Ođđasamos dieđut koronavirusis: Guovdageainnus mánáidgárdi gitta korona geažil | Anára koronadilli lea duođalaš | Beaktilis divššus 54 olbmo

Yle Sápmi beaiváda dán artihkkalii ođđasamos dieđuid koronavirusa dagahan dilis eandalit davvin.

Rádjeservošii gullevaš norgalaččat besset dál álkibut Supmii. Govva: Sara Kelemeny / Yle

4.1.2022 dii. 8.00 Guovdageainnus mánáidgárdi gitta korona geažil

Guovdageainnus leat gártan giddet mánáidgárddi, go bargi bođii bargui iige lean váldán koronaiskosa nu mo lei ávžžuhuvvon. Bargi dagai ruoktoteastta barggus ja oaččui positiiva bohtosa. Áššis čállá Ávvir-áviisa neahttasiiddustis (siirryt toiseen palveluun).

3.1.2022 dii. 10.20 Anára koronadilli lea duođalaš

Anára gieldda njunušdoavttir Outi Liisanantti muitala, ahte Anára gieldda koronadilli lea duođalaš.

– Mii gávnnahat sullii 15 njoammuma beaivválaččat, Liisanantti lohká.

Buot njoammundáhpáhusaid eai bastte guorrat vátna resurssaid dahje váilevaš dieđuid geažil.

Koronatesten liikká doaibmá gielddas bures. Testenbáikkit leat Avvila dearvvasvuođaguovddážis, Avvila girdigiettis ja Suoločielggis. Liisanantti muittuha, ahte jus ruovttuteasta lea positiiva de fertešii fitnat vel virggálaš iskosa válddiheamen

Njoammumiid gávnnahit sihke olgoriikalaččain ja báikkálaš olbmuin.

3.1.2022 dii. 8.05 Beaktilis divššus 54 olbmo

Beaktilis divššus ledje sotnabeaivve olles Suomas 54 olbmo koronadávdda geažil. Beaktilis divššu njunušdoavttir Stepani Bendel lohká, ahte maŋimuš beivviid alla njoammunlogut eai oidno vuos buohccedivššu olmmošmearis. Dat geat dál ožžot dávdda, sáhttet šaddat dikšui moatti vahku siste, Bendel muitala.

Infekšuvdnadávddaid njunušdoavttir Asko Järvinen muittuha, ahte easkka dál buohccedikšui gártagohtet olbmot, geaidda dávda njoamui juovlabasiid.

3.1.2022 dii. 7.50 Soađegilis 45 njoammundáhpáhusa

Soađegili gieldda njunušdoavttir Minna Jokinen muitala, ahte Soađegilis gávnnahedje juovlabasiid 45 koronanjoammuma. Oasi njoammumiin gávnnahedje olgoriikalaččain. Njoammunáitagii lea sáhttán šaddat earret eará skuvllas dahje boarrásiidsiiddas. Gielddas čuođit olbmot leat mearriduvvon karantenii. Jokinen muittuha gieldda dieđáhusas, ahte buohccin ii oaččo vuolgit almmolaš báikkiide.

31.12.2021 dii. 16.40 Ruoŧas gáibidit riikiiboahttiin negatiiva koronateastta

Ruoŧŧa gáibida duođaštusa negatiiva koronaiskosis riikiiboahttiin. Dát mearrádus ii leat olahan buot mátkkálaččaid ja čuođit olbmot leat máhcahuvvon ruovttuideaset.

Ruoŧa rájá alde ii leat reahkkán maŋŋebárgga rájes dat, ahte čájeha koronapássa. Ruoŧa eiseválddit gáibidit, ahte riikiiboahttit fertejit čájehit negatiiva koronaiskosa, mii lea váldon guovtte jándor siste. Njuolggadusa ii sáhte garvit ruovttuteasttain, koronapássain iige duođaštusain buhccojuvvon koronadávddas.

Spiehkastahkan leat rádjeservoša olbmot ja sii besset johtit barggus Ruoŧa bealde, jus sis lea koronapássa dahje duođaštus negatiiva koronaiskosis, mii lea váldon čieža jándor siste.

31.12.2021 dii. 16.10 Koronadilli lea vearáskan davvin

Lappi buohccedikšunbiirre koronakoordinerenjoavku lea čoahkkimastán otne. Sii dieđihit, ahte koronadilli lea guovllus rievdan juovlabasiid maŋŋá. Beaivválaš njoammundáhpáhusat leat laskan ja šaddan juoba golmmageardásažžan ovddit vahkuid beaivválaš njoammunloguid ektui.

Maŋimuš njealje jándor siste ođđa njoammumiid leat Lappi eanagottis gávnnahan 486 dán rádjai. Veardádallama dihtii mannan vahkus gávnnahedje guovllus oktiibuot 350 njoammundáhpáhusa ja ovddit vahkus fas 306. Beaivválaš njoammunloguid laskan ja boahkuhuvvon olbmuid buohccán dávdii muitalit das, ahte omikronvariánta leavvá guovllus. Sullii beali njoammumiin gávnnahit suopmelaččain ja nuppi beali fas olgoriikkalaččain.

31.12.2021 dii. 16.00 Deanus ođđa njoammundáhpáhus

Deanus leat gávnnahan ođđa koronavirusnjoammuma juovlamánu 29. beaivve, almmuha Deanu gielda. Olmmoš lei boahtán olgoriikkas 28.12. Son lea dál erremis ja lagašoktavuođaid leat kárten.

31.12.2021 dii. 15.55 Otná koronalogut

Suomas leat otná dieđuid mielde gávnnahan badjelaš 11 000 koronavirusnjoammuma. Dát boahtá ovdan Dearvvasvuođa ja buresveadjima lágádusa (THL) koronaloguin. Dáid njoammumiin váile 8 000 leat gávnnahan Helssega ja Uusimaa buohccedikšunbiires, go doppe diehtosirdima váttisvuođaid dihtii koronaloguid beivideapmi ádjánii. Dasa lassin otná koronaloguin sullii 1 800 njoammundáhpáhusa ledje juovlabasiid. Suomas leat koronavirusdávdda dihtii buohccedivššut dál 375 olbmo. Beaktilis divššus leat 52 olbmo.

Lappi eanagottis leat gávnnahan maŋimuš jándoris 102 ođđa njoammundáhpáhusa. Anáris leat gávnnahat ovcci ođđa njoammuma, Eanodagas vihtta ođđa njoammuma ja Soađegilis ovtta ođđa njoammundáhpáhusa.

31.12.2021 dii. 7.40 Lappi buohccedikšunbires njoammumat sakka lassánan

Koronavirusnjoammumat leat lassánan sakka meastta olles Lappi buohccedikšunbires. Gaskavahku maŋŋá leat gávnnahuvvon sullii 210 ođđa njoammuma. Stuorámus oassi dain leai Roavvenjárgga guovllus, ja ovttaskas dáhpáhusat meastta buot gielddain. Sullii bealli njoammumiin lea suopmelaččain ja nubbi bealli olgoriikkalaččain.

31.12.2021 dii. 7.15 Avvilii ohcet bargiid

Anár gielda ohcá jođánis áigetávvaliin bargiid 9lives- koronatesttenbáikái Avvila girdingieddái. Sii galget doaibmat buotlágan bargguin koronatesttemis ja njoammunbálgáid čuvodeamis.

Čájánasaid váldimiid, daid dutkkamiid ja daid guoskki veahkkedoaimmaide dárbbašuvvojit skuvlejuvvon bargit.

Dan lassin doppe leat maid olu eará barggut, main ii gáibiduvvo buohciiddikšunsuorggi skuvlejupmi.

30.12.2021 dii. 16.15 Norgalaččat besset dál álkibut Supmii

Rádjeservošii gullevaš norgalaččat besset dál álkibut Supmii, go guovtte jándor siste váldon koronaiskkus ii šat gáibiduvvo riikiiboahtima oktavuođas.

Lappi guovlohálddahusdoaimmahat lea gomihan mearrádusa, mii geatnegahttá guovtte jándor siste váldon negatiiva koronaiskosa čájeheami Supmii boahtima oktavuođas. Guovlahálddahusdoaimmahaga ja stáhtaráđi mearrádusain ledje ruossalasvuođat ja danin dán ođđa njuolggadusa válde atnui.

Rádjeservošii gullevaš norgalaččat besset dál Supmii, jus sis lea čájehit koronapássa dahje duođaštus negatiiva koronaiskosis, mii lea váldon čieža jándor siste.

30.12.2021 dii. 14.30 Koronaloguid beaivideapmi sievgá – 9 616 ođđa njoammuma

Diehtosirdima váttisvuođaid dihtii Dearvvasvuođa ja buresveadjima lágádusa (THL) koronaloguid beaivideapmi sievgá. Dál čuolbma lea čovdojuvvon ja dan dihtii otná njoammunlohku lea stuoris, 9 616 njoammuma. Dáid njoammumiin sullii 6 000 leat gávnnahan juovlabasiid áigge. Jus daid guođđá otnáš loguin eret, ođđa njoammumiid rehkenastet leat sullii 3 600.

Lappi eanagottis leat gávnnahan otná dieđuid mielde 92 njoammuma. Anára gielddas leat čieža ođđa njoammuma, Soađegilis ja Eanodagas guktuin fas guokte ođđa njoammundáhpáhusa.

30.12.2021 dii. 11.20 Muoná-Eanodaga guovllu koronadilli

Muoná-Eanodaga guovllus leat juovllaid gávnnahan ollu njoammumiid namalassii turismasuorggi bargiin. Dál dát njoammumat oidnojit maiddái njoammunloguin. Ievttá Dearvvasvuođa ja buresveadjima lágádusa (THL) loguid mielde Eanodagas leat gávnnahan 8 ođđa koronanjoammuma.

Njunušdoavttir Teemu Taulavuori muitala, ahte dáid ođđa njoammumiin goittot bealli gullá turismasuorggi njoammunbálgáide. Dasa lassin koronavirusdávda lea njommon bearrašiid siste.

Buot njoammumiid eai leat bastán guorrat. Taulavuori lohká, ahte guovllu turismasuorggis leat juohke fitnodatdoalli bargiin gávnnahan njoammumiid.

– Dávdaluvvan turismasuorggi bargiid siste lea dábálaš, go sii orodit dávjá ovtta báikkis ja johtet bargui ovtta fáro, Taulavuori muitala.

Son namuha, ahte fitnodatdoallit gal barget ollu njoammumiid eastademiin. Taulavuori jáhkká, ahte dilli ráfo gulul dál juovllaid maŋŋá.

30.12.2021 dii. 7.45 Guđas vulge errenbáikkin

Anára dearvvasvuohtafuolahusa lágidan errenbeikkiin lea lobihága vuolgán eret buohkanassii guhtta olbmo.

Yle Sápmi muitalii álgovahkus, ahte Anára gielddas leat karantenai mearriduvvon olbmot vuolgán eret errenbáikkistis lobihága.

Vuossárgga dieđuid mielde jáhkkimis sii vulge ruoktomátkái olgoriikkaide, ná muitalii njunušdoavttir Outi Liisanantti. Ikte gaskavahkko ovdanboahtán mediadieđuid mielde jearaldagas leat buohkanassii guhtta olbmo.

Áššis lea almmuhuvvon bolesii, muhto resursavátnivuođa dihte daid lea váttis dutkkat, diehtá Ilta-Sanomat-áviissa.

29.12.2021 dii. 16.55 Anára gielddas boahkuhišgohtet mánáid

Stáhtaráđi ođđa mearrádusa mielde Anára gielddas boahkuhišgohtet 5–11-jahkásaš mánáid, almmuha gielda.

Mánáide addet BioNTech-Pfizerin Comirnaty boahkuid. Boahkuheamit leat Anáris ja Avvilis. Mánáid boahkuhemiid álggahit Avvilis 7.1.2022. Loga dárkilut áiggiid gieldda dieđáhusas (siirryt toiseen palveluun).

29.12.2021 dii. 16.00 Koronaiskosiid dahkamis ođđa olahus

Koronaiskosiid leat mannan vahkus dahkan Lappi buohccedikšunbiires nu ollu, ahte dat lea jo ođđa olahus dán rádjai.

