Njuike sisdoaluide

Sámegielat divššáriid ii leat eambo roggalit bargui – Anára gielddas galggašedje bálvalit golmma sámegillii

Anára gielddas fertejit fállat dulkonbálvalusa vai geatnegasvuohta sámegielat bálvalusas ollašuvvá. Eará gielddain dilli lea govttolaš.

Sairaanhoitaja laittaa kumihanskaa käteensä Meilahden sairaalassa.
Anára gieldda sosiála- ja dearvvasvuohtahoavda Jaakko Seppänen lei mielde Ylen aamu -progámmas maŋŋebárgga 11.1. muitaleamen divššárdilis Anára gielddas. Doaimmaheaddjin Inger-Elle Suoninen.

Sámegielddain rahčet gávdnat divššáriid, eandalit dakkáriid, geat máhttet sámegiela. Anára gieldda sosiála- ja dearvvasvuohtahoavda Jaakko Seppänen muitala, ahte sis leat sullii 200 sode-bargi sirdašuvvamin boahtte jagi buresbirgenguovlluid vuollái, main sullii bealli lea dearvvašvuođasuorggi bargit.

– Mis eai leat doarvái sámegielat bargit. Dilli dikšunsuorggis lea muđuige váttis olles riikkas. Bargit geahppánit dikšunsuorggis olles áigge, eaige sin sadjái leat boahtimin ođđa bargit, dadjá Seppänen.

Anára gielddas fertejit fállat dulkonbálvalusa vai geatnegasvuohta sámegielat bálvalusas ollašuvvá. Seppänen mielde koronaáigi lea lasihan divššárváilivuođa ovddežis.

– Olles áigge ohcat bargiid ja sávvat, ahte sámegielat olbmot ozašedje.

Seppänen lea maid fuobmán, ahte dikšunsuorggi barggu árvvoštus lea njiedjan. Maiddái ránnjáriikkaid bálkkát ja bargodilit geasuhit divššáriid olgoriikkaide bargui.

– Jus dat dušše ruđas livčče gitta, de galhan mii livččiimet dan dili jo čoavdán. Mii fertet geahččalit doallat iežaimet dakkárin, ahte olbmot hálidit boahtit midjiide bargui, árvala Seppänen.

Buot sámegielddain livčče dárbu oažžut lasi sámegielat bargiid, vaikko dilli leage govttolaš eanaš gielddain. Ovdamearkan Eanodagas divššáriid dilli lea buorre, doppe goit livčče dárbu sadjásaččaide.

Ohcejoga gielddas leat mannan jagi áigge bastán oažžut bures sámegielat bargiid ja Soađegilis fas dárbbu mielde ostet sámegielat bálvalusa ránnjágielddas.

Yle čuovvu guovloválggaid Lappi eanangotti ja Sámi oainnus Sámi válgalávvu -siidduin. Válgalávus gávnnat ođđasiid guovloválggain ja sáhtát oassálastit suomagielat chat-ságastallamiidda.

Otne maŋŋebárgga 11.1. lea chat-ságastallan divššárdilis.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat