Kone-foanda jugii sámi prošeavttaide 460 400 euro: Anna Lumikivi dutkagoahtá gárjillaččaid ja nuortalaččaid kultuvrra oktasaš iešvuođaid

Kone-foandda veahkkeruđaiguin ráhkadit maiddái nuortalaš- ja anárašgielat musihka, čielggadit kolonialismma ja assimilerema váikkuhusaid ja čađahit nákkosgirjedutkamuša anárašgiela giellaoahpas.

Musihkkár Anna Lumikivi čierui otne iđđes go gulai veahkeruđa mieđiheamis iežas bargojoavkku prošektii. Sáhka lea sutnje persovnnalaččat hui dehálaš prošeavttas. Govva: Heli Huovinen / Yle
Guldal maid Anna Lumikivi muitala sin prošeavttas.

Kone-foanda lea almmustahttán čavčča 2021 veahkkeruđaid. Dán háve foanda juolludii doarjagiid oktiibuot 38 miljon euro ovddas. Maiddái sámegielaide ja kultuvrii guoskevaš prošeavttat leat ožžon ruhtadeami.

Musihkkár Anna Lumikivi oažžu bargojoavkkuinis 54 700 euro sturrosaš veahkeruđa prošektii, mii čalmmustahttá gárjillaččaid ja nuortalaččaid kultuvrra. Prošeavttas sii áigot dutkat musihka ja árbevieruid bokte gárjillaččaid ja nuortalaččaid kultuvra oktasaš iešvuođaid ja dan, makkár iešvuođat leat dušše nuppi joavkkus, muitala Anna Lumikivi.

– Duođai lihkolaš ledjen iđđes go gullen das. Álgen čierrut go dat lei nu buorre ođas. Mii leat bargojoavkkuin geahččalan álggahit dán prošeavtta jo measta njeallje jagi, ahte mii leat plánen dan hui guhká.

Prošeavttas áigot ovdamearkka dihtii lágidit guokte konseartta, bargobájiid ja jearahallat daid, geat vel dovdet árbevieruid, dutkat arkiivvaid ja almmustahttit sisdoalu sin bloggii.

Sáhka lea Lumikivii persovnnalaččat dehálaš prošeavttas, danin go son lea ieš sihke nuortalaš ja gárjillaš. Son dovdá maid olu earáid, geat gullet goappáge čerdii. Son ii leat gullan, ahte dán ášši livčče ovdal dutkan.

Su mielas lea dehálaš dutkat dan, ahte mo kultuvrras lea šaddan dakkár, makkár dat lea dán áigge. Go eará kultuvrrat leamašan oktavuođas gaskaneaset, de dieđusge dat lea rievdadan kultuvrraid, smiehtada son.

– Mis lea ulbmil oažžut lasi dieđu ja áddejumi sámiid ja gárjillaččaid kultuvrras ja maiddái buvttadit ođđa dáidaga, mii boahtá min árbevierus.

Lumikivi bargojoavkkus leat mielde Lumikivi áhčči Erkki Lumisalmi ja álbmotmusihkkárguovttos Amanda Kauranne ja Emmi Kuittinen, geain lea maiddái gárjillaš duogáš.

Ruhtadeapmi maiddái eará sámeprošeavttaide

Sámegielaid ja kultuvrii guoskevaš prošeavttat ožžo Kone-foanddas dál veahkkeruđaid oktiibuot 460 400 euro.

Dáidaga magisttar Stina Roos oaččui 123 000 euro doarjaga dieđalaš dutkamuššii, man ulbmilin lea čielggadit kolonialismma ja assimilerema váikkuhusaid sápmelaččaid historjái, dálá áigái ja maiddái vejolaš boahttevuhtii.

Tuomas Koukkarii mieđihuvvui 107 900 euro nákkosgirjedutkamuššii, man dárkkuhussan lea ráhkadit anárašgiela dieđalaš gielaoahpa. Nággosgirjedutkamuš čađahuvvo Oulu universitehta Giellagas-instituhtas.

Dáiddár Heidi Gauriloff Saauj Cool Band -bargojoavkkuinis áigu almmustahttit ođđa nuortalaš- ja anárašgielat musihkkaskearru. Nuortalaš- ja anárašgielat veršuvnna lassin almmustahttet seamma bihtáin maiddái eŋgalasgielat skearru. Prošeakta oažžu Kone-foanddas 14 800 euro.

Foanda lea mieđihan maid 160 000 euro doarjaga eamiálbmogiid filbmafestivála Skábmagovaide. Doarjja galgá geavahuvvot sápmelaččaid ja eará eamiálbmogiid ealligovvadáidaga ja kultuvrra oidnoma ovddideapmái.

Beaivvi ságaid ja Yle Ođđasiid Sámis sáhtát maid guldalit Yle Areenas.