Infekšuvdnanjunušdoavttir Markku Broas muitala, ahte buot buohkanassii guovllu gielddain dahke sullii 9600 koronaiskosa. Iskosiin lagabuidda njeallje proseantta ledje positiivvat. Broas oainnu mielde dát muitala dan, ahte olbmot besset koronaiskosiidda bures ja ahte dat doibmet beaktilit.

29.12.2021 dii. 15.50 Otná koronalogut

Dearvvasvuođa ja buresveadjima lágádusa (THL) otná dieđuid mielde leat Anáris gávnnahan gávcci ođđa njoammuma ja Eanodagas fas ovcci ođđa njoammuma. Olles Lappi eanagottis dieđihit gávnnahan 87 ođđa njoammuma.

Olles Suomas leat otná dieđuid mielde gávnnahan 2 584 ođđa koronanjoammuma. Oktiibuot pandemiija áigge leat Suomas gávnnahan váile 240 000 njoammuma. Buohccedivššus leat koronavirusdávdda dihtii dál 343 olbmo, ja dain 56 leat beaktilis divššus. Ođđa jápmimiid leat registreren 22.

29.12.2021 dii. 7.30 Koronalogut gulul loktanit

Lappi buohccedikšunbires koronadilli lea bisson ovddežis, gávnnahuvvui bire koronakoordinašuvdnabargojoavkku čoahkkimis ikte.

Maŋimuš vahkuid áigge njoammumat leat registerejuvvon sullii 300-330 vahkus, muhto mannan beivviin mearri lea váhá loktanan. Dan dihte návdojuvvo ahte jearaldagas lea álkket njoammu omikronvárianta.

Dán rádjai golbma omikronnjoammuma lea sihkkaraston ja nuppelogi eahpádusa vuolde.

Njoammumat leat eanemus lassánan nuorra ollesolbmuid ja gaskaahkásaččaid siste. Stuorámus oassi njoammuma ožžon olbmuin ii leat boahkuhuvvon.

Buohkanassii vahkus leat gielddain váldojuvvon 9600 teasta ja njoammumat leamašan lagabui 4 proseantta.

29.12.2021 dii. 7.30 Koronapássa hildui

Boahtte ija fápmui boahtá koronapássa geavahusa ráddjen. Dán rádjai koronapássain lea bastán garvit dihto ráddjemiid, muhto ásahusnuppástusa mielde dat ii leat šat vejolaš.

Mearrádus lea fámus daid guovlluin, main korona lea leavvanmuttus dego Lappi eanangottis ja dat lea fámus ođđajagimánu 20 beaivvi rádjai..

28.12.2021 dii. 15.55 Guovdageainnus njeallje ođđa koronanjoammuma

Guovdageainnus leat ikte gávnnahan njeallje ođđa koronanjoammuma, dieđiha Guovdageainnu gielda (siirryt toiseen palveluun). Olbmuin leat leamaš ollu lagašoktavuođat ja gielda bargagoahtá dál njoammunguorramiin.

28.12.2021 dii. 14.30 Muoná-Eanodaga guovllus ollu njoammumat turismasuorggi bargiin

Muoná-Eanodaga dearvvasvuođafuolahus almmuha Facebook-siiddus (siirryt toiseen palveluun), ahte juovlabasiid leat guovllus gávnnahan ollu njoammumiid.

Njunušdoavttir Teemu Taulavuori muitala, ahte guovllu turismasuorggi bargiin leat dál leamaš ollu njoammumat.

– Dat leat badjelaš moaddelogi. Dat gávdnojit buot guovllu turismabáikkiin dahje hoteallain. Muhtin veardde leat maiddái mátkkálaččain njoammumat, lohká Taulavuori.

Taulavuori dieđuid mielde erremis leat dál sullii 38 olbmo, geain lea koronanjoammun Muoná-Eanodaga guovllus. Son namuha, ahte erenomážit bearrašiin dávda njoammu jus bearašlahttu bargá turismasuorggis. Turismasuorggi bargit leat dávjá boahkuhuvvon nuorat gearddi olbmot, son lasihastá.

28.12.2021 dii. 7.30 Čavgejuvvon ráddjemat fápmui maŋŋebárgga

Restoráŋŋaráddjemat čavget otne maŋŋebargga koronaepidemiija dihte. Alkoholavuovdin galgá nohkat buot báikkiin viđa áigge veaigin, ja juos alkohola lea váldovuovdingálvu, de uvssat galget mannat gitta guđa áigge.

Boradanbáikkit ožžot leat rabas gávcci rádjai juos leat koronapássat.

Otná rájis maid Ruoŧŧa gáibida riikii boahtiin alimustá 48 diimmu boares negatiivvalaš koronateasttabohtosa. Fasta rájá rastá johtti bargiin dat ii goit gáibiduvvo.

Suopma maid máhcaha otne sisrájáid gohcima ja gáibidišgoahtá koronapássa lassin maid negatiivvalaš teasttabohtosa.

Čavgejuvvon rádjenjuolggadusat guoskahit otná rájis maid EU:s ja Schengen-riikkain boahtti mátkošteaddjiid.

28.12.2021 dii. 7.30 Njoammumat Lappis lassánit

Koronanjoammumiid mearri lassána olles Lappi eanangottis. Mannan vahkuloahpas nappo juovlabasiid áigge Lappi buohccedikšunbires gávnnahedje sullii 160 koronavirusnjoammuma.

Länsi-Pohja buohccedikšunbires fas mannan vahkus registerejedje sullii 120 njoammuma.

Lappis leamašan guokte nannejuvvon omikron-virusvariántanjoammuma, guktui vuolggasadji leai olgoriikkain.

27.12.2021 dii. 13 Eanodagas ja Anáris koronadilli vearrána

Suomas leat bearjadaga rájes, nappo juovlabasiid áigge registerejuvvon 3649 ođđa koronavirusnjoammuma. Buohccedivššus leat 307 olbmo ja beaktilis divššus 56 olbmo.

Sámigielddain Anáris leat vihtta ođđa njoammuma, ja maŋimuš guovtti vahku áigge Anáris leat gávnnahuvvon 45 njoammuma.

Ohcejogas dilli ii leat maŋimuš guovtti vahku áigge nuppástuvvan, iige dan áiggis gielddas leat registerejuvvon oktage ođđa njoammun.

Eanodaga gielddas ievttá rájis leat gávdnon golbma ođđa njoammuma ja maŋimuš guovtti vahku lohku lea 13.

Soađegili gielddas leat njealjje ođđa njoammuma ja maŋimuš guovttivahku lohku oktiibuot 13.

Otná dieđuid mielde vearrámus koronadilli lea Eanodagas, gos albmananlohku lea dál badjel 726,7. Albmananlohku lea veardáduslohku, mas guovtte vahku njoammumiid mearri rehkenasttojuvvo 100 000 ássi ala. Anára gielddas dát vástideaddji lohku lea dál 644,2,

27.12.2021 dii. 11.45 Anáris buot mátkkálaččat eai leat čuvvon karantenanjuolggadusaid

Anára gielddas leat dál erremis 65 olbmo, muhto buohkat eai leat čuvvon karantenarávvagiid. Anára gieldda njunušdoavttir Outi Liisanantti muitala, ahte koronapositiivvalaš olgoriikalaš mátkkošteaddjit leat vuolgán eret Suomas, vaikko leat leamašan karantenas. Loga eanet áššis dáppe.

23.12.2021 dii. 13.20 Lappi buohccedikšunbires 12 nana omikron-eahpádusa

Lappi buohccedikšunbiire koronakoordinerenjoavku dieđiha, ahte buohccedikšunbiire guovllus leat dán rádjái duođaštuvvon ja sihkarastojuvvon guokte omikron-dáhpáhusa. Dasa lassin guovllus leat 12 nana omikron-eahpádusa, mat eai leat vel sihkarastojuvvon.

Lappi buohccedikšunbiire guovllus mátkkošteddjiin leat duođaštuvvon muhtun veardde korona njoammumat, muhto eanáš njoammumat leat duođaštuvvon suopmelaččain.

23.12.2021 dii. 10.50 Čoahkkananráddjehus ii guoskka ipmilbálvalusaid

Dieđa- ja kulturministtar Antti Kurvinen almmuha, ahte juovlagirkostallamiid sáhttá lágidit vaikko leatge ráddjehusat.

– Daid sáhttá ain lágidit ja olbmot sáhttet mannat juovlagirkui, Kurvinen lohká.

Kurvinen muitala, ahte ođđa ráddjehusat eai eastte heajaid dahje hávdádemiid lágideami muhto dain ferte čuovvut njoammuneastadandoaimmaid.

Dasa lassin Ohcejoga báhppa Päivi Aikasalo muittuha, ahte čoahkkananráddjehus ii guoskka ipmilbálvalusaid. Oulu bismágotti duopmokapihttal rávve, ahte čoahkkananráddjehusaid dihtii ipmilbálvalusaide ja eará girkolaš doaimmahusaide sáhttet váldit sisa eanemustá goalmmádasa das, go báikkis leat čohkkánsajit.

Dát dárkkuha dan, ahte ovdamearkka dihtii Ohcejoga girkui sáhttet váldit sisa 80 olbmo, Gáregasnjárgga kapellii 40 olbmo ja Njuorggáma rohkosvissui fas 25 olbmo.

23.12.2021 dii. 10.40 Lappi eanagottis čoahkkananráddjehusat

Vearránan koronadili geažil Lappi guovlohálddahusdoaimmahat lea ikte mearridan gieldit guovllus badjel 20 olbmo álbmotdilálašvuođaid ja almmolaš čoahkkimiid, mat lágiduvvojit sissajiin. Dasa lassin njoammuneastadandoaimmaid ferte čuovvut almmolaš báikkiin. Dát mearrádus lea fámus otná rájes 22.1.2022 rádjai olles eanagottis.

23.12.2021 dii. 10.30 Juovlagirkostallamat lágiduvvojit ráddjehusain fuolakeahttá

Anára kirkohearrá Tuomo Huusko muitala, ahte ođđa ráddjehusat eai váikkut Anára searvegotti doaimmaide juovlabasiid. Áidna lea, ahte Oulu bismágotti duopmokapihttala mearrádusa mielde olbmuid sáhttet luoitit sissajiide dušše goalmmádasa dan mearis, mii dohko dábálaččat čáhká. Dát guoská Sámeguovllu.

– Avvilis sáhttet girkui váldit 100 olbmo, Anára girkui 50 olbmo ja Suoločielggi kapellii 50 olbmo. Dainna mii geahččalat dasto birget, Huusko lohká.

Kirkohearrá jáhkká čohkkánsajiid liikká reahkkát buohkaide.

– Mun jáhkán ahte dál dán koronadilis olbmot leat oalle várrugasat. Mii goittot neahttarávdnjet iđitipmilbálvalusa Avvilis ovcci áigge.

Huusko muittuha, ahte dorvvolašvuođa ferte váldit buot dilálašvuođain vuhtii. Vaikko ođđa ráddjehusat eai guoskkage ipmilbálvalusaid, dat gusket ovdamearkka dihtii searvegoddedálu dilálašvuođaid. Ávžžuhussan lea, ahte ovtta sajis leat eanemustá 20 olbmo.

23.12.2021 dii. 8.30 Koronaboahkuid addigohtet mánáide

Dearvvasvuođa ja buresveadjima lágádus (THL) almmuha, ahte gielddat sáhttet dál fállagoahtit koronaboahkuid 5–11-jahkásaš mánáide. Stáhtaráđđi rievdadii koronaboahkuid guoski láhkaásahusa ikte nu, ahte dál boahku sáhttet oažžut buohkat badjel 5-jahkásaš olbmot.

Ođđa ásahus lea fámus otná rájes. Ovdal rievdadusa, koronaboahku fálle dušše riskajovkui gullevaš mánáide.

22.12.2021 dii. 13.15 Muoná-Eanodaga guovllus addet goalmmát koronaboahkuid

Muoná-Eanodaga dearvvasvuođafuolahus almmuha, ahte koronaboahkuhemiid lágidit maiddái juovlaruohta maŋŋá ovdal ođđa jagi. Áiggi sáhttá várret telefon bokte.

