Njuike sisdoaluide

Geahča video: Ealggaid leat lohkagoahtán helikopteriin Anáris – Luke áššedovdi mielde lea vel árrat dadjat maide ealgamearis

Ealggaid lohkama dahket dál Anárjávrri davábealde. Easkka go mannet lohkat ealggaid Leammi ja Áŋŋela guvlui, de sáhttet dadjat mearis juoidá, dadjá Luondduváriid dutkanguovddáža Luke dutkaninšenevra Petri Timonen.

Hirviä kulkee metsässä Inarissa.
Ealggaid lohkama dahket dál Anárjávrri davábealde. Ealggat vuhttojit bures vilges muohttaga vuostá.

Anára guovllus lohket dál ealggaid helikopteriin. Ulbmilin leat čielggadit, leatgo ealggat lassánan vai geahppánan dán njeallje jagi áiggis, mii lea dál gollan maŋimuš lohkamis. Ealggaid lohkama dahket dál Anárjávrri davábealde.

– Váttis dadjat vel ealggaid meari, go leat easkka álgán lohkat. Ealgabivdiid mielde ealganáli leat vearuhan mealgat olu maŋimuš jagiid áigge. Dát lohkan dasto čájeha makkár dilli duođalaččat lea, muitala Luondduváriid dutkanguovddáža Luke dutkaninšenevra Petri Timonen.

Petri Timonen Lukes lea maŋimuš beivviid áigge girdán helikopter fárus Anárjávrri davábealde lohkamin ealggaid. Dál lea su mielde vel árrat dadjat maide ealggaid mearis. Govva: Vesa Toppari / Yle

Timonen muitala, ahte sis leamaš buorre dilli lohkat ealggaid go leamaš buorit dálkkit ja muohtage olu nu, ahte ealggat vuhttojit bures go helikopteriin girdá áimmus.

Stuorámus sivva ealggaid meari geahppáneapmái livčče bivdu, árvala Timonen. Dat maid lea eahpečielggas, man ollu ealggat rasttildit riikkarájáid Norgga ja Ruošša rádjeguovlluin. Timonen mielas lea goittot vel váttis dadjat leatgo ealggat geahppánan Anára guovllus vai eai.

– Easkka go mannat lohkat ealggaid Leammi ja Áŋŋela guvlui, de sáhttit dadjat mearis juoidá. Dál mii girdit dakkár guovllus, gos eai leat dábálaččat olu ealggat.

Ealggaid meari lohket helikopteriin Lappi guovllus, go davvin leat olu meahcit ja dain bivdet máŋggat bivdosearvvit. Govva: Vesa Toppari / Yle

Beaivvi ságaid ja Yle Ođđasiid Sámis sáhtát maid guldalit Yle Areenas.