Njuike sisdoaluide

Vuohču skuvla heajos ortnegis: Soađegili gieldda čielggadanjoavku evttoha jođánis divodemiid

Jus skuvlla sisáibmodilli vearrána, de dearvvašvuođaeiseváldi sáhttá ráddjet dahje juobe gieldit geavaheamis skuvlla.

Vuohču skuvllas leat sisáibmováttisvuođat. Govva: Kirsti Länsman/Yle

Vuohču skuvlla galggašii divodišgoahtit jođánepmosit, vai skuvladoaimma sáhttet joatkit dálá skuvlalanjain. Nu evttoha Soađegili gieldda čielggadanjoavku, mii lea gárten Vuohču skuvlla dili giđa 2020 rájes.

Gieldda čielggadeami mielde Vuohču skuvla lea heajos ortnegis. Divodemiiguin skuvlavistti sáhttet goit ain geavahit dassážii, go ođđa dahje ođaduvvon sajit leat anus, evttoha čielggadanjoavku.

Gielddaráđđehusa áššelisttu duogášdieđuid mielde dearvvašvuođaeiseválddit čuvvot Vuohču skuvlla dili dárkilit, dasgo sihke oahppit, oahpaheaddjit ja eará skuvlla geavaheaddjit leat ožžon sisáimmus váttuid.

Jus skuvlla sisáibmodilli vearrána, de dearvvašvuođaeiseváldi sáhttá ráddjet dahje juobe gieldit geavaheamis skuvlla. Dalle gielda ferte jođánit bastit divvut skuvlla dahje ordnet gaskaboddosaš lanjaid skuvladoaimma várás.

Soađegili gielddaráđđehus gieđahallá Vuohču skuvlla dili odne vuossárgga čoahkkimisttis.

Yle Ođđasiid Sámis ja Beaivvi ságaid sáhtát maid guldalit Yle Areenas.