹššin, son vuäʹppast še oummid tâʹl ǥu son lij pääiʹǩ âʹlnn. Suu miõlâst ouddooumaž vuäitt leeʹd jiõčč piisren, sååbbar vaalaš saaǥǥjååʹđteei såbbrest.
Afanasjeff haaʹlad mošttʼted tõn, što nuõrid, siʹjjid âlgg tuejjeed jââđjaž, ij-ka mušttled jååutjõõžž.
Säʹmmlain âlgg nuʹtt čiõʹlǧǧeed måtam aaʹššid ouddooumže ǥu son veekk aaʹššid ooudâs, što tâʹl ǥu mij haaʹleep, mij jiõnn kollai kookkas, tâʹl tõk pueʹrben vääʹldet lokku, nääiʹt säärni Afanasjeff.
Nuõrttsäʹmmlai eeʹttǩeei vuäinlmõõžž ouddoummu veeʹrjest: Sergei K. P. Fofonoff
Sergei K. P. Fofonoff sääʹmouddoummu eeʹttǩeei Jorbbâljääuʹrest da lij 42-ekksaž äʹhššooumaž, son lij piârlaž nuõrttsäʹmmlaž, sijddneeʹǩǩ haaʹlee suu ouddooumžen aaʹšši ooudâsviikkâm diõtt.
Fofonoff lij leämmaž väärrouddooumžen, sääʹmsiidsååbbar tuåimmkååʹddest, sääʹmouddoummu eʹtǩǩeejen õõut vuâra, Aanar pââibužškooul škooulsuåvtõõzzâst, Čeʹvetjääuʹr siidtuåimmkååʹdd såbbrest kueiʹt vuâra, Aanar kååʹdd luʹvddkååʹddest.
Ooudâsviikkâmjuâǥǥtõõzzâst vuäitt smiõttâd jiijjâs siid oouʹdeem. Suu miõlâst tuejid õõlǥči vuäǯǯad siidid, što nuõr kuâđđjeʹče jälsted ođđ põõrtid di tõn diõtt še õõlǥči juäʹtǩǩed sääʹmtääli ooccâmääiʹj, što sääʹmjieʹllem jååʹđči nääiʹt ooudårra.
Sijddtuåimmkåʹdd õõlǥči aaʹššid eʹtǩǩeed da eman čuäʹjtõsliʹstte siidsåbbra ääʹšš. Õhttsaž piisar leʹčče šiõǥǥ päʹlǩǩeed kuhttu siʹjdde tâʹl ouddooumaž leʹčče pâi saaǥǥjååʹđteeʹjen.
Sääʹmääʹšš äʹlǧǧe viikkâd ooudâs sääʹmäʹššen ǥu mij leäʹp uuʹccbõs joukk da tõʹnt säʹmmlaž âlgg leeʹd ouddooumaž, nääiʹt Fofonoff vuäinn tän ääʹšš.
Siidsååbbar mõõnat miârktõõzz, jõs oummu jiâ jååʹđ såbbrin, smeâtt Fofonoff
Teâđast nuõrid õõlǥči vuäǯǯad jäänab siidsåbbrin jååʹtted ǥu pueʹttiäiʹǧǧ še lij siʹjjid, de puärrsab oummu ääiʹj jååʹđeen jiâ vueiʹt pâi jååʹtted såbbrin. Määŋgtuåimmpõrtt še lij ååʹn Čeʹvetjääuʹrest, toʹb vuäitči noorõõttâd håʹt frijjääiʹj siõrin di ouddooumaž še vuäitči jieʹlled nuõrivuiʹm toʹb mainsteʹmen, måkam liâ tuäiv seeʹst uʹvdded ouddooumže da täʹst leʹjje pââimõsân Fofonoff juurd ouddoummu veeʹrjest.
Ǩeeʹrjteei Hilkka Fofonoff. Jieʹlli Arkiivast kuulât vuäʹmm saaǥǥ ouddoummuvaaʹlin eeʹjjest 1981. Jieʹlli Arkiiv pohtt kolmm vueʹssest vaalsaaǥǥid täin neäʹttlin. Eeʹjj 2017 ouddoummuvaal ââʹnet 8 peeiʹv skamm-mannu da võʹboršeʹǩǩpiijjmõš lij påʹrǧǧmannust.
