Dáiddár Marja Helanderii mieđihuvvon Pro Finlandia -medállja

Marja Helander lea vuosttas sámedáiddár, geasa gudnemearka lea mieđihuvvon. Gudnemearka lea dán jagi mieđihuvvon logi dáiddárii.

Dáiddár Marja Helander lea dáidagisttis dutkan earret eará iežas identitehta suopmelaš ja sápmelaš kultuvrra gaskkas. Govva: Antti Haanpää / Yle

Dáiddár Marja Helanderii lea mieđihuvvon Pro Finlandia -medállja. Son lea vuosttas sámedáiddár, geasa gudnemearka lea mieđihuvvon. Áššis muitala Helsingin Sanomat -aviisa (siirryt toiseen palveluun).

Pro Finlandia lea gudnemearka, mii mieđihuvvo girječálliide ja dáiddáriidda. Gudnemearkkaid mieđiha riddárgotti alimus hoavda nappo Suoma Presideanta. Medállja lea dán jagi mieđihuvvon logi dáiddárii.

Helander lea dovddus čuovgagovva- ja filbmadáiddár. Su oanehisfilbma Eatnanvuloš lottit (2018) bálkkašuvvui máŋgga riikkaidgaskasaš filbmafestiválas.

Suomen Leijonan Pro Finlandia -medáljaid ožžo Helander lassin earret eará Turku gávpotteáhtera dáiddalaš jođiheaddji Mikko Kouki ja historihkkár Teemu Keskisarja. Olles listtu gudnemearkkaid oažžuin gávnnat dáppe (siirryt toiseen palveluun).

Medáljaid leat juohkán jagi 1945 rájes.

Beaivvi ságaid ja Yle Ođđasiid Sámis sáhtát maid guldalit Yle Areenas.