Goalmmát boahku ožžot riskajovkui gullevaš olbmot, jus nuppi boahkus lea gollan unnimustá guokte mánotbaji. Dasa lassin badjel 60-jahkásaččat ožžot goalmmát boahku, jus nuppi boahkus lea gollan 3–4 mánotbaji. Vuollel 60-jahkásaš ollesolbmot, geat eai gula mange riskajovkui, ožžot viežžat goalmmát boahku 4–6 mánotbaji maŋŋá nuppi boahkus.

22.12.2021 dii. 11.36 Suopma gozihišgoahtá rájáid

Ráđđehusa ođđa ráddjehusaid mielde Suopma gozihišgoahtá fas rájáid juovlamánu 28. beaivvi rájes gitta 16.1.2022 rádjai.

Buohkat geat bohtet Supmii fertejit čájehit koronaduođaštusa ja dasa lassin duođaštusa negatiiva koronaiskosis, mii lea váldon guovtte jándor siste. Gáibádusa koronaduođaštusas sáhttá garvit, jus lea buohcan dávdda vuollel guhtta mánobaji dassái ovdal riikiiboahtima. Negatiiva koronaiskkus ii gáibiduvvo jus olmmoš lea Suoma stáhtaborgár, orru Suomas fásta dahje jus olbmos leat muđui doarvái buorit ákkat rájárasttildeapmái.

Spiehkastahkan leat Suoma ja Ruoŧa sihke Suoma ja Norgga rádjeservošiidda gullevaš olbmot. Sin buohta geatnegahtto čájehit dušše koronaduođaštus, duođaštus vuollel guhtta mánobaji dassái buhccojuvvon koronadávddas dahje negatiiva koronaiskkus, mii lea váldon čieža jándor siste ovdal riikii boahtima.

22.12.2021 dii. 11.32 Skuvllat bissot rabas

Ráđđehusa ođđa ráddjehusaid mielde vuođđoskuvllat ja nuppi dási oahppolágádusat ožžot ain fállat lagasoahpahusa. Allaskuvllaid ektui ávžžuhuvvo gáiddusoahpahus.

22.12.2021 dii. 11.28 Leavvanmuttu guovlluide ráddjehusat 28.12. rájes

Dearvvasvuođa ja buresveadjima lágádusa (THL) listui (siirryt toiseen palveluun) leat čohkken maiddái gaskageardán ja mearkkašahtti riskka doaimmaid.

Ođđa njuolggadusaid mielde dákkár dáhpáhusaid ja doaimmaid ii oaččo lágidit leavvanmuttu guovlluin ollenge 28.12. rájes golmma vahkkui. Dákkár gaskageardán ja mearkkašahtti riskka doaimmaide gullet earret eará olgobáikkit ja iešguđetlágan badjel logi olbmo álbmotdilálašvuođat.

22.12.2021 dii. 11.20 Ráđđehusa ávžžuhus guovlohálddahusdoaimmahagaide

Ráđđehus ávžžuha guovlohálddahusdoaimmahagaid, gos mearridit ráddjehusain, ahte vuollegis riskka doaimmaid sáhtášii ain doalahit doaimmas koronapássain.

Dearvvasvuođa ja buresveadjima lágádus (THL) lea čohkken doaimmaid riskadási mielde deikke (siirryt toiseen palveluun). Vuollegis riskka doaimmaide gullet earret eará álšasálet ja almmolaš sávnnit.

22.12.2021 dii. 11.15 Ráđđehus lea bidjan ođđa ráddjehusaid restoráŋŋaide

Ráđđehus lea ikte almmuhan ođđa ráddjehusaid vearránan koronadili geažil. Dá leat ođđa ráddjehusat, mat gusket restoráŋŋaid.

Juovlaruohta rájes restoráŋŋat fertejit heaitit alkoholajuhkamušaid addaleami diibmu 21 ja steŋget restoráŋŋa diibmu 22. Dán ráddjehusa ii sáhte garvit koronapássain.

Maŋŋebárgga 28.12. váldet atnui čavgejuvvon ráddjehusaid golmma vahkkui. Dalle alkoholajuhkamušaid addaleami ferte heaitit restoráŋŋain diibmu 17 ja steŋget restoráŋŋa diibmu 18. Spiehkastahkan leat borramušrestoráŋŋat. Dat ožžot leat rabas vel diibmu 18-20 koronapássain.

Addalanrestoráŋŋaid áššehasbáikkiin ožžot leat geavahusas dušše bealli ja borramušrestoráŋŋain fas golbma njealjádasa.

22.12.2021 dii. 7.55 Heahtás gidden skuvlla njoammunáitaga dihtii

Heahtá skuvllas viđát ja guđát luohkát leat šaddan koronanjoammunáitagii juovlamánu 20. ja 21. beivviid. Muoná-Eanodaga dearvvasvuođafuolahus dieđiha, ahte boahkukeahtes oahppit mearriduvvojit erremii juovlamánu 30. beaivvi rádjai.

Ávžžuhussan lea, ahte olbmot muitet njoammuneastadandoaimmaid maiddái juovllaid. Dáhpáhusaid geažil Heahtá skuvlla giddejedje ikte ja skuvlamánáin álggii jo juovlaluopmu.

21.12.2021 dii. 12.35 Njeallje mearriduvvon erremii Guovdageainnus

Guovdageainnus njeallje olbmo leat erremis koronanjoammumiid geažil, dieđiha Guovdageainnu gielda (siirryt toiseen palveluun). Okta dain lea Máze skuvlla oahppi. Olles luohkás válde koronaiskosiid ja dain ožžo negatiiva bohtosiid.

21.12.2021 dii. 9.00 Njoammumat mánáidgárddiin Deanus ja Heahtás

Deanu gielddas lea ovtta mánáidgárdemánás duođaštuvvon korona mannan gaskavahku ja dan oktavuođas leat bargit biddjon erremii. Njoammunbálgá dovdet. Mánáidgárdi lea ain rabas, muhto sii leat šaddan giddet ovtta ossodaga. Áššis čállá Ávvir neahttasiiddustis (siirryt toiseen palveluun). Dáin dáhpáhusain Deanu gielda dieđiha, ahte dássážii leat gávdnan goit golbma sihkkaris koronanjoammuma.

Heahtás Riekko nammasaš mánáidgárddis leat maiddái gávnnahan vejolaš njoammumiid. Muoná-Eanodaga dearvvasvuođafuolahus dieđiha Facebook bokte, ahte bearjadaga 17.12. lea sáhttán šaddat njoammunáitagii mánáidgárddi Kuukkelit-joavkkus. Joavkku mánát leat erremis 27.12. rádjai. Bargiid ektui errendárbbu guorahallagohtet.

21.12.2021 dii. 7.15 Anára nubbi omikron-eahpádus

Anára gieldda njunušdoavttir Outi Liisanantti lea dárkilmahttán dieđu ievttá omikron-eahpádusas. Anáris eahpidit gávdnan nuppi omikron-variántta dagahan koronanjoammuma ja njoammun gávnnahuvvui juovlamánu 18. beaivve eaŋgalas mátkkálaččas.

20.12.2021 dii. 13.00 Anáris nubbi omikron-eahpádus

Anára gieldda njunušdoavttir Outi Liisanantti muitala dieđáhusas, ahte Anáris eahpidit gávdnan nuppi omikron-variántta dagahan koronanjoammuma.

20.12.2021 dii. 8.15 Lappi buohccedikšunbiires ođđa omikron-eahpádusat

Lappi buohccedikšunbiire dieđáhusa mielde guovllus leat mannan bearjadaga gávnnahan golbma ođđa omikron-eahpádusa, main okta lea Anára njoammun ja guokte ođđa njoammuma fas Roavvenjárggas.

Buohccedikšunbiire koronakoordinerenjoavku ávžžuha olles guvlui ráddjehusaid badjel 20 olbmo čoahkkanemiide.

20.12.2021 dii. 8.10 Anáris gávnnahan 8 ođđa njoammuma

Sotnabeaivve leat Anáris gávnnahan 8 ođđa koronanjoammuma MTV neahttasiiddu (siirryt toiseen palveluun) dieđuid mielde.

Anára gieldda njunušdoavttir Outi Liisanantti muitala MTV ođđasiidda, ahte njoammumiin vihtta gávnnahedje turisttain ja golbma fas báikegoddelaččain.

Davvi-Supmii vurdet juovllaide 150 000 olgoriikalaš turistta. Anáris gávnnahit beaivválaččat ođđa koronanjoammumiid sihke báikegotti olbmuin ja turisttain. Máŋga mánnábearraša šaddet erremii juovllaid badjel.

Njunušdoavttir Outi Liisanantti muitala, ahte stuorámus oassi guovllu njoammumiin gávnnahuvvo boahkukeahtes olbmuin.

Liisanantti namuha, ahte gielda ovttasbargá fitnodatdoalliiguin gávdnat turisttaide orrunsajiid erremiid várás.

17.12.2021 dii. 12.15 Anáris eahpidit gávdnan omikron-variántta

Anára gielddas eahpidit gávdnan vuosttas omikron-variántta. Loahpalaš boađus vejolaččat sihkkarastojuvvo juo vahkuloahpa áigge. Iskosa leat váldán mátkkálaččas jo ovdalaš. Áššis dieđiha Anára gieldda njunušdoavttir.

17.12.2021 dii. 10.07 Ruoŧŧa gáibidišgoahtá koronapássa mátkkošteaddjiin Davviriikkain

Ruoŧŧa áigu gáibidišgoahtit koronapássa eará Davviriikkain boahtti mátkkošteaddjiin 21.12. rájes, dieđihii Ruoŧa álbmotdearvvašvuođalágádus duorastaga.

Koronanjoammumat leat lassánan Ruoŧas, vaikko dat eai leatge nu ollu go eará Eurohpá riikkain.

Ruoŧa álbmotdearvvašvuođalágádusa dieđu mielde nuppi Davviriikkas boahtti bargiide ja studeanttaide ávžžuhit koronateastta oktii vahkus, vaikko olbmos livččiige koronapássa. Testenávžžuhus ii guoskka rádjebargiide, vuollái ovdaskuvlaahkásaš mánáid iige mánáid, geat ásset vuoruid mielde Ruoŧas ja Suomas váhnemiiddis geahčen.

Maiddái Ruŧŧii boahtti mátkkošteaddjiid ávžžuhit koronapássagáibádusa lassin válddihit koronateastta riikii boahtima maŋŋá nu jođánit go vejolaš, millosabbot juo seamma beaivve áigge.

16.12.2021 dii. 17.29 Badjel 20 olbmo dilálašvuođaid gildet Anáris

Lappi guovlohálddahusdoaimmahat AVI lea mearridan gieldit badjel 20 olbmo dilálašvuođaid ja almmolaš čoahkkimiid sissajiin Anára, Kemi, Keminmaa, Gihttela, Durdnosa ja Badje-Durdnosa gielddain.

Ráddjehusa ii dárbbaš čuovvut, jus álbmotdilálašvuođa badjel 16-jahkásaš oasseváldiin gáibiduvvo koronapássa. Almmolaš čoahkkimiin koronapássa ii sáhte gáibidit.

AVI mearrádus boahtá fápmui lávvardaga 18.12 ja lea dat fámus 17.1. rádjai.

16.12.2021 dii. 16.44 Mátkkošteaddjiin Norggas, Danmárkkus ja Británnias gáibidišgohtet teastta

Suopma gáibidišgoahtá teastta mátkkálaččain, geat bohtet Norggas, Danmárkkus ja Británnias. Mearrádus boahtá fápmui dalán. Jus dáid riikkain boahtti olbmot leat váldán negatiivva koronateastta eanemustá 48 diimmu ovdal riikii boahtima, sii eai dárbbaš šat váldit teastta Suomas.

Maŋŋebárgga rájes EU-Shengen-guovllu olggobealde boahtti mátkkošteaddjiin gáibidit ovddalgihtii eanemustá 48 diimmu boares negatiivva koronateastta. Sii eai beasa riikii, jus sis eai leat guokte koronaboahkuhusa iige teastaduođaštus.

