Njuike sisdoaluide

Vuohččulaččat ballet, ahte sadjásaš skuvlavistin dárkkuhuvvon modulaskuvllas šaddá gili ođđa bissovaš skuvla

Soađegili modulaskuvlla háliidit sirdit Vuhččui čuovvovaš lohkanbadjái veahkehit sisáibmováttisvuođain. Gielddaráđđehusa plána mielde sadjásaš skuvlavisttis šattašii Vuohču ođđa, bissovaš skuvlavisti. Vánhema mielas dat lea balddihahtti.

Vuohččulaš Inga Äärelä vuordá, ahte su ruovttugillái plánegoahtit čuovvovaš jagiid áigge ođđa skuvlavistti. Govva: Sara Kelemeny / Yle

Vuohču skuvllas leat gillán máŋggaid jagiid sisáibmováttisvuođain. Dán vahkus Soađegili gielddaráđđehus mearridii, ahte Vuohču skuvla oktavuhtii sirdet nu gohčoduvvon modulaskuvlavistti, man laktet oktii máŋggadoaimmadáluin. Gielddaráđđehus evttoha, ahte Vuohču dálá skuvlavisttis burget muhtin osiid dahje juo obban, vai modulaskuvlla sáhttá laktit skuvlla máŋggadoaimmadálu nappo lihkadansále oktavuhtii.

Soađegili gieldda čuvgehuslávdegoddi ordnii ságastallandilálašvuođa skuvladilis ja gielddaplánain Vuohčus duorastaga.

Gielddaráđđehusa plánat váldojuvvojedje baluin vuostá Vuohčus. Vuhččui leat juo máŋggaid jagiid sávvan ođđa skuvlavistti, ja danin gili olbmot balletge, ahte sadjásaš modulavisttis šaddá boahtteáiggis bissovaš čoavddus.

– Orru balddihahtti, ahte boahtágo midjiide dat ođđa skuvla, vai leago dat ráidodállu, mas boahtá deike min albma skuvlan, imaštallá vuohččulaš váhnen Inga Äärelä.

Soađegili čuvgehuslávdegoddi ordnii ságastallandilálašvuođa Vuohču skuvlla boahtteáiggis. Govva: Sara Kelemeny / Yle

Skuvlavisti lea gili guovddášbáikki

Vássán moatti jagi siste Vuohču skuvla boahtteáiggi leat guorahallan olu. Soađegili gieldda fuones ruhtadili dihte gielddas evttohedje mannán jagi Vuohču badjedási sirdima 90 kilomehtera duohkái Soađegili girkosiidii. Dat plána goittotge šluhttejuvvui.

Vuohču skuvlla lea olles gili deaivvadanbáikki. Govva: Sara Kelemeny / Yle

Vuohččulaččat leat vuordán juo guhká, ahte gillái huksešedje ođđa skuvlavistti. Vuohču skuvllas leat 30 oahppi ja einnostusaid mielde ohppiid mearri bissu boahtteáiggis seammá dásis. Skuvladoaimmaid lassin skuvlagiddodat lea gili olbmuid geavahusas beaivválaččat earret eará searvedoaimmain.

Inga Äärelä sávvá, ahte Vuohču skuvllalaččat ja bargit ožžot nu jođánit go vejolaš sadjásaš sajiid skuvladoaimmaide ja dán maŋŋá leage áigi plánet ođđa skuvlavistti.

– Gal mii dárbbašit ođđa skuvlla, ahte dál boahtá diekkár boddu dasa. Go dat sadjásaš modulavisti boahtá, de lea fas áigi smiehttat, dadjá Äärelä.

Čuvgehuslávdegoddi cealká áššis, gielddaráđđehus mearrida

Duorastaga čuvgehuslávdegotti ordnen dilálašvuođas gili olbmuid oaivil lei čielggas. Vuohččulaččat eai duđa gielddaráđđehusa plánaide.

Lávdegotti ságadoalli Viljo Pesonen lei goittotge duđavaš ordnejuvvon ságastallandilálašvuhtii.

Soađegili čuvgehuslávdegoddi cealká áššis boahtte vahku álggus, man maŋŋá ášši sirdása gielddaráđđehusa háldui.

– Dáppe ledje hui vuđolaš oainnut iešguđetlágan áššiin. Fuollan lei, ahte mo oažžut jođánis čovdosa dán váttisvuhtii, amas mánát dárbbašit heajos sajiin leat, dadjá Pesonen.

Čuvgehuslávdegotti ságadoalli Viljo Pesonen jođihii ságastallama skuvllavisti boahttevuođas. Govva: Sara Kelemeny / Yle

Pesonen deattuha, ahte čuvgehuslávdegoddi áigu muitalit vuohččulaččaid oainnuid muittuhančállagisttis.

– Gielddaráđđehusa mearrádusa sáhttá duođaid dulkot nu, ahte modulas šaddá deike bissovaš čoavddus. Ságastallamiin bođii čielgasit ovdan, ahte gili olbmot ja váhnemat háliidit, ahte muhtun áigetávvaliin deike huksejuvvošii ođđa skuvlavisti ja modulaskuvla buktojuvvo dušše sadjásašvistin, čohkke Pesonen ságastallama oktii.

Čuvgehuslávdegoddi cealká áššis boahtte vahkus, man maŋŋá ášši máhccá gielddaráđđehusa gieđahallamii. Pesonen ávžžuha dál vuohččulaččaid váldit oktavuođa gielddaráđđehusa lahtuide.

– Dál vuohččulaččaid gánnehivčče váldit oktavuođa sidjiide ja buktit oaiviliiddiset ovdan, lasiha Pesonen.

Gielddaid visttiid sisáibmováttisvuođain gárvánii gieskat dutkamuš. Turku universitehta ođđa dutkamuša mielde sisáibmováttisvuođain gillán visttiid gánnehivččii divvut áiggil, muđui gielddaide soaitá šaddat guovttegeardásaš rehket. Dutkamuša guovddáš boađus lei, ahte sisáibmováttisvuođaid eastimii dárbbašit eanet ovddalgihtii plánema

Beaivvi ságaid ja Yle Ođđasiid Sámis sáhtát maid guldalit Yle Areenas.