Norgga boles bisseha dál buot biillaid, mat bohtet Suomas – ođđa ráddjehusat gáibidit riikiiboahtinalmmuhusa

Riikiiboahtinalmmuhusa ferte dahkat, jus áigu rasttildit rájá Suomas Norgii. Dan lassin gáibiduvvo juogo negatiivalaš koronateastaboađus dahje koronapássa.

Kárášjoga leansmánnekántuvrras leat bolesat boahtán dárkkistit biilavuoddjiid Suoma rájá lahkosii. Thor Martin Balto lei bisseheamen biillaid vuossárgga 29.11. Govva: Sara Kelemeny / Yle

Norga lea mannan vahkus fas čavgen rádjerasttildannjuolggadusaid. Dábálaš olmmoš illá šat orru oba bissomin maŋisge go njuolggadusat rivdet dál koronaáigge olles áigge.

Mauri Portimo orru Kárášjogas ja johtá barggus Gáregasnjárggas. Su eai leat gal koronaráddjehusat váivvidan, go vuos oahpai rutiinnaid, mo johtit ja makkár duođaštušat galget leat fárus.

Buohkaid dihtosii ođđa ráddjehusat eai goittot leat ollen ja máŋggalágan ságat johtet gilis.

– Eandalit boarrasut olbmot leat šaddan eambo várrugasat johtit rájá rastá. Máŋggat báhcet ruoktot. Bargoolbmot gal leat hárjánan rasttildit rájá, muitala Portimo.

Mauri Portimo Karigasniemellä.
Doaimmaheaddji Sara Kelemeny jearahalai Mauri Portimo Ylen aamu-prográmmii maŋŋebárgga 30.11.2021.

Norgga rájá alde buot Suomas boahtti biillat vuot bissehuvvojit korona dihte. Erenomáš dárkki leat das, ahte buohkat leat dahkan riikiiboahtinalmmuhusa. Registeren lea bákkolaš ja dan galgá dahkat, jus áigu rasttildit rájá Suomas Norgii.

Dan lassin gáibiduvvo juogo negatiivvalaš koronateasttaboađus dahje koronapássa. Dárkkisteamit bohte fápmui mannan bearjadaga. Biillat bissehuvvojit dál viššalit erenomážit registerema dárkkisteame dihte.

– Mii Norgga politiijas leat dál ožžon dieđu, ahte mii galgat dál kontrolleret biillaid, mat bohtet Suomas Norgii, ja juohke biila kontrollerejuvvo dan dihte go mii galgat oaidnit, ahte buohkat leat čađahan dan registerema, muitala Thor Martin Balto Kárášjoga leansmánnekántuvrras.

Norgga rájá alde buot Suomas boahtti biillat vuot bissehuvvojit korona dihte, ovdamearkan Gáregasnjárgga rádjerasttildanbáikkis lea Norgga boles vuordimin biilavuoddjiid go vudjet šalde geahčái. Govva: Sara Kelemeny / Yle

Mauri Portimo ii unohaste ođđa njuolggadusa registeremis, dat ii leat su mielas nu váttis go sáhtášii jurddašit.

– Dan lea álki luđestit telefonii ja eiddo gieskat gulastin, ahte registerema sáhttá fitnet čieža beaivái hávális, muitala Portimo.

Son ii jáhke, ahte ráddjehusat nohket ja jávket lagamus áiggiin gal.

– Stuorámus ballu lea, ahte dát dilli bistá vel guhká. Goit dassážii go buot olbmot leat ožžon boahkuhusa ja, ahte dát dávda meroštallo muhtin beaivve dábálaš nuorvvodávdan, smiehtada Portimo.

Beaivvi ságaid ja Yle Ođđasiid Sámis sáhtát maid guldalit Yle Areenas.

Divvojuvvon 30.11.2021 diibmu 15.28: ovtta cealkaga sátnehápmi lea dárkkálmahttojuvvon.

Divvojuvvon 1.12.2021 diibmu 9.20. Áššis muitaluvvui, ahte riikiboahtinalmmuhusa ferte dahkat golbma jándora ovdal, go áigu rájá rasttildit Suomas Norgii. Dat ii doala deaivása, go riikiboahtinalmmuhusa sáhttá dahkat rasttildettiin rájá dahje 72 diimmu ovdal rasttildeami.

Ođđasamosat