16.12.2021 dii. 16.33 Restoráŋŋaide ráddjehusat olles Lappi eanangottis

Restoráŋŋaid doaibman ráddjejuvvo olles Lappi eanangottis lávvardat ija rájes.

Stáhtaráđđi lea otne duorastaga mearridan nuppástuhttit ásahusa, mainna rádjejuvvuo restoráŋŋaid doaibman koronaepidemiija dihte. Mearrádus guoská máŋgga eanangotti birra Suoma.

Alkohola vuovdin restoráŋŋain galgá nohkat diibmu 17 ja borramušvuovdin lea vejolaš iđit viđa ja eahket guđa gaskkas. Alkohola vuovdin goit lea vejolaš vel viđa maŋŋá, juos oastis lea koronapássa. Juhkamuša oažžu návddašit guđa rádjai. Alkohola vuovdi restoráŋŋain kunddarbáikkiin oažžu deavdit 75 proseantta. Juohkehaččas galgá leat maid iežas čohkkánbáiki.

Juos restoráŋŋas ii leat alkohola vuovdin, dat oažžu leat rabas idja ovtta rádjai.

16.12.2021 dii. 12.15 Lappi buohccedikšunbires duođaštuvvon vuosttaš omikron-variánta

Lappi buohccedikšunbires lea duođaštuvvon vuosttaš Covid 19 omikron-variánta Roavvenjárggas. Omikron-variánta lea duođaštuvvon Irlánddas Supmii mátkkoštan olbmos mannan lávvordaga váldojuvvon iskosis. Áššis dieđihii Lappi buohccedikšunbiire.

15.12.2021 dii. 16.02 Mátkeealáhus fuolas riikiiboahtinráddjehusaid čavgemis

Riikiiboahtinráddjehusaid čavgen dagaha fuola mátkeealáhussuorggis Lappis. Davás vurdet dán juovlasesoŋŋas duháhiid chartermátkkálaččaid. Inari-Saariselkä Matkailu Oy márkanastinhoavda Hanna Kouri dadjá, ahte juovlasesoŋŋa lea dál buori fárttas ja vejolaš ráddjehusat gal bohtet čuohcat mátkeealáhussii.

Sisministeriija evttoha, ahte boahtte maŋŋebárgga rájes buohkain geat bohtet olggo bealde EU- ja Schengen guovllu, gáibiduvvo negatiivvalaš koronateasta. Áššis sáhtat lohkat eanet dáppe.

15.12.2021 dii. 12.30 Korona beasai buohcciidruktui Guovdageainnus

NRK Sámiradio dieđuid mielde koronavirus lea beassan njoammut buohcciidruktui Guovdageainnus. Dávdamearkkat fuopmášuvvojedje vuostamužžan ovtta bargis, guhte leamašan barggus mannan vahkuloahpa.

Dan maŋŋá buot bargit ja buohcciruovttu ássit leat testtejuvvon, ja koronavirus lea njommon ovtta bargái ja guovtti dálu ássái.

Dál lea mearriduvvon, ahte buot dearvvasvuohtafuolahussii gullevaš báikkit leat Guovdageainnus galget leat gittauvssaid duohkin, eaige sii vuostáváldde gussiid.

Dás duohko maid buohcciidruovttu buot bargit ja ássit testtejuvvojit beaivválaččat.

Ikte Guovdageainnus leat gávnnahuvvon guhtta ođđa koronavirusnjoammuma. Vihtta njoammuma gullet ovddežis dovdojuvvon njoammumiidda.

15.12.2021 dii. 12.30 Koronateasttaboađus gáibiduvvo

Suoma sisáššiidministeriija evttoha negatiivalaš koronateastta gáibideami EU- ja Schengen-guovllu olggo bealde boahtti olbmuin boahtte maŋŋebárgga rájes.

Sode-ministtarjoavku lei ikte čoahkkanan dahkat ráđđehussii evttohusa mátkkoštanráddjehusaid čavgemis. Lappi guovlohálddahusdoaimmahat fas lea válmmaštallamin čoahkkananráddjehusaid čieža gildii, okta dain lea Anár.

Čoahkkananráddjehus gielddášii badjel 20 olbmo čoahkkanemiid ja almmolaš čoahkkimiid doallama. Mearrádus ráddjehusain dahkko maŋimustá duorastaga ja dat boađášii fápmui dán vahku lávvardaga.

Divvojuvvon 15.12.2021 dii 15.50. Suoma sisáššiidministeriija evttoha negatiivalaš koronateastta gáibideami EU- ja Schengen-guovllu olggo bealde boahtti olbmuin boahtte maŋŋebárgga rájes. Ii EU- ja Schengen-guovllus boahtti olbmuin.

14.12.2021 dii. 16.41 Lappi buohccedikšunbiire deavdá leavvanmuttu kriteraid

Lappi buohccedikšunbiire jođiheaddjidoavttir Jukka Mattila muitala, ahte guovllu koronakoordinerenjoavku čoahkkimasttii iđđes ja gávnnahii, ahte guovlu ollislaččat deavdá leavvanmuttu kriteraid. Dát dilli lea leamaš jo mannan vahku rájes.

– Dát ii goittot dárkkut dan, ahte ođđa ráddjehusat dahje ávžžuhusat biddjojuvvojit muhto dat leat ain barggu vuolde, muittuha Mattila.

Son deattuha, ahte Lappi buohccedikšunbiire guovlu lea viiddis ja ahte ráddjehusaid guorahallagohtet gielddaid mielde. Stáhtaráđđi fas mearrida duorastaga čoahkkimis vejolaš restoráŋŋaráddjehusain.

14.12.2021 dii. 16.15 Anára, Gihttela ja Muoná gielddaide válmmaštallet čoahkkananráddjehusaid

Lappi buohccedikšunbiire koronakoordinerenjoavku lea otná čoahkkimis gieđahallan guovllu koronadili. Anára gieldda njunušdoavttir Outi Liisanantti oaččui dieđu Lappi guovlohálddahusdoaimmahagas, ahte dál válmmaštallet Anára, Gihttela ja Muoná gielddaide čoahkkananráddjehusaid. Dát ráddjehus guoskkašii badjel 20 olbmo čoahkkanemiid.

14.12.2021 dii. 16.00 Anáris njeallje ođđa koronanjoammuma

Anára gieldda njunušdoavttir Outi Liisanantti muitala, ahte su dálá dieđuid mielde gielddas leat gávnnahan njeallje ođđa koronanjoammuma báikegotti olbmuin maŋimuš jándoris.

14.12.2021 dii. 13.30 Olbmot ostet eanet ah' eanet ruoktoteasttaid

Olbmot ostet ain eanet koronateasttaid, maiguin sáhttá ruovttus iskat leago dávda njommon. Ovdamearkka dihtii Muoná apteaikkas leat vuovdán maŋimuš teasttaid lávvardaga. Maŋŋebárgga apteaika oažžu hilduide daid lasi.

Eanodagas ruoktoteasttaid oastigohte eanebuš dan maŋŋá go gielddas gávdnui ovttaskas koronanjoammun. Maiddái Avvila apteaikkas johtu lea lassánan beliin seammás go gieldda njoammumiid mearri lassána. Njávdáma gávppis ruoktoteasttat eai geasut, dasgo gávpejasa mielde Mátta-Várjjaga gielda juohká gieldalaččaide nuvttá ruoktoteasttaid.

Anáris ledje ikte vuovdán buot ruoktoteasttaid ja dál vuorddašit lasi gávpehilduide. Juha-Pekka Hekkala Anára Sales muitala, ahte máŋggas leat jearahallan, goas ruoktoteasttaid fas fidne oastit.

13.12.2021 dii. 17.01 Lasi njoammumat Norgga Sámedikkis

Norgga sámediggeáirasiin leat gávnnahuvvon golbma ođđa njoammuma, muitala Ávvir-aviisa (siirryt toiseen palveluun).

Mannan gaskavahku čielggai, ahte Norgga Sámedikki dievasčoahkkimis Álttás leigga guovttis ožžon positiiva koronaiskosa. Sámediggi jotkkii goittot dievasčoahkkima, ja buohkat šadde váldit koronaiskosa juohke iđit ovdal go besse čoahkkinlatnjii.

Dievasčoahkkima nohkama maŋŋá koronavirusa leat duođaštan ovtta áirasis vahkuloahpas ja guovtte áirasis vuossáriđđes.

13.12.2021 dii 15.00 Norga čavge rádjarasttildannjuolggadusaid

Gaskaija áigge Norga čavge rádjarasttildannjuolggadusaid, muitala NRK Sápmi.

Buohkat geat Norgii bohtet, fertejit koronaiskosa váldit maŋimusat 24 diimmu siste ja maiddái registreret boahtima Norgii. Dát guoská maiddái ollásit boahkuhuvvon olbmuid ja olbmuid geat leat dán dávdda buohcan.

Karantenagáibádus guoská sin, geain ii leat koronaduođaštus ja bohtet rukses dahje čáhppes rukses guovlluin Norgii. Dál lea earret eará Lappi guovlu ruoksadin.

13.12.2021 dii 14.30 Anáris logemat ođđa njoammuma

Anára gielddas leat vahkuloahpas gávnnahuvvon logemat ođđa koronavirusnjoammuma ja buot leat gieldalaččain, muitala gieldda njunušdoavttir Outi Liisanantti. Su dieđuid mielde dilli lea vearránanguvlui maid eará gielddain, main lea olu turisma.

– Ođđa njoammumat leat boahtán dihtui vahkuloahpa áigge ja odne. Buot otná njoammumiid eat leat oba astan registreret THL:i. Lassebargoveagain leat geahččalan čielggadit, geat leat šaddan koronanjoammunáitaga vuložin, muhto gal dat lea lossat midjiide.

Lappi buohccedikšunbire koronakoordinerenbargojoavku mearrida ihttin maŋŋebárgga, sirdásago Lappi buohccedikšunbire epidemiija leavvanmuddui. Dat sáhttá buktit earret eará ođđa ráddjemiid. Avvila dearvvasvuođaguovddážii lea juo mearriduvvon máskabággu vearránan koronadili geažil.

Guldal maid njunušdoavttir Outi Liisanantti muitala Anára gieldda koronadilis.

13.12.2021 dii 7.00 Avvilis njoammunvárra, Guovdageainnus lasi njoammumat

Ikte olggosaddojuvvon Anára gieldda dieđáhusa mielde avvillaš borramušgávppiin leamašan mannan vahku loahpabealde koronavirusa njoammunvárra.

Mannan duorastaga guovtte stuorimus borramušgávppis leamašan njoammunvárra K-gávppis iđitbeaivvi ja S-marketis álgoeahkedis.

Bearjadaga fas nu iđitbeaivvi go maid veaigin njoammunvárra leamašan guovtte k-gávppis. Njunušdoavttir ávžžuha váldit dearvvasvuođaeiseválddiide oktavuođa juos šaddet dávdamearkkat.

Mannan vahkuloahpas bearjadagas sotnabeaivái Guovdageainnus leat gávnnahuvvon oktiibuot logi koronavrusnjoammuma, ja Kárášjogas ja Deanus goabbásge okta.

Mannan ija Norga lea maid čavgen riikiiboahtinmearrádusaid, buohkat geain ii leat koronapássa dahje eará áššegirjjit ortnegis šaddet karantenai.

10.12.2021 dii. 16.26 Guovdageainnus 11 koronabuohcci erremis

Guovdageainnu koronadilli lea dán vahkus vearránan maŋŋá go njeallje olbmo dohppehalle dávdii vahkuloahpas čoakkalmasas Guovdageainnus.

Suohkandoavttir Anne Lajla Westerfjell Kalstad muitala Ávvir-aviisii (siirryt toiseen palveluun), ahte dál suohkanis leat 11 koronabuohcci erremis. Errenáigi bistá vihtta beaivve dan rájes go koronanjoammun duođaštuvvo.

Otne bearjadaga Guovdageainnus leat gávnnahan golbma ođđa njoammuma. Ovtta njoammungeainnu leat guorran Suoma beallái, nuppi čoakkalmassii Guovdageainnus ja goalmmáda eai leat nagodan guorrat, muitala Ávvir.

