Davviriikalaš sámenuoraid konferánsa lágiduvvo dán geardde gáiddusin 26.8. Dáhpáhus lea oaivvilduvvon buot sámenuoraide miehtá Sámi ja dohko sáhttá almmuhit iežas Nuoraidráđi neahttasiiddu (siirryt toiseen palveluun) bokte. Konferánssa fáddán lea dálkkádatrievdan ja ságastallamiid lassin doppe ordnejuvvojit iešguđetlágan bargobájit.
Konferánssa váldolágideaddjin doaibmá Sámedikki nuoraidráđđi ovttasbarggus Sámi parlamentáralaš ráđi nuoraidlávdegottiin. Sámedikki prošeaktabargi Milla Pulska vástida davviriikalaš sámenuoraid konferánssa lágideamis.
Konferánssa ulbmilin lea čállit lohppii Nuoraidráđi álggahan cealkámuša dálkkádatrievdama birra. Pulska muitala NRK Sámi jearahallamis cealkámuša gieđahallat dan, mo dálkkádatrievdan váikkuha sámi ealáhusaide ja kultuvrii ja makkár lea sámenuoraid boahttevuohta.
– Sámenuorathan čuvvot máilmmi ođđasiid ja leat fuolas das, mo dat váikkuha árktalaš guovlluin. Dálkkádatrievdan dovdo issoras olu árktalaš guovlluin, muitala Pulska NRK Sápmái.
Pulska šálloša, ahte konferánssa ii sáhte doallat njunnálagaid, muhto gáiddusoktavuođain maiddái sámit nuppe bealde rájá besset searvat. Son muittuhage, ahte ovttasbargu eará riikkain orru sápmelaččain lea hirbmat dehálaš.
– Miihan leat okta álbmot, vaikko leatge sierra riikkaid siste.
Lassin leat maiddái bargobájit
Konferánssas ordnejuvvojit iešguđetlágan bargobájit, maid bokte nuorat besset ohcat iežaset jiena ja dan, maid sii háliidit dadjat ja ovddidit.
Bargobájit leat oktiibuot golbma, main nuorat ožžot válljet alcceseaset heivvolačča. Daid ordnejit earet eará Youth4nature, EmmiNuorgam ja Pauliina Feodoroff.
Prográmma boahtá oidnosii Nuoraidráđi neahttasiidui dán vahku áigge. Dieđu oažžu maiddái Nuoraidráđi Facebook-ja Instagram- siidduin.
Yle Ođđasiid Sámis ja Beaivvi ságaid sáhtát maid guldalit Yle Areenas.
