Avvilis boastta sáhttá gártat vuordit gitta logi rádjái eahkedis – Eanodagas ja Ohcejogas eanaš báikkiin boasta joavdá veaigin

Boastta boahtin ságastahttá davvin go muhtin giliin olbmot vurdet beaivvi áviissaid ja reivviid gitta eahket rádjái ovdalgo poasta goaikkeha gássii. Avvilis boasta galgá joavdat áššehasa lusa maŋimustá eahket logi áiggi.

Avvillaš Markku Ahonen oažžu beaivvi aviissa eahkes logi sulaid boastagássii. Govva: Jarmo Siivikko / Yle

Avvillaš Markku Ahonen muitala, ahte son lea máŋga eahkeda vuordán beaivvi aviissaid ja eará boastta oalle maŋŋit. Son ássá golmma kilomehtera duohkin dan báikkis, gosa boasta beaivet čohkkejuvvo ovdalgo dan vulget juohkit olbmuid boastakássaide.

Vaikko nie lahka ásságe gili, de máŋgii beaivvi boasta báhcá Ahosis oainnekeahttá.

– Máŋgga eahkeda lea geavvan nu, ahte in leat viššan gitta ija rádjái fáktet, goas dat boasta joavdá. Lean dasto iđđes viežžan aviissa vai lea leamaš iđitgáffebeavddis aviisa, vaikko dat leage leamaš ovddit beaivve bláđđi, muhto leaba goittotge, son deattasta.

Inarilainen juhkkojuvvo boastta fáro diŋgojeaddjiide. Govva: Jarmo Siivikko / Yle

Avvilis boastajuohkimis leamaš dán čavčča čuolmmat, mieđiha poastta Davvi- ja Nuorta-Suoma guovlohoavda Ari Korhonen. Korhonen čilge, ahte Avvila gilis boastta leat dássážii juohkán guvttiin olbmuin ja ulbmil leamaš álot oažžut poastta olbmuid gássaide maŋimustá diibmu logi eahkes.

Juovllaid ovddabealde boasta lea áigumin bálkáhit Avvilii ovtta ođđa boastajuohkki ja bidjat Avvila gillái goalmmát boastaruvtta vai dilli šattašii buoret.

– Galhan dat lea ádjánan menddo guhkes áiggi ja leatge guorahallan dan, mo sáhtášeimmet vástidit dárbbuide. Vuossárgga rájes váldit geavahussii goalmmát juohkinruvtta ja dan bokte geahččat, ahte beassatgo mii buorit bohtosii.

Ari Korhonen dadjá, ahte boasta áigu lasihit ovdal juovllaid bargiid Avvilii boastajuohkimii. Govva: Jarmo Siivikko / Yle

Korhonen ii leat velá áibbas sihkkar leago goalmmát juohkinruvtta bissovaš čoavddus Avvilis vai leago dat geavahusas dušše dál ovdal juovllaid.

– Boasttas guorahallet ain dihto gaskkaid juohkinruvttaid dárbbuid. Dál livčče áigumuš boahtte jagi bealde guorahallat juohkinruvttaid maid Avvila oasil, čilge Korhonen.

Dáid boastagássaide Avvila guovddážis Euronics-dálus boasta juhkkojuvvo sulaid logi áigge eahkes. Gássat leat dálá boastaruvttaid maŋimuš báikkit. Govva: Jarmo Siivikko / Yle

Eanodagas boasta joavdá veaigin

Anára gielddas Avvila gilis boasta ádjána ja ádjána. Eanaš báikkiin Ohcejoga gielddas beaivvi boasta joavdá eahkedis. Eanodagas gal eai gártta boastta vuordit nu guhká go Markku Ahonen Avvilis.

Marketta Nilsen Eanodaga Heahtás muitala iežas oažžut boastta juo njealji sulain veaigin.

– Lean veháš imaštallan, ahte olbmot váidalit boastta johtimis. Lean hárjánan dasa, ahte boasta boahtá eahketbeaivve. Dat lea álot boahtán veaigin ja dálge dat joavdá juo diimmu ovdal go moadde jagi dassái.

Marketta Nilsen bárdni Mihku Näkkäläjärvi dadjá iežas áddet boastta mohkiid go boastajuohkkit galget bastit johttát dálkkis go dálkkis.

Dálvit dát lea njulgestaga hástaleaddji bargu, árvala Näkkäläjärvi.

–Munnje das ii leat nu stuorra mearkkašupmi, goas dat boasta boahtá, go beare goas nu joavdá. Gal daid rehkegiid geargá geahččat maŋŋelis eahkesge. Álot in láve muitit fitnatge boastagássa luhtte.

Boastajuohkki barggustis Avvila boasttas čakčat 2021. Govva: Jarmo Siivikko / Yle

Boastaláhkii boahtimin nuppástusat – boastta juohkin šaddamin golmmabeaivásažžan vahkus

Boastaláhkii leat válbmemin nuppástusaid. Ráđđehus galggašii addit boastaláhkii nuppástusevttohusa boahtte jagi álggus. Johtolat- ja gulahallanministeriija lea juo sádden evttohusa cealkinláhkái.

Láhkahápmosis evttohit sirdásit golmmabeaivásaš boastajuohkimii ja -čoaggimii. Dálá boastalágas almmolašbálvalusa juohkingeatnegasvuohta lea viđabeaivásaš. Dálá láhkage diktá goittotge hárvvit boastajuohkima dakkár guovlluin, gos aviissaid iđitjuohkin lea eará láhkái ordnejuvvon.

Ođđa boastalágas leat gidden fuomášumi boaittobealguovlluid dillái earenoamážit aviissaid juohkimis. Hápmosis evttohit mearreáigásaš stáhtadoarjaga aviissaid juohkimii viđa beaivái vahkus dakkár guovlluide, gos ii dál leat aviissaid juohkin árraiđidiid ja gos iđitjuohkin ii leat ekonomalaččat gánnihahtti.

Boastta guovlohoavda Ari Korhonen ii dálá dilis velá kommentere, mo boastalága nuppástusat bohtet čuohcat davás. Son goit namuha, ahte siige fertejit dan guorahallat boahtte jagi bealde.

– Dan maŋŋá go mearrádus boahtá, de dalle fertet guorahallat juohkinruvttaid nu, ahte dat bálvalivčče áššehasaid, namuha Korhonen.

Beaivvi ságaid ja Yle Ođđasiid Sámis sáhtát maid guldalit Yle Areenas.