10.12.2021 dii. 15.41 Anáris ain lasi njoammumat

Anáris leat otne bearjadaga gávnnahan vihtta ođđa koronanjoammuma. Duorastaga fas dieđihedje 13 ođđa njoammumis. Maiddái Soađegilis leat gávnnahan guokte njoammuma bearjadaga ja ovtta duorastaga. Eatnat njoammumiid vuollasadji lea juogo olgoriikkain dahje eará guovlluin Suomas. Anáris virus lea njommon maiddái guovllu siste.

Olles Lappi buohccedikšunbiires leat duorastaga maŋŋá gávnnahan 48 njoammuma.

10.12.2021 dii. 8.00 Anára searvegoddi gáibidišgoahtá koronapássa

Anára searvegoddi dieđiha ođđa koronanjuolggadusain. Ipmilbálvalusain ja eará dilálašvuođain ferte čuovvut olmmošmeriid. Avvila girkus ožžot leat oktanaga eanemustá 100 olbmo, Anára girkus ja Suoločielggi kapeallas fas eanemustá 50 olbmo hávil.

Čábbámus juovlalávlagat -dilálašvuođain ja konsearttain gáibiduvvo koronapássa. Oasi juovllaid dáhpáhusain fertejit šluhttet ja rievdadusaid sáhttet ain dahkat.

Eastadandoaimmaid mielde ávžžuhit geavahit máskka sissajiin, doalahit dorvogaskka ja bassat gieđaid. Buohccin ii oaččo searvat dilálašvuođaide.

Kirkohearrá Tuomo Huusko ávžžuha searvegoddelaččaid čuovvut dieđáhusaid.

Ođđa njuolggadusat bistet 5.1.2022 rádjai.

9.12.2021 dii. 17.00 Sámi oahpahusguovddáš sirdása ollásit gáiddusoahpahussii ja bargui

Sámi oahpahusguovddáš sirdása ollásit gáiddusoahpahussii ja gáiddusbargui Anára gieldda vearránan koronadili geažil. Gáiddusbargguid joatkit 16.1.2022 rádjái.

9.12.2021 dii. 11.10 Ruovttuteasttat nohkan Avvila gávppiin ja apteaikkas

Anára gieldda njunušdoavttir Outi Liisanantti mielde ruovttuteasttat leat nohkan goit Avvila gávppiin ja apteaikkas. Liisanantti mielde dat leat diŋgojuvvon lasi ja leat fidnemis easka boahtte vahkus.

Anára gielda lea ávžžuhan olbmuid dahkat dál ruovttuteasttaid, go gieldda dearvvašvuođafuolahus lea šaddan garra noađi vuollái njoammumiid geažil.

8.12.2021 dii. 16.18 Eanodatlaččat fuolas koronadilis

Olu olbmot leat váldán oktavuođa Muoná-Eanodaga dearvvašvuođafuolahussii dan maŋŋel go ikte gávnnahuvvui koronanjoammun Heahtá skuvlla oahppis. Dearvvašvuođafuolahusa mielde dál ii leat ávki testet olbmuid geain eai leat dávdamearkkat.

Dearvvašvuođafuolahusas deattuhit, ahte Heahtás ii leat epidemiija, váikko njoammuma vuolggasaji eai vel dieđege. Danne dáhpáhusaid ja astuáiggefálaldagaid eai áiggo maŋidit.

Jus njoammumat bohtet lasi, de boahtte vahkkus soitet ráddjet doaimmaid ja sirdásit vejolaččat gáiddusoahpahussii ovdal juovllaid, muhto dál Muoná-Eanodaga vuođđodearvvašvuođafuolahus ii oainne dasa dárbbu. Muoná-Eanodaga dearvvašvuođafuolahusa dieđáhusa gávnnat dáppe (siirryt toiseen palveluun).

8.12.2021 dii. 15.30 Anára gielddas ođđa ávžžuhusat fámus ihttá rájes

Anára gielddas bohtet fápmui ávžžuhusat koronaepidemiija easttadeapmin duorastaga 9.12. ja dat bistet 2.1.2022 rádjai, dieđiha Anára gieldda spiehkastatdiliid stivrenjoavkku ja njunušdoavttir.

Olles gielddas ávžžuhit olbmuid bargat gáiddusin. Badjel 12-jahkásaččaid ávžžuhit geavahit máskka. Skuvllas dat dárkkuha 6. luohká oahppiid. Priváhtadilálašvuođaid ávžžuhit lágidit unna joavkkuin. Badjel 20 olbmo álbmotdilálašvuođaid eai ávžžut lágidit sissajiin. Dáhpáhusaid sáhttá lágidit olgun, go fuolahit dorvogaskkain ja hygienias. Spealuid, gilvvuid ja speallo- ja gilvomátkkiid eai lágit. Mánáid, nuoraid ja rávesolbmuid astoáigedoaimmat joatkašuvvet dábálaččat.

8.12.2021 dii. 13.40 Norgga Sámedikki dievasčoahkkimis positiiva koronaiskosat

Norgga Sámedikki dievasčoahkkimis Álttás leaba guovttis ožžon positiiva koronaiskosa. Ášši čielggai goalmmát čoahkkinbeaivvi iđđes, odne gaskavahku. Sámediggedirektevra Inger Marit Eira-Åhrén dieđiha, ahte Sámediggi joatká dievasčoahkkima. Sii leat álggahan doaimmaid ja buohkat fertejit geavahit njálbmesuoji ja doalahit mehtera dorvogaskka. Áššis čállet NRK Sápmi (siirryt toiseen palveluun)ja Ávvir (siirryt toiseen palveluun).

8.12.2021 dii. 12.50 Ohcejogas goalmmát koronaboahkoheamit badjel 18-jahkásaččaide

Goalmmát koronaboahkoheamit álget Ohcejogas buot 18 jagi deavdán olbmuide, dieđiha Ohcejoga gielda. THL ávžžuha goalmmát koronaboahkohusa buohkaide 18 jagi deavdán olbmuide. Boahkoheami sáhttá oažžut, go nuppi boahkuhusas lea gollan 5–6 mánotbaji.

Anára gielddas goalmmát koronaboahkoheami addit buot badjel 18-jahkásaččaide, ja 12-17 jahkásaš riskajoavkkuide gullevaš olbmuide, juos nuppi boahkoheamis lea mannan unnimusat vihtta mánotbaji.

Eanodagas goalmmát koronaboahkoheami addet olbmuide, geain lea váilevuohta dávddaid vuostálastinnávccas, guokte mánotbaji nuppi boahkoheami maŋŋá. Goalmmát boahkoheami addet maiddái badjel 60-jahkásaččaide, geain nuppi boahkuheamis lea gollan jahkebealli.

8.12.2021 dii. 12.13 Norggas ođđa doaimmat ja ávžžuhusat

Norgga koronadilli lea vearránan. Maŋemus jándoris leat dieđihuvvon badjel 5 000 ođđa koronanjoammuma Norggas. Dat lea alimus lohku ovtta jándoris, olles pandemiija áigge. Dál Norgga ráđđehus (siirryt toiseen palveluun) áigu váldit atnui ođđa doaimmaid ja ávžžuhusaid, mat leat fámus juovlamánu 9. beaivve rájes čuovvovaš njeallje vahku. Doaimmat ja ávžžuhusat gusket earret eará dorvogaskkaid, olmmošmeriid ráddjema ja alkoholavuovdima. Juohkehaš galggašii doallat mehtera gaskka earáide go lágasoktavuođaide.

Fápmui boahtá álbmotlaš mearrádus geavahit njálbmesuodji sajiin main ii leat vejolaš doallat gaskka. Maiddái doaluid, buvddaid ja gávpeguovddážiid olmmošmearri galgá leat ain unni. Priváhta doaluide, mat lágiduvvojit almmolaš báikkiin, ožžot oassálastit eanemusat 20 olbmo.

Álbmotlaš mearrádusa mielde galgá gaskaija rájes giddet alkoholavuovdima. Dasa lassin ruovttus eai galgga leat eanet go logi guossi. Juovlabasiid áigge sáhttá oktii bovdet 20 guossi, muhto ferte leat mehtera dorvogaska gussiid gaskkas, ja buohkat fertejit smiehttat galle lagašoktavuođa sis leat.

8.12.2021 dii. 10.15 Anár gielda beavttálmahttá ávžžuhusaid, gielda ii sirdás leavvananmuddui

Anár gieldda spiehkastatdiliid stivrenjoavkku ja guovloeiseválddiid dieđáhusa mielde gieldda dilli koronavirusa ektui lea hedjonan sakka. Ovttasráđiid guovloeiseválddiiguin lea mearriduvvon, ahte ovdal guovlohálddahusdoaimmahaga ráddjendoaibmabijuid gielda beavttálmahttá ávžžuhusaid máskkageavaheami, gáiddusbargguid ja čoahkkanemiid ektui. Gielda ii goittotge sirdás leavvananmuddui.

Spiehkastatdiliid stivrenjoavku čoahkkana fas ođđasit dii. 13.00 ja dieđiha ávžžuhusaid birra dárkilabbot otná beaivvi mielde.

7.12.2021 dii. 15.54 Skuvlamánás korona Eanodagas

Eanodagas lea gávnnahuvvon odne koronanjoammun ovtta vuolleskuvlla oahppis. Ievttá bassebeaivvi ja jođánis testema geažil njoammunáitaga vuollái eai leat gártan eará Heahtá skuvlla oahppit dahje bargoveahka.

Ii leat goit diehtu gos njoammun lea boahtán ja danne leage vejolaš, ahte koronadávda lea sáhttán njoammut skuvla- dahje bearašoktavuođaid bokte. Muoná-Eanodaga dearvvašvuođafuolahusas sávvetge, ahte buohkat geain leat unnitge dávdamearkkat, mannet testii.

Jus skuvllas gávnnahit eanet njoammumiid, de skuvlla rektor ja Eanodaga gielda bidjet johtui njoammuneastadandoaimmaid.

7.12.2021 dii. 13.15 Anáris guhtta ođđa njoammuma

Anára gieldda dilli lea hedjonan sakka koronanjoammumiid ektui. Mannan vahkkoloahpa lea gielddas gávnnahuvvon guhtta ođđa koronanjoammuma ja ollugat leat šaddan erremii. Njoammumiid vuolggasaji eai dieđe. Njoammunbálgáid guorran ádjána ja dearvvašvuođafuolahusa noađđi lea lassánan.

Koronavirus lea njommon maiddái skuvlamánáide ja olles luohkáid leat gártan erret. Suoma beal’ Sámis ii leat goittot vuos vuhtton omikron-variánta. Njoammumat levvet erenomážit boahkukeahtes olbmuin.

Dearvvašvuođafuolahusa noađi dihtii Anára gielddas eai sáhte dál lágidit ng. guđa jándor exit-iskosa baicce erremii gártan olbmot fertejit bissut erremis olles 10 jándora.

Gielddas lea dál gáiddusbargoávžžuhus. Loga olles dieđáhusa dáppe (siirryt toiseen palveluun).

7.12.2021 dii. 8.44 Omikron-variántta navdet leavvan davvin

Deanus, Finnmárkkus leat gidden skuvlla álggos vuos gaskavahku rádjái, go ballet omikron-virusvariántta njommon doppe. Ášši muitala NRK Sápmi, Deanu gieldda dieđuid vuođul.

Deanu gielddadoavttir lea mearridan giddet skuvlla dassái go ožžot ollislašgova njoammumiidda. Ovtta bargis ja ovtta oahppis lea duođaštuvvon koronanjoammun. Ballun lea, ahte dat leat omikron-variánta go lagašoktavuođaid leat dárkkistan. Otne váldigohtet iskosiid oahppiin ja bargiin skuvllas.

Maiddái Romssas lea duođaštuvvon omikron-virus. Áššis čállá NRK Sápmi. Vuossárgga veaigin lea Romssa gielda ožžon dieđu, ahte virusa navdet njommon guovtti olbmui. Njoammumiid vuolggasadjin leat Oslo njoammumat. Gieldda dieđáhusa mielde dát ii leat delta-variánta. Dát dárkkuhage dan, ahte dat ferte leat omikron-virusvárianta.

