Njuike sisdoaluide

Ohcejohkalaš Niillas Holmberg girji Halla Helle lea evttohassan oažžut árvvus ádnon Runeberg-bálkkašumi

Halla Helle lea Niillas Holmberg vuosttas romána ja dan son lea čállán suomagillii. Girji gilvohallá Runeberg-bálkkašumis logi girjji joavkkus.

Niillas Holmberg doalada gieđaidis gaskkas “Halla Helle” girjji. Govva: Jari Kärkkäinen / Yle

Niillas Holmberg vuosttas romána Halla Helle lea evttohassan oažžut árvvus ádnon Runeberg-bálkkášumi. Bálkkašupmi juhkkojuvvo guovvamánu 5. beaivve 2022, Johan Ludvig Runeberg riegádanbeaivve. Logi romána gilvalit dál 20 000 euro bálkkašumis.

Bálkkašumi leat vuođđudan 1986 ja juohkkán jagis 1987 rájes. Gilvui lea dán geardde válljejuvvon 10 girjji 284 romana joavkkus. Bálkkašumi oažžu válljejit girječálli Marja-Leena Tiainen, kritihkar Merja Leppälahti ja davviriikalaš girjjálašvuođa nággogirjedutki Hanna Lahdenperä.

Ohcejohkalaš Niillas Holmberg lea 31-jahkásaš máŋggabealat dáiddár. Son lea musihkkár, diktačálli, girječálli ja neavttár. So lea maid servvodatberošteaddji, gii čalmmustahttá sápmelašvuođa áitagiid.

Halla Helle -girji lea su vuosttas romána ja dan son lea čállán suomagillii. Girji muitala Samu nammasaš suopmelaš bártnis, gii fárre Ohcejohkii Tamperes. Holmberg lea gieđahallan girjjistis kulturearuid, mat bohciidit nuppelágan jurddašanvuogis. Girji muitala rádjeguovllu sámiid eallimis ja guorahallá seammás eanageavahan- ja giellagažaldagaid.

Halla Helle lea goasttidan Gummerus, mii lea Suoma boarrásamos girjelágádus ja okta stuorámusain. Girji leage beaggán viidát Suomas ja dat jorgaluvvo maiddái fránskkagillii. Jorgalanvuoigatvuođaid lea oasttán Éditions le Seuil girjegoasttideaddji Frankriikkas.

Beaivvi ságaid ja Yle Ođđasiid Sámis sáhtát maid guldalit Yle Areenas.