Njuike sisdoaluide

Rievssahat, duoddarat ja guovssahasat hervejit Eanodaga gieldda ullobáiddi

Eanodatlaš Johanna Visala vuittii Eanodaga gieldda ordnen ullobáidegilvvu.

Johanna Visala háliidii hábmet ullobáidemálle, mas vuhttojit Eanodaga luondu ja duovdagat. Govva: Pekka Visala

Go Eanodaga gielda mannan jagi loahpa bealde almmuhii ullobáidegilvvus, de smiehtadii eanodatlaš Johanna Visala guhká, ahte makkár báiddi son plánešii, jus oassálasttášii gilvui.

Skábmaivnnit, duoddarat ja dálvvi duovdagat – dat áššit bohte su millii ja nu plánegođii su vuosttas ullobáidemálle. Loahpa loahpas Visala ullobáidemálle válljejuvvuige hástaleaddji gilvvu vuoitin.

– Galhan dat lea somá! Háliidin juoidá čielgasit duottarlappilaš hámi bidjat dasa ja mu mielas dat vuhtto báiddistan bures. Das vuhttojit árbevirolaš Eanodaga ja Guovdageainnu fáhcaid hearvvat, muitala Johanna Visala.

Eanodatlaš Johanna Visala plánii vuosttas háve ullobáidemálle ja vuittii dáinna Eanodaga gieldda ordnen plánengilvvu.

Eanodaga báiddiin vuhttojedje Eanodaga luonddu ivnnit

Dán áigge olbmot miehtá Suoma leat movttáskan gođđit ullobáiddiid. Eanodaga gielda álggahii rabas ullobáidegilvvu ovttas suopmelaš láigefitnodagain, go báikegoddelaččas bohciidii dakkár jurdda. Idea rávesolbmo ullobáidemállii galggai leat plánejeaddji iežas. Vuoiti oaččui skeaŋkakoartta láigegávpái ja 300 euro málleplánenbálkkašumi.

Gilvvu duopmárin ledje Maarit Magga, Pirjo Kuukkanen ja Ellenoora Mäkinen.

Duopmárin doaibman eanodatlaš Pirjo Kuukkanen muitala, ahte gilvu lei oalle miellagiddevaš proseassa. Gilvui oassálaste oktiibuot guhtta báidemálle, muhto daid eai almmustahte ollenge. Máŋgga báiddis vuhttojedje rievssahat ja ivdnemáilbmi lei čielgasit Eanodagas.

– Dalle go oinniimet vuosttas háve buot ullobáidemálliid, ge bođii gal dovdu, ahte dat buot plánat leat gal Eanodagas. Doppe ledje Eanodaga ivnnit, aŋkke mu čalmmiin, muitala Kuukkanen.

Johana Visala ii leat ovdal plánen gođđinmálle, muhto lea olu gođđán ullobáiddiid eará dahkkiid rávvagiin. Iežas báidemálle ii lean nu álki plánegoahtit.

– Báidemálle soaitá orrut mohkkái, muhto ii dat goit leat nu veadjemeahttun gođđit. Báiddis eai leat guhkes láigejohtimat hearvvas. Roahkkadit fal geahččalit, jus lea miella gođđit, movttiidahttá Visala.

Eanodaga gielda lea almmustahttán ullobáiddi rávvaga iežas neahtasiidduin (siirryt toiseen palveluun) ja maiddái gieldda some-kanálain.

Beaivvi ságaid ja Yle Ođđasiid Sámis sáhtát maid guldalit Yle Areenas.