3.12.2021 dii. 13.43 Suopma gáibidišgoahtá koronaduođaštusa dahje -teastta mátkkálaččain

Buot Supmii boahti mátkkošteaddjiin sáhttet 4.12. rájes gáibidit koronaduođaštusa dahje jus dakkár ii leat, de sin sáhttet stivret koronatestii. Dainna geahččalit várjalit álbmoga ođđa omikron-virusvariantta vuostá.

Stáhtaráđi mearrádus vuođđuduvvá Dearvvašvuođa- ja buresbirgenlágádusa cealkámuššii. Dan mielde omikron-virusvariántta dihtii dálá dilis eai leat dakkár riikkat dahje guovllut, gos sáhtášii beare boahtit iige dárbbašivčče fuolahit dorvvolašvuođadoaimmain.

3.12.2021 dii. 12.45 Roavvenjárgga koronadilli vuhtto Anáris

Anára gielddas lea koronadilli vearránan maŋimuš beivviid áigge, go gielddas leat gávnnahan máŋga ođđa koronanjoammuma.

Gieldda njunušdoavttir Outi Liisanantti muitala, ahte guovtti vahku áigge Anáris leamašan guhtta koronanjoammuma ja olbmuid leat mearridan erremii viehka olu.

– Čielgasit orru, ahte Roavvenjárgga dilli vuhtto misge, ja stuorra fuolla lea ahte dat lea dušše álgu. Mun ávžžuhan buohkaid ohcalit koronaiskosii ja viežžat koronaboahkuid, dadjá Liisanantti.

Njunušdoavttir Outi Liisanantti ballá Anára gieldda koronadili vearráneamis. Govva: Anneli Lappalainen / Yle

Avvila dearvvašvuođaguovddážis eai bastte dál testet buohkaid, geat leat gártan njoammunáitaga vuollái ja geain eai leat dávdamearkkat. Gielda lea ordnen koronatestema dál Avvila girdingieddái ja teasta lea nuvttá gieldalaččaide.

Álggus girdingietti testen lei dárkkuhuvvon mátkkošteddjiide girdingiettis, muhto gielda dagai soahpamuša testenfitnodagain, vai maid gieldalaččat besset testii, dadjá Anára njunušdoavttir Outi Liisanantti.

– Doppe leamašan buorre dilli. Beaivválaččat váldet sullii 30 koronaiskosa ja ráiddus lea ferten vuordit eanemusat vihtta minuhta.

3.12.2021 dii. 7.53 Norga gáibidišgoahtá mátkkálaččain koronateastta

Norgga eiseválddit dieđihit, ahte buot mátkkálaččain gáibiduvvo dál koronateasta riikiiboahtima oktavuođas vaikko livččiige váldán koronaboahku dahje buohcan dávdda. Rádjebargit gal besset johtit nu mo ovdalge.

Ođđa njuolggadus lea boahtán fápmui otne bearjadaga. Doaimmaiguin háliidit eastadit koronanjoammumiid ja erenomážit Omicron virusvariántta leavvama. Teastta sáhttá válddihit rájá alde testenbáikkiin. Jus testenvejolašvuohta ii leat rasttildanbáikkis, teastta ferte válddihit eará sajis 24 diimmu siste riikiiboahtimis.

2.12.2021 dii. 15.57 Anáris golbma njoammuma, Muonás guokte ja Soađegilis okta

Lappi buohccedikšunbiires leat maŋŋebárgga maŋŋá gávnnahan 52 ođđa koronanjoammuma. Stuorámus oassi buohcedikšunbiire njoammumiin, 46, leat Roavvenjárgga guovllus. Buot njoammumiid vuolggasadji ii leat čielggas.

Maŋŋebárgga maŋŋá leat gávnnahan golbma njoammuma Anáris, guokte Muonás ja ovtta Soađegilis. Eatnat njoammumiid vuolggasadji lea dieđus.

2.12.2021 dii. 13.05 Anára njoammumiid vuolggasadjin navdet Sajosa dánsundáhpáhusa

Anára gieldda jođiheaddjidoavttir lea addán lasáhusa (siirryt toiseen palveluun) ievttá koronadieđáhussii. Dan mielde koronanjoammumat leat lassánan Anára gielddas ja buot ođđa njoammumat leat gávnnahuvvon boahkokeahtes olbmuin.

Dálá dieđuid mielde njoammumiid vuolggasadjin lea 27.11. lágiduvvon dánsundáhpáhus Sajosis. Jođiheaddjidoavttir ávžžuha koronateastta válddiheapmi, jus lea oassálastán Sajosa dánsundáhpáhussii iige leat váldán koronaboahku dahje jus leat dávdamearkkat.

2.12.2021 dii. 8.15 Avvila girdigiettis sáhttá maid válddihit koronateasttaid

Anára gielddas sáhttá fitnat koronateasttas dál maiddái Avvila girdigiettis. Anára gieldda ođđasamos koronadieđáhusa (siirryt toiseen palveluun) mielde teastabáiki lea rabas árgabeivviid diibmu 10–19 ja vahkkoloahpaid diibmu 10–17. Teasta lea nuvttá gieldalaččaide.

Anára gielddas leat gávnnahan maŋimuš beivviid áigge máŋggaid ođđa koronanjoammumiid ja danin jođiheaddjidoavttir ávžžuha olbmuid čuovvut dávdamearkkaid ja ohcalit teasttaide unnage dávdamearkkaid dihte.

Čuovvovaš pop up -boahkuhandilálašvuohta ordnejuvvo 7.12.2021 diibmu 9–15 Avvila dearvvasvuođaguovddážis.

1.12.2021 dii. 13.06 Ođđa olahus koronanjoammumiin

Dearvvašvuođa- ja buresveadjinlágádus THL dieđuid mielde Suomas leat gávnnahan odne gaskavahku 1 570 koronanjoammuma. Dat lea olahuslohku ovtta beaivvi ala dan rájes go epidemiija álggii.

Buohcciviesuin leat divššus dálá dilis 275 olbmo. Beavttalmahttojuvvon divššus leat 51 koronabuohcci.

Maŋemuš guovtti vahkku áigge Suomas leat gávnnahan oktiibuot birrasiid 15 500 njoammuma.

1.12.2021 dii. 11.40 Lappi buohccidikšunbiires 39 ođđa njoammuma

Lappi buohccidikšunbiires leat gávnnahan vuossárgga maŋŋá 39 ođđa koronanjoammuma, main 31 leat Roavenjárggas.

Buohccidikšunbiire mielde njoammumat leat eanas vuollel 12-jahkásaš boahkokeahtes mánáin. Njoammumat leat gávnnahuvvon maiddái nuorra rávesolbmuin, geaid buohta njoammunbálggis ii leat čielggas. Stuorámus oassi koronai buohccán olbmuin ii leat váldán boahkuhusa.

Roavenjárgga lassin Muonás leat gávnnahan vihtta ođđa njoammuma ja Anára, Gihttela ja Kolari gielddain guđesge ovtta njoammuma.

1.12.2021 dii. 11.26 Roavenjárgga Ylikylä skuvllas karantenas oktiibuot 230 oahppi ja rávesolbmo

Roavenjárgga Ylikylä vuođđoskuvllas leat dál karantenas oktiibuot 230 oahppi ja rávesolbmo. Koronanjoammumiid leat gávnnahan skuvllas dassážii gávcci.

Ylikylä skuvllas ordnejit boahtte bearjadaga koronatestema, mas sáhttet finadit buot skuvlla oahppit ja rávesolbmot.

Roavenjárga sirdásii ikte epidemiijas leavvanmuddui ja gávpogis ávžžuhit olbmuid bargat gáiddusin.

1.12.2021 dii. 10.42 Avvila dearvvašvuođaguovddážis eai bastte dál testet buohkaid, geat leat gártan njoammunáitaga vuollái

Avvila dearvvašvuođaguovddážis eai bastte dálá dilis vástidit buot telefovnnaide, dieđiha Anára gielda. Gieldda dieđáhusa mielde dearvvašvuođaguovddážis eai maiddái dál sáhte testet buot olbmuid, geain eai leat dávdamearkkat, muhto geat leat goittotge gártan njoammunáitaga vuollái almmolaš báikkiin mannan vahkuloahpas Avvilis ja Anáris.

Njoammunbálgáid guoradeaddjit gártejit dál buohkaid, geat leat leamašan lagaš oktavuođas koronadávdii buohccán olbmuiguin.

Jus olbmuin leat dávdamearkkat, de gielda ávžžuha riŋget gohcci buohccidivššárii nummárii 040 770 9187 dahje vástideaddji buohccidivššárii nummárii 040 517 8725.

Dearvvašvuođaguovddáža koronaboahkuhannummárii leat riŋgen odne nu máŋgasat, ahte oassi riŋgejeaddjiid nummáriin lea gahččan riŋgenlisttus eret. Jus dearvvašvuođaguovddážis eai riŋge ruovttoluotta, de gielda ávžžuha riŋget koronaboahkuhannummárii ođđasit.

1.12.2021 dii. 8.50 Guovdageainnu skuvlamánáin koronanjoammumat

Guovdageainnu skuvlla golmma oahppis leat gávnnahan ruovttuiskosis koronanjoammumiid, dieđiha suohkan (siirryt toiseen palveluun). Guovdageainnu suohkan lea váldán PCR-iskosiid dáin oahppiin ja joatká ain njoammunguorramiin. Guovdageainnu skuvllas leat bidjan johtui dábálaš doaibmabijuid ja buohkat geaidda ášši guoská, leat ožžon dieđu dan birra.

Mannan vahkkus suohkanis gávnnahedje oktiibuot golbma koronanjoammuma ja buot dát ledje skuvlamánáin.

1.12.2021 dii. 8.23 Sámi oahpahusguovddáš sirdása gáiddusoahpahussii

Sámi oahpahusguovddáš Anáris lea mearridan sirdásit olles juovlamánnui gáiddusoahpahussii ja -bargui Anára gieldda guovllu koronanjoammunáittadili geažil. Skuvla dieđiha, ahte ná meannudit sihkkarvuođadoaibman.

30.11.2021 dii. 16.48 Korona lea njommon bálvalandálu bargái Avvilis

Anára gielda dieđiha, ahte boarrásiid bálvalandállu Männikkös Avvilis lea okta bargi dieđihuvvon koronapositiivalažžan otne maŋŋebárgga. Su bargovuoru áigge Mustikka ja Kaarnikka ossodagaid bargit ja ássit leat šaddan njoammunáitaga vuollái. Gieldda dieđuid mielde njoammunriska goit lea viehka uhcci suodjebiergasiid geavaheame dihte.

Mannan lávvardaga sáhttá leat šaddan njoammunvára vuollái Avvilis iešguđet gávppiin, apteaikkas, juovlameassuin ja báras ja Anáris borramušgávppis, hoteallas ja Sámekulturguovddáš Sajosis. Maiddái sotnabeaivvi avvillaš gávppis leamašan njoammunáitta. Dasa lassin Kakslauttanen luopmobáikkis leamašan njoammunáitta 24.–27.11.

Dárkkilut dieđuid dáid báikkiin ja áiggiin gávdná Anára gieldda neahttasiiddus (siirryt toiseen palveluun).

30.11.2021 dii. 13.15 Roavenjárggas sirdásit epidemiija leavvanmuddui

Yle dieđuid mielde Roavenjárgga koronadilli lea hedjonan nu olu, ahte doppe sirdásit dál epidemiija leavvan muddui. Ráddjehusat bohtet fápmui odne dahje ihttin. Gávpogis leamašan olu njoammumat maŋemuš guovtti vahkku áigge.

Leavvanmuddui sirdáseapmi oaivvilda dan, ahte čoahkkananráddjehusat bohtet fápmui ja badjel 20 olbmo čoahkkanemiid ii oaččo lágidit siste. Gávppiide, vuojadanhállii ja girjerádjosii oažžu gal mannat dego ovdalge, muhto ferte váldit vuhtii máskaávžžuhusaid ja dorvogaskkaid.

Jus olbmuin lea koronapássa, de sii ožžot lágidit deaivvademiid ja besset maiddái restoráŋŋaide sisa ráddjehusain fuolakeahttá.

