Njuike sisdoaluide

Stuorámus oassi Lappi evttohasain lea dan oaivilis, ahte boaittobeal guovlluid ássiide ii leat doarvái fállat vuosttas kontáktan elektrovnnalaš bálvalusa

Sámeguovllu 51 guovloválgaevttohasas 33 leat vástidan Yle válgamášenii, buot Lappi 425 evttohasas fas 280. Guovloválggat leat boahtte sotnabeaivve.

Guovloválggat leat sotnabeaivve 23.1. Ovdajienasteapmi lea maŋŋebárgga 18.1. rádjái. Govva: Asmo Raimoaho / Yle

Dušše njealját oassi Lappi guovloválgaevttohasain lea dan oaivilis, ahte boaittobeal guovlluid ássiide reahkkásii vuosttas kontáktan elektrovnnalaš bálvalus. Dát boahtá ovdan Yle válgamášenii vástidan evttohasaid vástádusain.

Stuorámus oassi evttohasain oaivvilda, ahte boaittobeal guovlluid olbmuin lea riekti oažžut sode-bálvalusaid njeazzálágaid. Buot olbmot eai bastte dikšut áššiid dihtoriin ja neahta bokte, ákkastallet sii. Oassi evttohasain gal guottiha dan, ahte muhtin dáhpáhusain sáhttá bálvalusaid dievasmahttit elektrovnnalaš bálvalusain.

Njealját oassi evttohasain fas dohkkehivčče dan, ahte boaittobeal guovlluide fállojit eanaš elektrovnnalaš bálvalusat. Sin mielas dat sáhtášii leat buorre veahkkin, jus muđui bálvalusat leat guhkkin oažžumis. Muhtin evttohasaid mielas dát livčče goittot molsaeaktu dalle, jus neahttaoktavuođat leat buorit.

Sámeguovllu 51 guovloválgaevttohasas 33 leat vástidan Yle válgamášenii, buot Lappi 425 evttohasas fas 280.

Ovdajienasteapmi nohká 18.1.

Guovloválggat leat sotnabeaivve 23.1. Ovdajienasteapmi lea jođus vel maŋŋebárgga 18.1. rádjái.

Sámeguovllus ovdajienastanbáikkit leat ovdamearkan Eanodagas gielddadállu, Anáris Avvila girjerádju ja Sajosa sámegirjerádju, Soađegilis gielddadállu sihke gávppit girkosiiddas, ja vel Ohcejogas gielddadállu sihke máŋggadoaimmadálut Gáregasnjárggas ja Njuorggámis.

Dárkilut dieđut jienastanbáikkiin gávdnojit jietnavuoigatvuohtaalmmuhusas dahje vuoigatvuohtaministeriija válgasiidduin (siirryt toiseen palveluun).

Yle čuovvu guovloválggaid Lappi eanangotti ja Sámi oainnus Sámi válgalávvu -siidduin. Válgalávus gávnnat ođđasiid guovloválggain ja sáhtát oassálastit chat-ságastallamiidda.

Beaivvi ságaid ja Yle Ođđasiid Sámis sáhtát maid guldalit Yle Areenas.