Njuike sisdoaluide

Lappi gearretriekti lea hilgon buot áššáskuhttimiid Deanu lobihis bivdoáššis

Gearretrievtti mielde guolástanláhka ráddjii beare olu sápmelaččaid rievtti iežas kultuvrii, masa guolásteapmi gullá nannosit.

Mokta lei badjin Ohcejoga váldostivrra sáles 6.3.2019 go Lappi gearretrievtti duopmu celkojuvvui. Govas áššáskuhtton bivdit Esko Aikio, Heidi Eriksen, Kati Eriksen ja Anne Nuorgam. Govva: Vesa Toppari / Yle

Deanu lobihis bivddus áššáskuhtton guollebivdiid sivahusat hilgojuvvojedje odne Lappi gearretrievttis.

Gearretrievtti mielde sápmelaččain lea riekti iežas kultuvrii jo vuođđolágas ja dasa gullá nannosit guolásteapmi Deanu oalgejogain Veahčajogas ja Ohcejogas. Lappi gearretrievtti mielde moadde jagi dassái rievdaduvvon guolástanlága 10 paragráfa ráddjehusat rihkkot olmmošriektesoahpamušaid, maidda Suopma lea čatnasan ja mat dorvvastit sápmelaččaid rievtti álgoálbmogin doalahit iežas kultuvrra.

Lobihis bivddus ledje áššáskuhtton ohcejohkalaččat Anne Nuorgam, Heidi Eriksen ja Kati Eriksen bártniinis Erke Erikseniin. Sii oggo suoidnemánu loahpas 2017 Meahciráđđehusa stággobivdolobi haga iežaset ruoktojogas, Veahčajogas, nu gohčoduvvon stáhta čáziin ja almmuhedje iežaset bolesii. Ohcejohkalaš Luobbal-Jovsset Esko, Esko Aikio fas lei áššáskuhtton guolástusrihkkumušas. Aikio suohpui borgemánu 8. beaivve 2017 Ohcejoga Guhkesluobbala bajágeahčái luossafierpmi, vaikko daiguin lea lohpi bivdit dušše 31.7. rádjai. Maiddái Aikio almmuhii ieš sáimmas bolesii ja dagai rihkusalmmuhusa.

Gearretriekti: " Guolásteapmi gullá nannosit sámi kultuvrii"

Lappi gearretriekti hilggui buot áššáskuhttimiid mat ledje Veahčajoga bivdiid vuostá. Gearretriekti oinnii, ahte guolástanláhka ráddje sápmelaččaid rievtti guolástit iežas ruovttujogas Veahčajogas. Áššáskuhtton guollebivdit eai leat rihkkon lága, muhto sis leamašan riekti guolástit jogas, cealká gearretriekti. Gearretrievtti mielde lea čájehuvvon, ahte guolásteapmi gullá áššáskuhtton sápmelaččaid soga árbevieruide Veahčajogas. Maiddái dat čájehuvvui, ahte Veahčajoga luossanáli gođđudilli lea stáđis.

Lappi gearretriekti hilggui buot njealji Veahčajogas bivdán olbmo sivahusaid lobihis guollebivddus.

Veahčajoga bivdit Anne Nuorgam, Heidi Eriksen ja Kati Eriksen illudedje gearretrievtti duomus. Govva: Vesa Toppari / Yle

Gearretriekti hilggui maiddái áššáskuhttima Ohcejogas luossafirpmiin ráfáidahttin áigge bivdán Esko Aikio vuostá. Lappi gearretrievtti mielde stáhtaráđi ásahus oanidii luossabivddu Ohcejogas borgemánus ja ráddjii sápmelaččaid árbevirolaš fierpmebivddu, mii fas lea vuođđolága 17 paragráfa vuostá. Gearretriekti cealká, ahte Ohcejogas ii leat dárbu bivdoráddjehusaide borgemánus.

Lappi gearretrievtti mielde ásahus loavkašuhttá Suoma vuođđolága lassin maiddái sápmelaččaid rivttiid álgoálbmogin dorvvasteaddji olmmošriektesoahpamušaid.

Lappi gearretriekti geatnegahttá stáhta máksit áššáskuhtton ohcejohkalaččaid riektegoluid oktiibuot 9 531,65 euro ovddas. Duomus ii leat vel lága fápmu.