Lappi lihttu sirddii sámekultuvrra oasi Lappi-soahpamuša mielddusin – Anni Koivisto sávvá, ahte Lappi lihttu čatnasa goit ovddidit sámeáššiid

Lappi lihtu stivra lea dohkkehan Lappi-soahpamuša, muhto sámekultuvrra oassi šattai dušše mielddusin nu mo ovdditge jagiid. Sámedikki várreságadoalli Anni Koivisto sávvá, ahte sámeáššit eai goittot govssahala dan dihtii.

Sámedikki várreságadoalli Anni Koivisto sávvá, ahte boahttevuođas livčče buoret ovttasbargu Lappi lihttu ja Sámedikki gaskkas. Govva: Kirsti Länsman / Yle
Guldal maid Sámedikki várreságadoalli Ánne Koivisto jurddaša áššis.

Lappi lihtu stivra dohkkehii vuossárgga Lappi-soahpamuša binná rievdadusaiguin.Seammás sámekultuvrra oassi bázii soahpamuša mielddusin Lappi lihtu ráđđehusa mearrádusa mielde.

Soahpamuša sámekultuvrra oasi lea válmmaštallan Sámediggi, muhto das leamašan ovttasbargu Lappi lihtu virgeolbmuiguin. Sámedikki várreságadoalli Anni Koivisto mielas livčče lean somá, juos sámekultuvrra oassi livčče beassan albma oassin soahpamušas.

– Sávan, ahte dat ii goittotge oaivvil dan, ahte Lappi lihtu doaibmit eai livčče čatnasan ovddidit maiddái sámiid guoski áššiid dán válgabajis.

Koivisto dadjá, ahte sámekultuvrra oasi sirdin sáhttá addit váivves gova sápmelaččaide das, ahte sámiid áššit eai mearkkaš nu olu.

– Sávan dan, ahte ovttasbargu Lappi lihtu ja Sámedikki gaskkas livčče boahttevuođas buoret ja sáhtášeimmet ovttasbarggus ovddidit daid áššiid.

Lappi-soahpamuš lea Lappi lihtu soahpamuš, mii sisttisdoallá eanangotteprográmma jagiide 2022–2025 ja eanangotteplána gitta jahkái 2040. Soahpamušain mearridit eanangotti strategalaš ovddideamis ja ruhtademiid geavaheamis.

Seppänen: Sámekultuvrra oassi geatnegahttá Lappi lihtu maid mielddusin

Lappi lihtu ráđđehusas ii leamašan vejolašvuohta politihkalaš ságastallamii Sámedikki oasi sisdoaluin. Danin mearridedje, ahte sámekultuvra oassi lea ain mielddusin, dego ovdditge jagiid, muitala Lappi lihtu stivrra ságadoalli Sara Seppänen.

– Ráđđehus gieđahallá buot eará osiid Lappi-soahpamušas ja politihkalaš bellodagat ovttas smihttet ja ohcet kompromissaid. Sámekultuvrra oassi boahtá Sámedikkis, ja Lappi lihtu ráđđehusas ii leat riekti gieđahallat dan mange láhkai. Danin ráđđehus oinnii, ahte dat ferte leat mielddusin, dadjá Seppänen.

Lappi lihtu stivrra ságadoalli Sara Seppänen muitala, ahte sámekultuvrra oassi geatnegahttá Lappi lihtu ja buot sin doaimmaid maiddái Lappi soahpamuša mielddusin. Govva: Priváhta / Sara Seppänen

Son dadjá ahte sámekultuvrra oassi lea dehálaš oassi soahpamušas maiddái mielddusin.

– Vaikko dat sámekultuvrra oassi livčče mielddusin Lappi-soahpamušas, de dat geatnegahttá ollislaš strategiijaáššegirjin Lappi lihtu ja buot min doaimmaid.

Seppänen muitala, ahte sisdoallu Lappi-soahpamuša sámekultuvra oasis lea seilon Sámedikki evttohusa mielde.

Guldal maid Sara Seppänen muitala áššis.

Beaivvi ságaid ja Yle Ođđasiid Sámis sáhtát maid guldalit Yle Areenas.