Sáhkabihtážat: SSN bovden ON:a spesiálaraporterejeaddji Supmii, Jovsset Ánde Sara duopmu váidojuvvo ON:ai

Dás leat duorastaga sáhkabihtážat

SSN ja nuoraidráđđi New Yorkas
Guldal dás duorastaga Yle Ođđasiid Sámis. Govas Suoma Sámi Nuorat ja Sámedikki nuoraidráđđi leat New Yorkas.

SSN bovden ON:a spesiálaraporterejeaddji Supmii

Sámedikki nuoraidráđđi ja Suoma Sámi Nuorat –searvi leat váldán ovdan sámiid eamiálbmotrivttiid ON:a bissovaš forumas. Sii leat bivdán eamiálbmotrivttiid spesiálaraporterejeaddji Victoria Tauli-Corpuza čielggadit Suoma stáhta rihkkumušaid eamiálbmotrivttiid vuostá.

Nuorat čalmmustahtte ovttamielalaččat jiekŋameara ruovdegeidnofidno, ja muitaledje fidnu vejolaš váikkuhusain sámeguovllu lundui. Sii leat maid fuolas das, mo fidnu váikkuha sámenuoraid vejolašvuođaide eallit árbevirolaš ealáhusain dego boazodoaluin.

Jovsset Ánde Sara duopmu váidojuvvo ON:ai

Guovdageaidnulaš boazodoalli Jovsset Ánde Sara duopmu váido ON:ai, muitala NRK Sápmi. (siirryt toiseen palveluun)Advokáhta Trond Biti lea Sámedikkis ohcan ruhtadoarjaga jorgalit iežas áššehasa Jovsset Ánte Sara duomuid ja mildosiid eaŋgalsgillii.

Jovsset Ánde Sara vuoittáhalai Alimusrievttis ja šaddá njuovvat ealus 75 heggii. Duopmu váidojuvvo ON:a Olmmošvuoigatvuođa lávdegoddái ja buot báhpárat fertejit leat eaŋgalsgillii.

Buot álggii njukčamánus 2014, go Norgga eanadoallo- ja biebmodepartemeanta mearridii, ahte Jovsset Ánte Sara galgá geahpedit boazologus 75 bohccui. Sara áššáskuhtii Norgga stáhta ja vuittii ášši Sis-Finnmárkku diggegottis, mii gávnnahii, ahte Norgga stáhta mearrádus geahpedit Sara boazologu 75 bohccui rihkku olmmošvuoigatvuođaid ja Sara vuoigatvuođa iežas gillii ja kultuvrii. Stáhta goit doalvvui ášši alimus riektái. Mannán juovlamánus Sara vuoittáhalai Norgga stáhtii alimus rievttis.

SOG oahppit birgejedje bures Arctic Skills -gilvvuin

Sámi oahpahusguovddáža oahppit Marianne Ketola ja Emilia Lahtinen leaba birgen bures Arctic -skills gilvvuin Durdnosis. Marianne Ketola vuittii golli boazodoalus ja Emilia Lahtinen silbba duojis.

Arctic skills (siirryt toiseen palveluun) -gilvvuin Barents-guovllu ámmátskuvlla oahppit gilvalit 14 iešguđet suorggis. Dán jagi mielde ledje ámmátskuvlaoahppit Norggas, Ruoŧas, Ruoššas, Suomas ja Sámis.

Sámegielat girjjálašvuođa dálá dilis ságastallet duorastaga Roavvenjárggas

Duorastaga lágiduvvo Roavenjárgga váldogirjerádjosis seminára (siirryt toiseen palveluun), man fáddán lea sámegielat girjjálašvuođa dálá dilli. Semináras ovdanbuktojuvvo varas čielggadeapmi sámi girjjálašvuođa dilis davviriikkain. Čielggadeapmi gieđahallá ovcciin sámegielain ráhkaduvvon dáidaga vejolašvuođaid ja hástalusaid. Čielggadeami lea dahkan professor Johanna Domokos ovttas sámi áššedovdiiguin, čielggasdeapmái leat addán dieđuid maiddái sámi girječállit, jorgaleaddjit, goasttideaddjit ja doaimmaheaddjit.

Semináras lea vejolaš gullat girječálliid sáhkavuoruid ja maiddái ságastallan sámi girjjálašvuođas lea guovddážis. Čielggadeami ja seminára vuođul lea ulbmil evttohit doaibmabijuid davviriikalaš organisašuvnnaide, mo sámegielat girjjálašvuođa sáhtašii ovddidit. Čielggadeapmi ja seminára leat oassin Pohjola 2020 -fidnu.

Musealogiija 22. seminára álgá – fáddan eamiálbmogiid kulturárbi ja dan čájeheapmi museain

Odne Jyväskyläs álgá 22. riikkaviidosaš musealogiija seminára. Seminára temán lea eamiálbmogiid kulturárbi ja dan čájeheapmi museain. Seminára ulbmilin lea boktit ságastallama temáin ja čuolmmain, mat čatnasit eamiálbmogiid kulturárbái.

Dán jagaš seminára sáhkavuorut laktásit earret eará eamiálbmogiid dieđu buvttadeami doarjumii ja kulturárbbi vurkemii, sámiid ja musea oktavuhtii ja sámečoakkáldagaid máhcaheapmái.

Ođđasamosat