Roavenjárggas ávžžuhit dál olbmuid sirdásit gáiddusbargui.

30.11.2021 dii. 8.00 Koronadilli hedjonan Lappi buohccidikšunbiires

Koronadilli lea hedjonan Lappi buohccidikšunbiire guovllus. Maŋemuš vahkku áigge Lappi buohccidikšunbiires leat gávnnahan 122 njoammuma, mii lea golmmageardásaš lohku ovddit vahkku ektui.

Njoammumiin stuorámus oassi lea gávnnahuvvon Roavenjárggas, muhto njommumat leamašan maiddái Gihttelis, Muonás, Giemajávrris, Kolaris, Posios, Anáris ja Soađegilis. Eanemus njoammumat leat gávnnahuvvon mánáin ja boahkokeahtes rávesolbmuin.

Lappi buohccidikšunbiire lea dálá dilis njoammumiid ektui vuođđodásis, muhto koronakoordinerenjoavku mearrida odne, ahte sirdásitgo Lappis leavvanmuddui.

29.11.2021 dii. 9.30 Koronadilli ráfon Kárášjogas ja Guovdageainnus – Deanus ođđa njoammumat

Koronalogut leat njiedjan maŋemuš vahkku áigge davimus Norgga rádjegielddain.

Deanu gielddas gávnnahedje vahkuloahpa áigge guokte ođđa koronanjoammuma. Árat mannan vahkkus Deanu gielda dieđihii golmma koronanjoammumis. Deanu jođiheaddjidoavttir ávžžuha olbmuid dál doallat gaska ja vealtit buot dárbbašmeahttun deaivvademiid.

Kárášjogas eai leat gávnnahan ođđa koronanjoammumiid guđa beaivái. Skábmamánus duođaštedje Kárášjogas oktiibuot 82 njoammuma, muhto dál gielddas leat nagodan bissehit njoammumiid.

Guovdageainnu suohkan dieđihii mannan bearjadaga ovtta ođđa koronajoammumis. Mannan vahkkus suohkanis gávnnahedje oktiibuot golbma koronanjoammuma ja buot dát ledje skuvlamánáin. Skábmamánus leat gávnnahan koronanjoammumiid oktiibuot 21 olbmos Guovdageainnus.

26.11. dii. 13.25 Ohcejogas goalmmát boahku ožžon 14,1 proseantta gieldalaččain

Sámi ruovttuguovllu gielddain leat ain unnán olbmot ožžon goalmmát koronaboahku. Yle ja THL dieđuid vuođul čohkkejuvvon tabealla mielde goalmmát koronaboahku leat Ohcejogas ožžon 14,1 % gieldalaččain, Anáris, Soađegilis badjel čieža proseantta ja Eanodagas gávcci proseantta gieldalaččain.

Olles Suoma álbmogis goalmmát koronaboahku leat ožžon dál njeallje proseantta álbmogis.

Bearjadaga Suomas dieđihedje 1 406 ođđa koronanjoammumis. Lohku lea 60 dáhpáhusa eanet go ikte, mii leamaš dán rádjái stuorimus beaivelohku oppa koronapandemiija álggu rájes. Goalmmadas koronanjoammumiin leat HUS buohccedikšunguovllus.

Dán rádjái Suomas leat gávnnahan 182 284 njoammuma. Koronai laktáseaddji buozalmasvuođaide leat bearjadaga rádjái jábmán 1 309 suopmelačča.

26.11. dii. 11.30 Avvila njoammunáitta leige golggotmánus

Divvojuvvon dii. 12.01. Avvila gávppis dáhpáhuvvan njoammunáitta leamaš golggotmánu 22. beaivve, ii skábmamánu 22. beaivve dego ovdalis čállojuvvui dán artihkkalis. Loga Anára gieldda koronadieđáhusaid dáppe. (siirryt toiseen palveluun)

26.11.2021 dii. 11.20 Oulu Sámit šluhtte ávvudoaluid

Oulu Sámit -searvi šluhtte searvvi 20 jagi ávvudoaluid boahtte vahkuloahpas. Searvvi ságadoalli Sigga-Marja Magga dadjá, ahte searvi váldá duođas hástaleaddji koronadili. Pohjanmaa guovlu, masa Oulu gávpot gullá lea gieskat sirdásaš korona leavvanmuddui.

–Mii áigut dutkat, jus searvi sáhttá ordnet doaluid boahtte jagi bealde, dadjá Magga.

Maiddái eará guovlluin leat dáhpáhusaid ordnemis hástalusat vearrás koronadili dihte.

Norgga bealde Guovdageannus eai šatta Ávvir-cup čiekčamat (siirryt toiseen palveluun) juovlamánu álggus, muitala NRK Sápmi.

Árabuš Guovdageainnus mearridedje maid, ahte sirdet duodjemárkaniid maŋŋelii juovlamánnui. Áššis čálii Ávvir (siirryt toiseen palveluun).

25.11.2021 dii. 15.10 Skábmamánus 20 njoammuma Guovdageainnus

Guovdageainnus leamašan oktiibuot 20 njoammuma skábmamánus. Dat lea eanet go ovdal olles pandemiija áigge, dieđiha Guovdageainnu suohkan (siirryt toiseen palveluun). Golggotmánu 30. beaivvi rájes njoammumat leamašan oktiibuot 24.

Maŋŋebárgga bođii diehtu, ahte guovtti mánnái lea njommon covid-19-dávdda Guovdageainnus.

Kárášjogas eai leat maŋŋebárgga maŋŋá gávnnahan ođđa njoammumiid. Doppe leat skábmamánu álggu rájes gávnnahan juo 82 njoammuma.

25.11.2021 dii. 12.22 Siidda huksenguovllus Anáris gávnnahuvvon korona

Siida Sámi Musea huksenbargoguovllus Anáris lea gávnnahuvvon okta koronanjoammun dán vahkku vuossárgga, dieđiha Anára gielda (siirryt toiseen palveluun). Buot njoammunáitaga vuollái gártan olbmot leat gártejuvvon ja biddjon karantenii. Dassážii ođđa njoammumat eai leat boahtán ovdan. Gielda ja huksenfitnodat čuvvot dili dárkilit.

24.11.2021 dii. 10.45 Ain gávnnahit ođđa koronanjoammumiid Finnmárkkus

Kárášjogas leat gávnnahan ikte maŋŋebárgga ovtta ođđa koronanjoammuma. Erremis leat dál guhtta olbmo. Kárášjot gielddas leat skábmamánu álggu rájes gávnnahan 82 koronanjoammuma.

Guovdageainnus fas leat gávnnahan guokte ođđa njoammuma maŋŋebárgga. Erremis leat čiežas.

Deanu gielda fas dieđiha neahttasiiddustis, ahte leat gávnnahan ovtta njoammuma doavtterkantuvrra bargis maŋŋebárgga.

23.11. 2021 dii. 11.56 Muonás korona lea njommon bearrašiid siste

Muonás leat koronanjoammumat leavvagoahtán skuvllas vuollái 12-jahkásaččaid gaskkas, geat eai leat boahkuhuvvon. Koronanjoammumiid leat gávnnahan guovtte vahku áigge badjelaš 40. Njoammumat leat vuolgán Mátta-Suomas, iige Davvi-Norgga koronadilli váikkut Muonás.

– Váidalahtti ferte dadjat, ahte dilli ii leat buoremus vejolaš, ahte mis dáppe Muoná skuvllas lea šaddan dákkár epidemiija. Dasa laktasit viehka máŋgga bearraša njoammumat, muitala Muoná ja Eanodaga jođiheaddji doavttir Teemu Taulavuori Yle ođđasiidda.

Taulavuori mielde sáhka lea 14 bearrašis. Virus lea njommon dakkár bearrašiidda, main váhnemat eai leat boahkuhuvvon, dahje sis leat váilevaš boahkuheamit, dahje sii eai leat boahkuhuvvon ollege.

Muoná koronanjoammumiin leamaš váikkuhus muhtin ovttaskas dáhpáhussan maiddái Eanodahkii. Epidemiijan dat ii goittot leat šaddan Eanodaga guovllus, dadjá Taulavuori.

22.11.2021 dii. 13.30 Norgga rájá gohcigohtet fas

Hedjonan koronadili dihte Norgga rájá gohcigohtet fas, dieđiha Norgga ráđđehus. (siirryt toiseen palveluun)

Skábmamánu 26. beaivvi rájes galgá vuot registreret iežas jus lea rasttildeamen rájá Norgii.

Rasttildeami oktavuođas gáibidit fas váras negatiiva koronateastabohtosa, mii lea váldon 24 diimmu siste dahje váldit teastta rájá alde. Teastabohtosa eai gáibit, jus lea duođaštus guovtti koronaboahku oažžumis dahje das, ahte lea buohcan koronavirusa maŋimuš guđa mánu siste.

22.11.2021 dii. 10.49 Guovdageainnus njeallje ođđa koronanjoammuma vahkoloahpa áigge – Kárášjogas okta jápmán korona geažil

Guovdageainnu suohkan dieđihii lávvardaga, ahte Guovdageainnus leat ihtan njeallje ođđa koronanjoammuma. Guovttis dain laktásit dakkár njoammumiidda, mat leat jo dieđus. Guovtti njoammuma bálgá leat dál guorramen.

Kárášjogas fas ledje bearjadat rádjai gávnnahan golbma ođđa njoammuma, muitala Ávvir-aviisa (siirryt toiseen palveluun). Kárášjohkalaš vuorrasut olmmoš jámii duorastaga koronavirusa dagahan dávdii. Dát lea vuosttas koronavirusa dagahan jápmu Kárášjogas.

Norga lea maid mearridan, ahte gielddat main leat koronaeastadandoaimmat fámus, sáhttet váldit atnui koronaduođaštusa (siirryt toiseen palveluun). Koronaduođaštus lea seammalágan go Suoma koronapássa. Davvi-Norggas earret eará Kárášjoga, Čáhcesullo ja Romssa suohkanat árvvoštallet koronaduođaštusa atnuiváldima.

18.11.2021 dii. 7.00 Koronadilli vearrána máddin

Suomas leat ikte registerejuvvon 1151 ođđa koronavirusnjoammuma ja dat soaitá lea ođđa ovtta beaivvi olahus.

Eanáš njoammumat leat Mátta-Suomas. Lappi eanangottis vearrámus dilli lea dál Muoná, Durdnosa, Keminmaa ja Tervola gielddain.

Maiddái Gihttel ja Eanodat leat ivdnejuvvon Iltalehti-bláđi kárttas. Dan sadjái nuortin Ohcejogas, Anáris ja Soađegilis lea dál buorre dilli.

Muonás njoammunráidu lea vuolgán johtui báikkálaš skuvllas ja doppe ledje ikte gaskavahku 29 njoammuma.

17.11.2021 dii. 15.15 Koronaepidemiija ložže davvin

Muonás leat gávnnahan otne gaskavahku golbma ođđa koronanjoammuma. Sámegielddain eai leat leamaš maŋimuš beivviid áigge njoammumat.

Norgga bealde ránnjágielddain koronanjoammumat leat geahppánan. Kárášjogas leamašan okta ođđa njoammun ikte maŋŋebárgga. Guovdageainnus fas gávnnahuvvui okta ođđa koronanjoammun vuossárgga 15.11.

Mátta-Várjjagis ja Porsáŋggus eai leat leamaš koronanjoammumat mannan vahkuloahpa rájes.

17.11.2021 dii. 14.58 Sámegielddain boahkuhit goalmmát geardde korona vuostá

Buot sámegielddain leat addigoahtán goalmmát koronaboahkuhusaid badjel 60-jahkásaččaide ja riskajoavkkuide gullevaš olbmuide sihke olbmuide, geat ásset dikšolágádusain.

Goalmmát boahkuhusa sáhttá addit, go nuppi boahkuhusas lea gollan guhtta mánotbaji.

17.11.2021 dii. 7.00 Ráddjemat máhccet máttás?

Mátta-Suoma vearrás koronadili dihte čoahkkananráddjemat leat mahcamin Mátta-Supmii ja fiesttara beallai dihto eanangottiide. Turku guvlui dat lea juo ráddjejuvvon 50 olbmuid siste.

