Dáiddauniversitehta Sibelius-Akademiija dieđihii mannan vahkuloahpas stuorra ja hárvenaš skeaŋkkas: amerihkasuopmelaš priváhtaolmmoš Elsa Brule skeŋkii akademiija Global music -skuvlejupmái miljon dollára, mii lea measta 880 000 euro.
Ruhtaskeaŋka dahká vejolažžan sápmelaččaid ja Amerihka eamiálbmogiid kultuvrraid gaskasaš ovttasbarggu ovddideami. Dasa lassin doarjagiin sáhttá ovdamearkka dihte viiddidit sisafárrejeddjiiguin dahkkon ovttasbarggu.
Brule muitalii Helsingin sanomat -aviissas (siirryt toiseen palveluun), ahte son háliidii doarjut skuvlejumi danin, go liikui dasa, mo dat ovttastahttá olbmuid musihkain. Eandalitge Global music -skuvlejumi studeanttaid Hildá Länsmana ja Viivi-Maria Saarenkylä sámemusihka ovdanbuktin čuozai su dovdduide garrasit.
Hárvenaš ruhtaskeaŋka
Dekána Emilie Gardberg lea hui movttá ruhtaskeŋkejumis, mii gokčá Global music -skuvlejumi doaimma máŋgga jahkái.
– Priváhtaolbmo ná stuorra skeŋkejupmi njuolga dihto skuvlejupmái lea gal hárvenaš, lohká Gardberg.
Ruhtaskeŋkejumi plánen ja čujuheapmi lea dahkkon viiddis ovttasbarggus skeŋkejeaddji Elsa Brulein, mii lea datge hárvenaš doaibmavuohki. Brule leamašan beroštuvvan Global music -skuvlejumis ja háliidii doarjut dan.
– Lea gal movttiidahtti min ohppiide ja bargiide, ahte sin barggu dovddastit maid olggobealde ná bures, Gardberg muitala.
Hildá Länsman vuordá iluin ovttasbarggu
Sámemusihkkár Hildá Länsmanleamašan jagi 2016 rájes mielde Global music -oahpuin Sibelius-Akademiijas. Länsman rábmo skuvlejumi eandalitge dan eamiálbmotoktavuođaid dihte.
– Mun lean áibbas ilus oaidnit, ahte makkár boahttevuođa prošeavttaid dat mielddisbuktá, lohká Länsman.
Global music -oahput hápmašuvvet máŋgii dan mielde, main guovlluin ja kultuvrrain olbmot leat dohko boahtán. Dákkár doaibmá lasiha áddejumi ja buktá ođđalágán vásáhusaid.
– Lean maid ilus das, ahte dasa lea jurddašuvvon vejolaččat sisttisdoallat namalassii eará eamiálbmogiid, ahte gávdnat oktavuođaid maiguin bargat, Hildá Länsman muitala.
Dáiddauniversitehta dekána Emilie Gardberg jáhkká, ahte skuvlejumi olis ordnejit maŋŋelappos maiddái konsearttaid.
Beaivvi ságaid ja Yle Ođđasiid Sámis sáhtát maid guldalit Yle Areenas.
