Guldal jiena: Davviriikkain hálidit nannet ovttasbarggu sámeoahpahusáššiin – Anáris ságastallet čuolmmain ja ovttasbargovejolašvuođain

Sámeoahpahusa davviriikalaš foruma lágidit ovttas oahpahus- ja kulturministeriija ja Sámediggi. Foruma ulbmilin lea ovddidit oahpahusa rájáidrasttildeaddji ovttasbarggu ja dan skuvlenpolitihkalaš sajádaga davviriikkain.

Sámekulturguovddáš Sajosa auditorias álggii sámeoahpahusa davviriikalaš forum 1.2.12.2021. Báikki alde leat oahpahussuorggi iešguđet ovddasteaddjit. Govva: Anneli Lappalainen / Yle

Sámeoahpahusa ovttasbarggu nannemis hállojuvvo dál guokte beaivvi Anáris Sámekulturguovddáš Sajosis. Rájáhis sámeoahpahusa davviriikkalaš forum álggii otne gaskavahku ja joatkašuvvá vel duorastaga. Suoma oahpahus- ja kulturministeriija ja Sámediggi lágidit foruma ovttas.

– Sámedikkiid gaskkas mis lea sámeservodaga sisti ovttasbargu hui lunddolaš. Mii leat váillahan dan, go Suoma, Ruoŧa ja Norgga oahpahusministeriijain ii leat dakkár jeavddalaš ovttasbargu sámeoahpahusáššiin, vaikko mii leat okta álbmot dáin riikkain. Livččii hui dárbu, ahte mis livččii davviriikalaš ovttasbargu, mas sihke ministeriijat ja sámedikkit livčče fárus, muitala Sámedikki skuvlenčálli Ulla Aikio-Puoskari.

Guldal Sámedikki skuvlenčálli Ulla Aikio-Puoskari olles jearahallama dás.

Maid davviriikkaid oahpahusministarat čalmmustahttet dán foruma. Ulbmilin lea nannet ja ođadit sámeoahpahusa ovttasbarggu davviriikalaš dásis.

– Galhan ovttasbargu leamaš jo jagiid mielde, muhto lea dehálaš dál gullat ja ságastallat davviriikalaš dásis. Čuovvovaš lávki lea, ahte vel oktii geahččat makkár konkrehtalaš ovttasbarggu sáhttit bargat dálá láhkaásahusa ja oahppaplánaid vuođul, dadjá riikkaidgaskasaš áššiid čállingotti hoavda Kirsi Lindroos Suoma oahpahus- ja kulturministeriijas.

Oahpahus- ja kulturministeriija oktan ovddasteaddjin forumis lea riikkaidgaskasaš áššiid čállingotti hoavda Kirsi Lindroos. Govva: Susanna Guttorm / Yle

Davviriikkain leat iešguđetlágan dilit ja hástalusat, mat gusket sámeoahpahusa. Sámedikkit gulahallet ja barget jo ovttas sámeoahpahusáššiin, muhto dilli sáhtášii leat buoretge, árvala Suoma Sámedikki vuosttas várreságadoalli Anni Koivisto.

– Namalassii nu, ahte mis lea dakkár sohppojuvvon vuohki das, ahte mo mii bargat ovttas. Okta ovdamearka lea dieđusge dákkár oktasaš dilálašvuođat vai mii bastit hábmet dan oppalaš gova ja soahpat, ahte mo mii dás ovdánit. Deháleamos livčče, ahte mis livčče systemáhtalaš vuogádat dan ovttasbargui, dadjá Koivisto.

Guldal dás Suoma Sámedikki vuosttas várreságadoalli Anni Koivisto ja Norgga Sámedikki ráđđelahttu Mikkel Eskil Mikkelsen olles jearahallamiid.

Norgga Sámedikki ráđđelahttu Mikkel Eskil Mikkelsen mielas lea hástalus, go buot riikkain leat iešguđetlágan vuogádagat, muhto su mielas goit leat vejolašvuođat ovttasbarggu nannemii ja lasiheapmái.

– Dat lea lávket dan rastá. Mu mielas lea vejolaš dan dahkat, nugo oahppamateriálabuvttadeamis ja mis lea vejolašvuohta hábmet sámi pedagogihka vuođu Sámedikkiid gaskal, jáhkká Mikkelsen.

Norgga Sámedikki oktan ovddasteaddjin forumis lea ráđđelahttu Mikkel Eskil Mikkelsen. Govva: Susanna Guttorm / Yle

Rájáhis sámeoahpahusa davviriikkalaš forum (siirryt toiseen palveluun) lágiduvvo 1.–2.12. Anáris Sámekulturguovddáš Sajosis.

Beaivvi ságaid ja Yle Ođđasiid Sámis sáhtát maid guldalit Yle Areenas.