Unna Junná rosttovkaʹlndaarâst čuäʹjtet päärnai rosttov- da täʹlvvtååuhaid da jeeʹres šeikkmõõžžid: luuŋk ävvne Yle Areenast

Rosttovkaʹlndar iʹlmstââvv Yle Areenaaʹje juõʹǩǩ peeiʹv rosttovmannu vuõssmõs peeiʹv rääʹjest rosttovkäänan räjja. Kaʹlndaarâst vueiʹnet päärnai tuejjeem videoid, veâlppsi Ráffe da Ruu rosttovšõddmõõžžid da mii šâdd, ko fiʹlmmjet Unna Junná.

unna junn nuortt (2).jpg
Unna Junná rosttovkaʹlndaar vuõssmõs luŋkk ävvan rosttovmannu vuõssmõs peeiʹv. Taʹnni väʹlddǩiõllân lij aanrõšǩiõll.
Kuvddâl, mâid Heli Huovinen mušttal Unna Junná rosttovkaʹlndaarâst.

Yle Sääʹm päärnaiprogramm Unna Junná rosttovkaʹlndar iʹlmstââvv Yle Areenaaʹje rosttovmannu vuõssmõs peeiʹv rääʹjest rosttovkäänan räjja.

– Juõʹǩǩ peeiʹv ävvan ođđ luŋkk da ođđ prograammâž puättYle Areenaaʹje da Päärnai Areenaaʹje, mušttal Yle Sääʹm päärnaiprograammi puuʹtʼteei Heli Huovinen.

Unna Junná rosttovkaʹlndar ij leäkku iʹlmstõõvvâm mueʹdd eeʹjj sizz. Tän vuâra päärnai rosttov- da täʹlvvtååim lie rosttovkaʹlndaar väʹlddteeʹmm.

Korona diõtt Unna Junná ij piâssâm fiʹlmmjed päärnai põõrtid, da nuʹtt-ba päärna lie fiʹlmmjam videoid kaʹlndaaʹre jiijjâz põõrtin. Puk fiiʹlm peäʹsse mieʹldd kaʹlndaaʹre.

– Mij vuäǯǯaim samai jiânnai fiiʹlmid. Tõt lij tõt vuâđđ, koon ool mij leäʹp raajjâm rosttovkaʹlndaar, maainast Huovinen.

Rosttovkaʹlndaarâst piâzzât seuʹrrjed ouddmiârkkân tõn, ko päärna raakkte rosttovmuõr, leiʹbbje preʹnnǩid da tuejjee rosttovhieʹrvid. Tõn lââʹssen videoin päärna vuägga da juŋstâʹlle da poorte puõccuid da heäppšid.

– Jieʹlli lie vääžnai päärnaid, särnn Huovinen.

Rosttovkaʹlndaarâst lie mieʹldd še veâlppaz Ráffe da Ruu di Unna Junná šõddmõõžž

Kaʹlndaarâst vueiʹnet päärnai tuejjeem videoi lââʹssen veâlppsi Ráffe da Ruu rosttovšõddmõõžžid da mii šâdd, ko fiʹlmmjet Unna Junná.

– Veâlppsi maaiʹlmest lie rosttov, Ruu ååcc rosttovkällaz da Ráffe õõmtââšš rosttovsǩiâŋkid, mušttal Heli Huovinen.

Kaʹlndaarâst kollai nuʹtt aanarsääʹm-, tâʹvvsääʹm- ko še nuõrttsääʹmǩiõll. Mõõnni vuâra rosttovkaʹlndaar väʹlddǩiõllân leäi tâʹvvsääʹmǩiõll, leâša ååʹn lij aanarsääʹmǩiõl vuârr. Huovinen arvval, što pueʹtti kaʹlndaarâst lij nuõrttsääʹmǩiõl vuârr.

– Tõʹst peäss kuâbsted päärnai maailma, što mii siʹjjid lij vääžnai rosttvi ääiʹj. Lij leämmaž hääʹsǩ vuäǯǯad fiiʹlmid puk sääʹmǩiõlid.

Unna Junná rosttovkaʹlndaar vuäitt ǩiõččâd Yle Areenast pirr maaiʹlm. Rosttovkaʹlndaar algganimaatio lij tuejjääm Jukka Vuorela da musiikk Lasse Korpi.

Eeʹjj 2019 rosttovkaʹlndaar vuäitt še ǩiõččâd Yle Areenast.

Jåårǥlâttam Tiina Sanila-Aikio