Sosiálaráđđi deattuha, ahte mánás ferte leat diehtu iežas goruda vuoigatvuođain – gorutdovdobajásgeassimis almmustuvve sámegielat materiálat

Väestöliitto ja SámiSoster rs leat ovttas almmustahttán materiálaid gorutdovdobajásgeassimis golmma sámegillii. Gorutdovdobajásgeassin sisttisdoallá gávcci iešguđet fáttá maid birra mánáin sáhttá ságastallat.

Sosiálaráđđi ja SámiSoster rs doaimmajođiheaddji Ristenrauna Magga dadjá, ahte gorutdovdámuš váikkuha olbmui olles eallima. Govva: Vesa Toppari / Yle

Gieskat almmustuvve materiálat golmma sámegillii gorutdovdobajásgeassimis. Väestöliitto ja SámiSoster rs leat ovttasráđiid almmustahttán materiálaid.

Gorutdovdobajásgeassinmateriálat sisttisdollet gávcci iešguđet fáttá maid birra mánáin sáhttá ságastallat. Fáttáide gullet earet eará gorut ja dan nuppástuvvan, dovddut, seksuálaiešmearrideapmi.

Sosiálaráđđi ja SámiSoster rs doaimmajođiheaddji Ristenrauna Magga dadjá, ahte gorutdovdámuš váikkuha olbmui olles eallima. Dárbu materiálaide bohciidii suorggi bargiin, earret eará doaktáriin. Magga muitala, ahte prošeavtta ulbmil lea váikkuhit dasa, ahte olbmuide lea lunddolaš hállat dáid fáttáid birra ja ahte das ii dárbbaš heahpanit. Máná dorvu lea gorutdovdobajásgeassima guovddážis.

– Ferte leat nu, ahte mánás lea diehtu iežas goruda vuoigatvuođain ja iešmearrideamis. Vaikko máilmmis galggašii leat dorvvolaš, de ferte máhttit váruhit. Danin lea dehálaš, ahte mánás lea diehtu.

Guldal olles jearahallama dás.

Gorutdovdobajásgeassima guovddážis leat máná vuoigatvuođat

Materiálain deattuhit, ahte go lea sáhka smávvamánáin, de hállojuvvo gorutdovdobajásgeassimis, ii seksuálabajásgeassimis. Sátni gorutdovdobajásgeassin govvida buorebut mánáid dárbbuid ja ovdáneami.

Ávdnasat muitalit, ahte oahpahus galgá leat máná ahkái heivvolaš. Dasa lassin máná oahpaheapmi positiiva jurddašeapmái gullá gorutdovdobajásgeassimii. Materiálat gávdnojit sihke Väestöliitto neahttasiidduin (siirryt toiseen palveluun) ja SámiSoster rs Čoahkis-materiálabáŋkkus (siirryt toiseen palveluun).

Bargu válddii golbma njeallje jagi. Jorgaleaddjit hutke sániid gorutdovdobajásgeassimii ja Magga deattuha, ahte sis leamašan ollu bargu.

– Ferte giitit min jorgaleaddjiid, sii leat bargan stuorra barggu.

Magga lasiha, ahte Sámedikki Nuoraidráđi seksuálavuođa sátnegirjjiin (siirryt toiseen palveluun) gávdnojedje maiddái muhtin sánit. Magga mielas livččii dehálaš jorgalit sániid dán fáttás davviriikalaš atnui.

Son namuha, ahte suomagillii gal juhket dieđu dáid áššiid birra ovdamearkka dihtii mánáidrávvehagas ja skuvllain. Sámegielagiidda ii leat leamašan dákkár fállu. Vánhemat leat ieža válljen guđe materiálat jorgaluvvojedje sámegielaide ovddemužžan. Magga sávvá, ahte sin bargu joatkašuvašii vai sáhtášedje jorgalit eambbo materiálaid.

Fidnu leat ruhtadan STEA ja Duodecim ry.

Beaivvi ságaid ja Yle Ođđasiid Sámis sáhtát maid guldalit Yle Areenas.