Ávvira lohkkit jienastedje jagi sápmelažžan dáruiduhttima vásihan 96-jahkásaš Agnete Lorås

Agnete Lorås oaččui measta beali buot jienain Ávvira Dán jagáš sápmelaš -jienasteamis.

Agnete Lorås čiegai sápmelašvuođas 70 jagi. Dál son lea jienastuvvon jagi sápmelažžan. Govva: Maret Biret Sara Oskal / NRK

Agnete Lorås lea jienastuvvon jagi 2018 sápmelažžan Ávvir-aviissa gilvvus.

Čakčat 2018 NRK Sápmi (siirryt toiseen palveluun)muitalii 96-jahkásaš Agnete Lorås vásáhusaid dáruiduhttimis. Lorås lei 70 jagi čiehkán iežas sámi identitehta, ovdal go muitalii iežas bearrašii duohtavuođa.

Agnete Lorås bajásšattai mearrasámi gilážis, Jiernáknjárggas dahjege Kvalsundis Finnmárkkus. Skuvllas son vásihii, ahte lea heahpat leat sápmelaš. Sámegillii ii ožžon hállat ráŋggáštusa haga.

Jagi 1944, 22-jahkásaš Lorås gárttai vuolgit máttás eváhkkui. Dan maŋŋá son lea lohkan iežas leat dáža.

NRK Sámi muitalus Agnete Lorås vásáhusain olahii olbmuid viidát ja son šattaige nu gohčoduvvon dáruiduhttima ámadadjun. Gaskavahku 3.1.2019 sutnje geigejuvvui Dán jagáš sápmelaš -bálkkašupmi.

– Orru jáhkkemeahttun, go mun, gii lean jávohaga čiegadan iežan sámi identitehta 70 jagi, beasan vásihit dán gudni oažžut "dán jagáš sápmelaš" -bálkkašumi, dadjá Agnete Lorås Ávvirii (siirryt toiseen palveluun).

Čielga vuoiti

Agnete Lorås oaččui Ávvira Dán jagáš sápmelaš -jienasteamis measta beali buot jienain, 48 proseantta.

Nubbin eanemus jienaid, 18 proseantta, oaččui kárášjohkalaš čáhcecrossvuoddji Joachim Olsen ja goalmmádin eanemus jienaid, 8,7 proseantta, oaččui lávlu ja dán jagi Stjernekamp vuoiti Ella Marie Hætta Isaksen.

Dát lea njealját geardi go Ávvira Dán jagáš sápmelaš -jienasteapmi lágiduvvui. Jagi 2015 sápmelažžan válljejuvvui Jon Henrik Fjällgren, jagi 2016 Marion Anne Knutsen ja jagi 2017 Jovsset Ánte Sara.

Ođđasamosat