Njuike sisdoaluide

Guovloválggat 2022: Ohcejogas ja Eanodagas eai guottit jurdaga iežas gieldda bálvalusaid geahpedeamis olles buresbirgenguovllu buorrin

Buot Lappi guovloválgaevttohasain fas sullii bealli livčče gárvvis geahpedit bálvalusaid iežaset gielddain, jus dat livčče buresbirgenguovllu buorrin.

Suoma historjjá vuosttas guovloválggat leat 23.1.2022. Govva: Asmo Raimoaho / Yle

Yle válgamašenii vástidan Ohcejoga ja Eanodaga guovllu evttohasain oktage ii guottit jurdaga das, ahte geahpedit iežas gieldda bálvalusaid, jus dat livčče olles buresbirgenguovllu buorrin.

Anára guovllu evttohasain sullii golbma evttohasa njealjis ja Soađegili guovllu evttohasain fas sullii guokte goalmmádasas eai guottit bálvalusaid geahpedeami iežas gielddas.

Buot Lappi evttohasain sullii bealli lea jogo áibbas eará oaivilis dahje vehá eará oaivilis das, ahte galggašiigo iežas gielddas geahpedit bálvalusaid, jus dat lea ovdun buresbirgenguvlui. Dát mearkkaša dan, ahte sullii bealli Lappi guovloválgaevttohasain livčče gárvvis geahpedit bálvalusaid iežas gielddas, jus buresbirgenguovlu ávkašuvašii dainna.

  • Loga lasi guovloválggain:

Ovdajienastus lea álgán maŋŋebárgga

Guovloválggaid ovdajienastus lea álgán maŋŋebárgga 12.1.2002. Ovddalgihtii sáhttá jienastit man beare ovdajienastanbáikkis.

Sámeguovllus ovdajienastanbáikkit leat ovdamearkan Eanodagas gielddadállu, Anáris Avvila girjerádju ja Sajosa sámegirjerádju, Soađegilis gielddadállu sihke gávppit girkosiiddas, ja vel Ohcejogas gielddadállu sihke máŋggadoaimmadálut Gáregasnjárggas ja Njuorggámis.

Dárkilut dieđut jienastanbáikkiin gávdnojit jietnavuoigatvuohtaalmmuhusas dahje vuoigatvuohtaministeriija válgasiidduin (siirryt toiseen palveluun).

Yle čuovvu guovloválggaid Lappi eanangotti ja Sámi oainnus Sámi válgalávvu -siidduin. Válgalávus gávnnat ođđasiid guovloválggain ja sáhtát oassálastit chat-ságastallamiidda.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat