Vuosttas luŋká rahpasa! Unna Junná juovlakaleandaris oaidnit mánáid govven videoid ja vielpáid juovlafearániid

Juovlakaleandar almmustuvvá Yle Areenai juohke beaivve juovlamánu vuosttaš beaivve rájes gitta juovlaruohta rádjái. Kaleandaris oaidnit mánáid ráhkadan videoid, vielpáid Ráffe ja Ruu juovlafearániid ja mii dáhpáhuvvá Unna Junná govvemiin.

Unna Junná
Unna Junná juovlakaleandar vuosttaš luŋká rahpasa juovlamánu vuosttaš beaivve. Dán jagi váldogiellan lea anárašgiella.
Guldal maid Heli Huovinen muitala Unna Junná juovlakaleandaris.

Yle Sámi mánáidprográmma Unna Junná juovlakaleandar almmustuvvá Yle Areenai juovlamánu vuosttaš beaivve rájes gitta juovlaruohta rádjái.

– Juohke beaivi rahpasa ođđa luŋká ja boahtá ođđa unna prográmma Yle Areenai ja Mánáid Areenai, muitala Yle Sámi mánáidprográmmaid buvttadeaddji Heli Huovinen.

Unna Junná juovlakaleandar ii leat almmustuvvan moatte jahkái. Dán vuoro mánáid juovla- ja dálvedoaimmat leat juovlakaleandara guovddážis.

Korona geažil Unna Junná ii beassan govvet mánáid ruovttuide, ja nuba mánát leat govven videoid kaleandarii iežaset ruovttuin. Buot filmmat besse fárrui kaleandarii.

– Mii oaččuimet hui olu filmmaid. Dat lea dat vuođđu, man ala mii leat huksen juovlakaleandara, muitala Huovinen.

Juovlakaleandaris beassat čuovvut ovdamearkka dihtii dan, go mánát čiŋadit juovlamuora, láibot bihppargáhkuid ja ráhkadit juovlačiŋaid. Dasa lassin videoin mánát oggot ja juoŋastit ja bibmet bohccuid ja heasttaid.

– Eallit leat dehálaččat mánáide, dadjá Huovinen.

Juovlakaleandaris fárus maid vielpát Ráffe ja Ruu ja Unna Junná fearánat

Kaleandaris oaidnit mánáid ráhkadan videoid lassin vielpáid Ráffe ja Ruu juovlafearániid ja mii dáhpáhuvvá Unna Junná govvemiin.

– Vielpáid máilmmis leat juovllat, Ruu ohcá juovlastálu ja Ráffe imaštallá juovlaskeaŋkkaid, muitala Heli Huovinen.

Kaleandaris gullo sihke anáraš-, davvisáme- ja nuortalašgiella. Mannan háve juovlakaleandara váldogiellan lei davvisámegiella, muhto dál lea anárašgiela vuoru. Huovinen árvala, ahte čuovvovaš kaleandaris lea nuortalašgiela vuoru.

– Das beassá guovlalit mánáid máilbmái, ahte mii sidjiide lea dehálaš juovllaid áigge. Lea leamaš suohtas oažžut filmmaid buot sámegielaide.

Unna Junná juovlakaleandara sáhttá geahččat Yle Areenas birra máilmmi. Juovlakaleandara álgoanimašuvnna lea ráhkadan Jukka Vuorela ja musihka Lasse Korpi.

Maiddái jagi 2019 juovlakaleandara sáhttá geahččat Yle Areenas.

Beaivvi ságaid ja Yle Ođđasiid Sámis sáhtát guldalit Yle Areenas.