Peđar-Ánne, Anna Niittyvuopio, ovddeš Guttorm, iežas sogas Varsi lei Sámi radio Geasseguossi-sáddagis 4.7.1995. Anna Pedarsdatter Varsi riegádii Sirpmás Deanu gielddas jagi 1931.
Su eallinbálggis doalvvui Deanu bajás vuos Báđošii gosa son náitalii, bázii leaskan ja náitalii ođđasit ja bázii nuppádassii leaskan. Vel rávesolmmošin son jođii ain bajás ja náitalii Anárjoga Gáregasnjárgii.
Nuorrahan gal lea olmmoš nu guhká go lea dearvvas.
Eallin lea garra gieđain oahpahan su birget iige son duššiin heađástuva, ii heađástuvvan dallege go gárttai áibbas okto riegádahttit máná áitái.
Gažaldahkii mo leat birgen eallimis, vástádus lea čielggas.
Maid dal de leš dal ožžon dal daid attáldagaid, ii dat dal leat nu hirbmat áktánas.
Go Inger-Mari Aikio báddii dán ságastallama jagis 1995 de lei muitaleaddji 63-jahkásaš.
Dán Ealli arkiiva -prográmma loahpas Peđar-Ánne juoigá Vuovdaguoikka boaresbártniid. Juoiggus gávdno Sámi radio báddevuorkkás ja lea báddejuvvon jagis 1978.