Unna Junná juovlâkalenderist párnááh liäibuh já kuálásteh já Hitruus Ruu ocá juovlâstáálu – luŋkáh lekkâseh Yle Areenast

Juovlâkalender almostuvá Yle Areenan jyehi peeivi juovlâmáánu vuossâmuu peeivi rääjist juovlâááptun räi. Kalenderist uáinip párnái rähtim videoid, viälppái Ráffe já Ruu juovlâfiäránijd já meid mii tábáhtuvá Unna Junná kuvviimijn.

Unna Junná
Unna Junná juovlâkalender vuosmuš luŋkká lekkâs juovlâmáánu vuosmuu peeivi. Taan ive váldukielân lii anarâškielâ.
Kuldâl maid Heli Huovinen muštâl Unna Junná juovlâkalenderist.

Yle Säämi párnáiohjelm Unna Junná juovlâkalender almostuvá Yle Areenan juovlâmáánu vuossâmuu peeivi rääjist juovlâááptun.

– Jyehi peeivi lekkâs uđđâ luŋkká já puátá uđđâ uccâ ohjelm Yle Areenan já Párnái Areenan, muštâl Yle Säämi párnáiohjelmij pyevtitteijee Heli Huovinen.

Unna Junná juovlâkalender máccá muádi ive puudâ maŋa já taan tove párnái juovlâ- já tälvitooimah láá juovlâkalender kuávdáást.

Korona keežild Unna Junná ij peessâm kuvviđ párnái pááikán, já nuuvtpa párnááh láá kuvvim videoid juovlâkalenderân jieijah pääihist. Puoh fiilmah pessii fáárun juovlâkalenderân.

– Mij ožžuim hirmâd ennuv fiilmâid. Tot lii tot vuáđu, mon oolâ mij lep huksim tom juovlâkalender, muštâl Huovinen.

Juovlâkalenderist peessâp čuávvuđ ovdâmerkkân tom, ko párnááh čiŋâtteh juovlâmuorâ, liäibuh piparkááhuid já rähtih juovlâheervâid. Fáárust lii meid uággum já juoŋâstem já poccui já hiäppušij piemmâm.

– Meid elleeh láá teháliih párnáid, muštâl Huovinen.

Juovlâkalenderist fáárust meid viälppáh Ráffe já Ruu já Unna Junná fiäráneh

Kalenderist uáinip párnái rähtim videoi lasseen meid viälppái Ráffe já Ruu juovlâfiäránijd já mii tábáhtuvá Unna Junná kuvviimijn.

– Viälppái maailmist láá juovlah, Ruu ocá juovlâstáálu já Ráffe imâštâl juovlâskeeŋkâid, muštâl Heli Huovinen.

Kalenderist kullojeh anarâš-, nuorttâlâš- já tavesämikielâ. Moonnâm tove juovlâkalender váldukielân lâi pajekielâ, mutâ tääl lii anarâškielâ vuáru. Huovinen arvâl, ete čuávuvâš kalenderist lii nuorttâlâškielâ vuáru.

– Tast piäsá kuovlâliđ párnái maailmân, et mii sijjân lii tehálâš juovlâi ääigi. Lii lamaš suotâs finniđ fiilmâid puoh sämikielâin.

Unna Junná juovlâkalender puáhtá keččâđ Yle Areenast pirrâ maailm. Juovlâkalender algâanimaatio lii ráhtám Jukka Vuorela já muusik Lasse Korpi.

Ive 2019 juovlâkalender puávtáh keččâđ meid Yle Areenast.

Kuldâl lase anarâš saavâid tääbbin.