Njuike sisdoaluide

Eanan- ja meahccedoalloministeriija ásaheamin bargojoavkku guorahallat boazodoalu boahttevuođa

Ministeriija viggá čohkket bargojoavkku juo ođđajagimánu áigge.

Tapani Sirviö muitala, ahte bargojoavkku háliidit čoahkkái nu jođánit go vejolaš. Govva: Vesa Toppari / Yle

Go alimus boazologuid guorahalli bargojoavku gearggai bargguinis boazologuiguin, sii mearridedje ásahit nu gohčoduvvon boazodoalu boahttevuođa bargojoavkku. Dalle mearridedje, ahte alimus boazologut bissot seammaláganin, muhto juohke bálggus galgá dahkat guohtumiid dikšun- ja geavahanplána.

Bargojoavkku ulbmilin lea válbmet dál doaibmanmálle guohtumiid dikšun- ja geavahanplánaide bálgosiidda, nu ahte Lappi ealáhus-, johtolat-, ja birasguovddáš sáhttá daid de dohkkehit, muitala eanan- ja meahccedoalloministeriija ráđđádalli virgeolmmoš Tapani Sirviö.

Sirviö čilge, ahte bargojoavkku lahtut sáhttet maiddái váikkuhit dasa, maid sii bohtet gieđahallat.

– Lahtuid nammadeami maŋŋá doallat de dakkaviđe ortniiduvvančoahkkima ja ovttas ealáhus- ja čanasjoavkkuiguin ráhkadat áššelisttu. Vejolaččat juohkašuvvat vel dan olles bargojoavkku vuolde unnit joavkkuide, vai oažžut áššiid beaktilabbot ovddosguvlui, lohká Sirviö.

Bargojoavkku čohkkegohtet álgojagis

Eanan- ja meahccedoalloministeriijas sáddejit nammadanbivdagiid dál ođđajagimánus.

Bargojovkui čohkkejit lahtuid earret eará Sámedikkis, Bálgosiid ovttastumis, Lappi luonddusuodjalusas, guovlohálddahusas, meahciráđđehusas ja eanandoallobuvttadeddjiin.

– Jurddan lea, ahte joavku lea doarvái viiddis, muhto nuppe dáfus doarvái unni vai bastit beaktilit doaibmat, dadjá Tapani Sirviö.