Skammâ lii tääl lappâd já forgâ álgá-uv jo kuálmád kiđđâ nuuvt, ete koronavirus vaaigut ain puohâi elimân. Säämi máttááttâskuávdáást korona lii vaiguttâm maaŋgânáál, uáppeeh láá lamaš ennuv káidusmáttááttâsâst já meid kielâmiäštáruási ij lah lamaš máhđulâš orniđ.
– Tot lii kale väivi. Kielâmiäštárohoh láá tágáreh maid uáppeeh kale vyerdih ain, iätá Säämi máttááttâskuávdáá anarâškielâ máttáátteijee Iiris Mäenpää.
Kikke Klaver juuđij anarâškielâ škovliittâs Säämi máttááttâskuávdáást ive 2018–2019. Sun lijkkui kielâmiäštáruásán ennuv. Suu kielâmiäštárist šoodâi sunjin tego ákku.
– Sun lii muu vuoiŋâlâš ákku, ij voorâ peht, sun hirmâd tuođâst váldá suu ááhu roolâ, Klaver illood.
Klaver uáiná uáppei tááhust hirmâd tehálâžžân já ávhálâžžân kielâmiäštárohoid. Suu mielâst uáppeeh já kielâmiäštáreh kuohtuuh monâtteh ennuv, ko ij lah máhđulâšvuotâ teivâdiđ.
– Muu mielâst to lii hirmâd ahheev, ete iä peesâ. Ij tuše uáppei peeleest, mutâ meiddei kielâmiäštárij peeleest ličij tehálâš, et ličij miinii vuovijd, arvâl Klaver.
Máttáátteijee Iiris Mäenpää šalliš, ete kielâmiäštáruási ornim ij lah taan muddoost máhđulâš koronatile keežild. Vuosmuuh kielâmiäštárteivâdmeh láá táválávt lamaš jo uđđâivemáánust já maŋeláá kiđđuv majemuuh. Uáppeeh láá kolliistâlmân kielâmiäštárij kulen, paddim saavâid já maŋeláá čáállám sänilistoid já mainâsijd.
Mäenpää arvâl, ete káidusin kielâmiäštáruási ij luhostuččii. Puoh miäštáreh iä lah hárjánâm tiätumašinij já jiermipuhelimij kevttimân, ige savâstâllâm já uápásmem lah siämmáálágán puhelin peht ko njunáluvâi.
Kielâmiäštár mielâst uáppei teivâm lii lamaš suotâs
Päärtihlâš Eeva Seurujärvi lii porgâm kuhháá kielâmiäštárin. Suu mielâst lii suotâs ko uáppeeh láá iällám suu kulen já sun lii peessâm savâstâllâđ siigijn. Ulmuuh iä innig kolliistâl siämmáánáál ko tovle já tondiet-uv lii suotâs ko uáppeeh láá puáttám.
– Enâmus lep savâstâllâm já maidnii motomin poccuigijn leen iällám, ko kaandâin láá lamaš poccuuh ääiđist, já purrâmuš mun lam ráhtám já lep purâdâm.
Seurujärvi mielâst uáppeeh kale hirmâdávt láá lijkkum puáttiđ kolliistâllâđ. Sun imâštâl kuittâg tom, mondiet uáppeeh láá ain koijâdâllâm siämmáid aašijd sust.
Kuldâl lase anarâš saavâid tääbbin.
