Ásllat-Ánde Länsman muitala makkár lei su mánnávuohta Čálkkuid báikkis Buolbmatjávrris. Su mánnávuhtii gulle ládju, boazobarggut, guollebivdu ja eará barggut áigáiboađu ovdii.
Ovccijahkásažžan son bártidii bohccuid luhtte, gessui hearggi maŋis ja gárttai Čáhcesullui buohccevissui. Skuvlla son váccii vuos oanehassii Alavieskas ja de johtti skuvlla Njuorggámis.
Son muitala mo hárjehalai rehketdoalu luhtegiid lohkamin. Gumppiid geažil gillái su skuvlavázzin go galggai leat jámma ealloravddas. Máŋgii de gárttai ijaid gohcit.
Gárvvut ledje buorit, niestige lei dábálaččat doarvái. Ollu son lea idjadan rievssatbivdiid gođiin. Váni áiggiidge lea gillán, muhto ii muitte gollon gal meahcis.
Son vásihii vaikko makkár fearániid ovttas ránnjáiguin. Okta buorre máinnasteaddji lei gul Jávrri-Ánne guhte govvidii čehpet dološ áigge luossabivddu Badje-Buolbmátjogas.
Ollugat ovttas lávejedje čoahkkanit didde- ja reaskabivddu áigge johkagáttiide, dat lei juo márkan dat bivdu. Guollehivvodaga čoallun ovttas mearkkašii máinnastaddama ja eará hervvoštallama.
Čálkko-Pier Ásllat-Ánde riegádii 23.4.1937 ja son jámii 3.1.2005. Dát muitalus lea báddejuvvon borgemánus 1993. Doaimmaheaddjin lea Jávrri-Juhán Niillas, Niilo Aikio.
