Kuldâl jienâ: Anarâšah-servi orniiškuát Anarâš pááru -klubiehidijd – vuosmuš eehid jo uđđâivemáánu loopâst

Anarâšah-seervi jesâneh lijjii tuáivum eenâb tábáhtusâid main puáhtá savâstâllâđ já teivâđ ulmuigijn. Seervi jesâneh láá tuáivum ovdâmerkkân kietâtyeji teemaehidijd já kuálástem muštâččem já puáris čuovâkuuvij keččâm.

Anarâšah-seervi saavâjođetteijee Anu Avaskari muštâl, ete servi meridij kieskâd ihečuákkimistis orniiškyettiđ klubiehidijd. Govva: Jouni Aikio / Yle
Kuldâl maid anarâšah seervi saavâjođetteijee Anu Avaskari muštâl Anarâš pááru -tábáhtusâst.

Anarâšah-servi orniiškuát Anarâš pááru -klubiehidijd puáttee ive pelni. Ulmen lii orniđ ohtii mánuppaajeest puoh anarâššáid ávus toimâlâš já uásálistee čokkânem.

– Juurdân lâi jo uđđâivemáánu loopâst orniđ vuossâmuu já vuáváámeh lijjii orniđ tom Rivdulist, muštâl Anarâšah-seervi saavâjođetteijee Anu Avaskari.

Anarâš pááru -nommâ šoodâi tondiet ko anarâšah ärbivuáválávt ääsih Aanaarjäävri pirrâsist, já servi ulmen lii párudiđ kylást nuubán já orniđ ehidijd miätá Aanaar kieldâ: Avelist, Anarist, Pärttihist, Njellimist já Kaamâsist.

– Ulmen lii toohâđ máhđulâžžân oovtâstorroom já anarâškielâg ulmuuh pyehtih meid čokkâniđ. Jesâneh láá tuáivum eenâb ohtsijd tábáhtusâid main puáhtá savâstâllâđ já teivâđ. Já ko mist lâi kieskâd ihečuákkim, te tobbeen meridijm ääšist.

Avaskari muštâl, ete jyehi klubiehidist ličij miinii teemaid. Seervi jesâneh láá tuáivum ovdâmerkkân kietâtyeji teemaehidijd já kuálástem muštâččem já puáris čuovâkuuvij keččâm.

Servi lii uuccâm ruttâdem Sämitiggeest, mutâ Avaskari arvâl, ete ehidij ornim luhostuvá, veikkâ toorjâ ij mieđettuuččii.

Anarâšah rs ihečuákkim lâi 28.11. Anarist. Stiivrân väljejii Inka Kangasniemi, Kaisu Nikula, Ritva Hirvelä, Antero Svendsen, Jarmo Katajamaa, Aarne Turunen já Anu Avaskari. Värijesânin väljejii Aune Kuuva, Pertti SarreVeli- Matti Korppila.

Seervi saavâjođetteijen juátká Anu Avaskari já värisaavâjođetteijen Aarne Turunen.

Kuldâl lase anarâš saavâid tääbbin.