Mearrádusat sáhttet leat vuordimis juo otne ja boahtit fábmui 25.beaivvi. Čoahkkananráddjemiid sadjái sáhttá maid mearriduvvot gáibádus koronapássas almmolaš dilálašvuođain. Koronadilli lea ovdan ráđđehusas otne.

16.11.2021 dii. 12.07 Kárášjoga koronadilli lea stáđásmuvvamin

Kárášjoga gielddas sávvet, ahte koronanjoammumat leat dál geahppáneamen gielddas. Gielda giitala (siirryt toiseen palveluun) dieđáhusastis gieldda bargiid koronadili dikšumis ja álbmoga das, ahte leat áŋgirit váldán teasttaid ja čuvvon gieldda ávžžuhusaid. Kárášjogas gávnnahedje vuossárgga dušše ovtta ođđa njoammuma.

Maiddái Guovdageainnus gávnnahedje vuossárgga ovtta koronanjoammuma. Gieldda dieđáhusa mielde (siirryt toiseen palveluun) dán olbmos lea lagas oktavuohta dan olbmui, geas lávvardaga duođaštuvvui korona, ja lea de leamaš karantenas dan rájes.

15.11.2021 dii. 13.56 Muonás leat koronanjoammumat lassánan, Eanodagas eai leat ođđa njoammumat

Muonás leat jo badjel 20 koronanjoammuma, muitala Enontekiön Sanomat -aviisa (siirryt toiseen palveluun). Buot njoammumat laktásit mannan vahkus skuvllas ja beaiveruovttus álgán epidemiijai.

Dán vahkus buot skuvlaluohkát, earret vuosttas luohkká, leat gáiddusoahpahusas ja buot mánáid astoáiggedoaimmat leat gaskkalduhtton. Boahtte vahku vuossárgga 22.11. skuvllat máhccet fas lagasoahpahussii. Skuvllas lea maid máskaávžžuhus fámus badjeskuvllas ja logahagas.

Eanodagas eai leat ođđa njoammumat.

15.11.2021 dii. 12.01 Korona njoammu ain Finnmárkkus

Vahkuloahpas leat measta buot Finnmárkku sámegielddat dieđihan ođđa koronanjoammumiin, muitala Ávvir (siirryt toiseen palveluun).

Kárášjogas leat dieđihan lávvardaga njealji ođđa koronanjoammumis. Skábmamánus Kárášjogas leat dieđihan 74 olbmos koronanjoammuma. Ávvira dieđuid mielde 34 olbmo leat ain erremis ja njeallje olbmo leat buohcceviesus dahje dearvvasvuođaguovddážis. Ášši boahtá ovdán Kárášjoga gieldda neahttasiidduin.

Lávvardaga maiddái Guovdageainnus dieđihedje ođđa koronanjoammumis. Ávvira mielde gažaldagas lei olgobáikegoddelaš olmmoš ja sus ii leat oktavuohta ovddit njoammumiidda.

Ohcejoga kránnjágielddas Deanus fas koronanjoammumat leat gávnnahuvvon árat mannán vahkus. Lávvardaga Deanu gielda dieđihii, ahte gielddas lea nubbi koronanjoammun.

Porsáŋggu gielddas koronanjoammumat leat lassánan. Lávvardaga positiivvalaš iskkus gávnnahuvvui guovtti ođđa olbmos. Porsáŋggus leat oktiibuot 21 olbmo isolašuvnnas.

12.11.2021 dii. 14.53 Muoná njoammumat lea lassánan

Eanodaga ránnjágielda Muonás koronanjoammumat leat lassánan. Muoná skuvllas gávnnahedje gaskavahku vihtta koronanjoammuma ja duorastaga gielddas ledje čieža ođđa njoammuma.

Ođđa njoammumat eai leat dušše skuvllalaččain, baicce seamma njoammunbálgái gullet maiddái eará olbmot.

Muoná skuvlla buot 2.–5. luohká oahppit leat karantenas. Guđát luohkát ja badjeluohkát vázzet skuvlla gáiddusin. Karantena ja gáiddusskuvla joatkašuvvet Muoná skuvllas boahtte vahku bearjadaga, 19.11. rádjai. Karantenas leat máŋgalot máná.

12.11.2021 dii. 13.09 Kárášjogas vihtta ođđa njoammuma

Kárášjoga gielddas Norgga bealde lea duorastaga duođaštuvvon vihtta ođđa koronanjoammuma, dieđiha gielda. Olmmošlogu ektui lea gielda okta dain gielddain olles Norggas, gos dál leavvá eanemus korona.

Gielddas leat skábmamánu vuosttas beaivvi rájes 67 olbmos duođaštuvvon covid-19-dávda. Njealjis leat dál buohcciviesus dahje buohcciidruovttus.

12.11.2021 dii. 11.12 Korona leavvá Mátta-Várjjaga gielddas

Buođggáidnjárggas (su. Pykeijä) leat gávnnahan 17 koronanjoammuma boarrásiidsiiddas maŋimuš beivviid áigge. Maiddái Báhčaveaji mánáidgárddis ja skuvllas leamaš njeallje njoammuma ja Girkonjárggas okta.

Muhtin ovttaskas njoammumiid bálgáid eai leat bastán vuos čielggadit.

Gieldda neahttasiiddus (siirryt toiseen palveluun) muitalit, ahte koronanjoammumiid meari vurdet vel lassánit čuovvovaš beivviid áigge.

11.11.2021 dii. 8.42 Kárášjogas vihtta ođđa njoammuma

Kárášjogas leat gávnnahan dál oktiibuot 59 koronanjoammuma 1.11. rájes. Gaskavahku ovdanbohte vihtta ođđa njoammuma. Njealjis leat buohcceviesus ja 18 olbmo leat beassan eret erremis. Áššis muitala NRK Sápmi (siirryt toiseen palveluun).

10.11.2021 dii. 13.44 Eanodagas okta ođđa njoammun, Muonás maid njoammumat

Eanodagas leat gávnnahan ovtta koronanjoammuma, muitala Enontekiön sanomat. Dávda ii leat njommon viidáseabbot.

Eanodaga ránnjágielddas Muonás fas navdet vuolleskuvllalaččaid gártan njoammunáitaga vuollái. Ovtta bearražis leat buohcan koronadávdda juo muhtun áigge, muhto njoammuma gávnnahedje easkka dál. Bearražis leat máŋga máná, ja danin virus soaitá leat njommon skuvllas.

Eanodaga njoammuma eai navdde laktásit Muoná njoammumiidda.

Muoná ja Eanodaga jođiheaddji doavttir Teemu Taulavuori sávvá, ahte olbmot válddášedje teasttaid herket. Son árvala, ahte dál lea ovddabealde nu gohčoduvvon koronadálvi.

– Jus it leat váldán boahkuid, de váldde. Virus ohcá álbmogis daid, geat eai leat boahkuhuvvon, ja váikkuhusat soitet leat vearrát, dadjá Taulavuori.

10.11.2021 dii. 12.46 Kárášjogas 52 njoammuma

Kárášjoga gieldda beaividuvvon dieđáhusa mielde (siirryt toiseen palveluun) gielddas leat maŋŋebárgga rádjai gávnnahan 52 njoammuma. Okta buohcciin lea buohcceviesus, ja guovttis leaba beassan eret erremis.

9.11.2021 dii. 18.04 Kárášjogas juo oktiibuot 50 njoammuma

Kárášjogas lea maŋŋebárgga gávnnahan vihtta ođđa koronanjoammuma, dieđiha Kárášjoga gielda (siirryt toiseen palveluun). Njoammumat leat dál oktiibuot 50. Okta buohcciin lea dolvojuvvon buohccevissui. Buohccán olbmuin bealli lea boahkuhuvvon.

9.11.2021 dii. 9.00 Kárášjogas ođđa njoammumat – Guovdageainnu koronadilli stáđásmuvvame

Kárášjoga gielddas leat gávnnahan ain ođđa koronanjoammumiid. Vuossárgga áigge gielddas duođaštuvvojedje čieža ođđa njoammuma, muitala NRK Sápmi (siirryt toiseen palveluun). Kárášjoga koronadilli lea hedjonan sakka maŋemuš vahkku áigge ja vahkkoloahpas gielddas gávnnahedje oktiibuot 38 njoammuma buot ahkásaččaid gaskkas.

Guovdageainnu koronadilli fas orru stáđásmuvvame. Suohkan dieđiha neahttasiiddustis (siirryt toiseen palveluun), ahte maŋemuš golmma beaivái eai leat šat boahtán ođđa njoammumat ovdan. Guovdageainnu váldodoavttir Anne Lajla W. Kalstad goit bivdá guovdageaidnulaččaid leat várrugasat, jus johtet lagaš guovlluin Kárášjogas, Álttás ja Romssas.

Guovdageaidnu lea maid ávžžuhan, ahte suohkana bargit eai galggaše oassálastit čoahkkimiidda Álttás, Kárášjogas ja Romssas guovtte vahkkui dás ovddasguvlui.

Mannan vahkkus Guovdageainnus gávnnahedje 11 koronanjoammuma.

8.11.2021 dii. 15.38 Ohcejoga olbmuid ávžžuhit garvit Kárášjogas fitnama, jos beare vejolaš

Ohcejoga gielda ávžžuha dieđáhusastis (siirryt toiseen palveluun), ahte gieldda olbmot eai finaše Kárášjogas ja ahte sii válddihivčče teastta jo láivves dávdamearkkaid geažil. Ohcejoga kránnjágielddas Kárášjogas leat 38 olbmo erremis koronavirusinfekšuvnna dihtii.

Gielda ávžžuha garvit Kárášjogas fitnama, jos beare vejolaš. Daid Kárášjogas fitnan olbmuid, geat eai leat boahkuhuvvon korona vuostá dahje geain lea beare nubbi boahkuhus, ávžžuhit fitnat koronateasttas Ohcejoga gildii máhcadettiin ja nuppi koronateasttas 3–5 jándora máhccama maŋŋá. Dan botta ávžžuhit geavahit máskka buot ruovttu olggobeale johtimiin ja fuolahit maid buorre giehtahygienas.

Daid, geat johtet rájá rastá jeavddalaččat ovdamearkka dihtii barggu geažil, ávžžuhit fitnat koronateasttas sullii oktii vahkus. Ávžžuhus ii guoskka daid, geat leat boahkuhuvvon guktii korona vuostá. Sii eai dárbbaš fitnat teasttas.

Gieldda dieđáhusas maiddái muittuhit, ahte jo láivves koronadávdamearkkaid geažil galgá fitnat koronateasttas nu jođánit go vejolaš.

– Dát guoská maid sin, geat leat boahkuhuvvon guktii korona vuostá. Bargui, skuvlii dahje beaiveruktui ii galgga mannat, jos leat infekšuvnna dávdamearkkat, čuožžu gieldda dieđáhusas.

8.11.2021 dii. 11.34 Kárášjogas 38 njoammuma, Guovdageainnus ovccis sirrejuvvon

Koronadilli lea vearránan hui jođánit maŋimuš vahku áigge Norgga bealde ja maiddái Suoma ránnjágielddain Kárášjogas ja Guovdageainnus.

Kárášjoga gielddas leat sotnabeaivvi eahket rádjai ovdanboahtán 38 njoammuma buot ahkásaččaid gaskkas. Sis bealli lei boahkuhuvvon korona vuostá. Dávda lea njommon dearvvašvuođa- ja dikšunbálvalusaid bargiide ja kundariidda ja maiddái skuvlaahkásaš mánáide, muitala Kárášjoga gielda neahttasiiddustis (siirryt toiseen palveluun).

Guovdageainnus fas ovccis leat sirrejuvvon koronanjoammuma geažil, muitala Guovdageainnu gielda (siirryt toiseen palveluun). Lávvardaga leat mannan háve ožžon dieđu golbma njoammumis. Buohkaid njoammunbálggis lea dieđus.

Maiddái Porsáŋggu gielddas leat dál 27 olbmo isolašuvnnas, muitala NRK Sápmi (siirryt toiseen palveluun).

Yle Ođđasiid Sámis ja Beaivvi ságaid sáhtát maid guldalit Yle Areenas.

Ođđasamosat