Sara Wesslin
Yle
Čeʹvetjääuʹrest da Njeäʹllmest vaalše ođđ sääʹmouddoummu di nääiʹt piâzzi Matti Sverloff eʹpet kooum eeʹjjes ouddooumžen.
Nääiʹt eeʹttǩeei vuåǯǯu jiõnid kuhttu siidâst:
Matti Sverloff jiõn Njeäʹllmest 56 da Čeʹvetjääuʹrest 80 di õhttseʹžže 136 jiõnnâd.
Nuʹbben jäänmõsân vuåǯǯi jiõnid Jaakko Afanasjeff: Njeäʹllmest 42 da Čeʹvetjääurest 27 di õhttseʹžže 69 jiõnnâd.
Jouni Moshnikoff jiõn Njeäʹllmest 7 da Čeʹvetjääurest 8 da õhttseʹžže 15 jiõnnâd da uuʹccmõsân vuäǯǯi jiõnid Sergei K.P. Fofonoff, Njeäʹllmest ij ni õõut da Čeʹvetjääuʹrest 7 jiõnnâd.
Nellj jiõn jiâ ǩeʹlbbjam Čeʹvetjääuʹrest, ǥu leäi pâi ǩeeʹrjtum vuõssmõs bukva ij-ka obbâznõmm.
Sverloff lij leämmaž ouddooumžen 12 eeʹjj da ååʹn jueʹtǩǩi õõut pââʹj eʹpet. Son lij še leämmaž saaʹmi võboršeʹǩǩen nuuʹbblåkka eeʹjj saaʹmi ouddooumaž Jaakko Sverloff poodd.
De ouʹddel täi vaal õʹnne võl 1979 Čeʹvetjääuʹrest vuõššân jiõnstummuž da kueiʹt neäʹttel ǩeeʹjjest eman Njeäʹllmest, leâša täin vaaʹlin leʹjje seämma peeiʹv jiõnstummuž kuhttu siidâst da teʹlfon leäi jiõnstemsåbbrin veäʹǩǩneävvan.
Ođđ ouddooumaž Matti Sverloff leäi kuullâm še måkam aaʹšši mieʹldd suu vaʹlljeeš eʹpet ouddooumžen, da sij liâ ouddam nåkam ååsk muʹnne mii âlgg leeʹd. Son leäi jorddam kueʹđđed ouddoummu tuej, leâša Njeäʹllemneeʹǩǩ rauʹǩǩe što suʹst õõlǥči võl juäʹtǩǩed da son aaʹlji eeʹttǩeejen Njeäʹllem beäʹlnn.
Oummu mainste ouʹddel vaal nääiʹt måkam âlgg leeʹd ouddooumaž da måkam liâ suu vääžnʼjummus tueʹj da ǩii vuäitt jiõnsted jõs iʹllak säʹmmlaž:
Mikko Feodoroff särrni, što vaʹlljuum ouddoummust feʹrttjeʹče vääžnai sääʹmaaʹššid håiddad da âlgg siltteed viikkâd ooudâs da puʹhtted ouʹdde še aaʹššid da čiõʹlǧǧeed tõid veʹrǧǧoummid, nuʹtt što toʹb teâđče måkam ääʹšš meeʹst liâ pââimõsân, kâʹl siidsåbbrin lij veʹrǧǧ, tõnnalla ääʹšš ouddne.
Feodoroff miõlâst nuõr jiâ tuõstt pueʹtted såbbrid ǥu pâʹlle vaʹlljum koon-ne hoʹmme vueʹjjad nåkam aaʹššid, koid sij jiâ silttâd håiddad da sij luõʹttje puärsab oummid čuuʹt jiânnai, što ääʹšš ouddne sij mieʹldd pueʹrben, leâša tõt kâʹl iʹllak šiõǥǥ äʹšš, seeʹst feʹrttjeʹče leeʹd sååbbrin kuuitaǥ mieʹldd sij jiiʹjjes aaʹššin, mâiʹd sij haaʹlee.
Ouddooumaž âlgg leeʹd juõʹǩǩka nuõrttsäʹmmla miõlâst nuõrttsäʹmmlaž, da leʹčče še šiõǥǥ ǥu ouddooumaž teâtt juʹn aaʹššid mäʹhtt tõk aʹlǧǧe håiddad ǥu ođđ oummust âlgg kuuitâǥ harjtõõllâd vuõššân ođđ vergga.
Näittlõõttâm kaallâž vuäǯǯ jiõnsted jõs kuäbbaž-ne lij säʹmmlaž.
Ǩeeʹrjteei Hilkka Fofonoff.
