Anára girkosiidda skuvlafidnu ovdána

Anára váldostivra galgá čuovvovažžan mearridit huksejuvvogo Anára girkosiidii ođđa skuvla. Váldostivra galgá dahkat áššis prinsihpamearrádusa jagiid 2022–2024 ruhtadoalloplánas.

Anára girkosiidda boares skuvla lea huksejuvvon 1965 ja doppe leat gillán jo máŋga jagi sisáibmováttisvuođain. Govva: Sara Wesslin / Yle

Anára girkosiiddas leat jo guhkká gillán sisáibmováttisvuođain. Sisáibmodutkamušaid dahke loahppajagi 2018. Gávnnahedje, ahte dálu sisáimmus ledje menddo ollu skoađastanulluin luovvanan bázahusat ja ahte vistti vuođus leat mikrobat.

Anára gielddaráđđehus evttoha skuvlafidnu ollašuhttináigin 2022–2024. Anára gielddaráđđehus gieđahalai ášši vuossárgga ja evttohii váldostivrii, ahte dat várrešii skuvlla huksemii ruđa bušeahtas.

Anára girkosiidda ođđa skuvlla huksen boađášii máksit váile 10 miljon euro. Plána mielde ođđa skuvla huksejuvvošii seamma sadjái go dálá skuvla. Skuvlalanjaid lassin plánain lea hukset lášmmohallanbáikki, lanjaid sosiála- ja dearvvašvuođadoaimmaide, kievkkana, dáiddaoahppoávdnasiid lanjaid ja vel báikki nuoraid doaimmaide.

Skuvlla sturrodahkan árvalit sullii 3500 njealjehasmehtera. Dat lea váile goalmmádas Avvila ođđa skuvlaguovddáža sturrodagas. Anárii plánegohte ođđa skuvlla jagis 2019.

Beaivvi ságaid ja Yle Ođđasiid Sámis sáhtát maid guldalit Yle Areenas.