Unna Junná iđista guovvamánus olbmuid orrunlanjaide, muhto ii fal seamma várrugasat go eará buoidagat. Yle Sámi mánáidprográmma buoidda, nappo Unna Junná sáhttá fáhkka livkkihit vaikkoba telfona šerbmii, čákŋat ja guovllastit du Instagram-muitalusas.
Unna Junná lea bargan sámemánáid illun juo jagi 2007 rájes. Badjel logi jagi Unna Junná lea leamašan oalleláhkái seammalágán olggosoaidnit. Muhto leago Unna Junná guolgga molson vai mii lea dáhpáhuvvan?
– Mii leat beaivádan Unna Junná dálá beaivái ja dan dárbbuide, ja dolvon Unna Junná maid sosiála mediai, čilge sámegielat mánáidprográmmaid buvttadeaddji Heli Huovinen.
Háliidit gulahallat eanet geahččiiguin somes
Huovinen muitala, ahte dál orui leamen juo áigi buktit Unna Junná ođđa áigái.
– Dálá áigge dárbbut leat earáláganat go dalle, go Unna Junná álggii. Dán áigge mis lea geahččiiguin gulahallan sosiála media bokte ja dan dihte dat gif-govat ja animašuvnnat leat boahtán, Huovinen čilge.
Duogážis lea dat, ahte Unna Junná doaimmahus sávášii eanet ah eanet oaidnit geahččiid Unna Junná -bottuid. Gulahallan ja oktavuohta gehččiiguin lea dehálaš Huovinena mielas.
– Mii hálidivččiimet oaidnit, go olbmot vaikko gehččet Unna Junná dahje stohket juoidá, mii laktása Unna Junnái ja juogášedje daid govaid doppe Instagramis, dadjá Huovinen.
Oahpes figuvrra ii leat álki beare ođasmahttit
Prográmma, mii lea guhká leamašan seammalágán, ii leat álki ođasmahttit. Ferte jurddašit dárkilit, makkár figuvra Unna Junná olbmuid mielas lea ja mo sii dasto vuostáiváldit ođasmahttojuvvon figuvrra.
Heli Huovinen muitalage, ahte Unna Junná ođasmahttima plánejedje guhká.
– Muhto dat lea dieđusge dat seamma ealli, buoidda, vehá ođđalágán hámis dušše.
Unna Junná ođđa badji vuossárgga 14.2. rájes Yle TV2:žis ja Yle Areenas. Unna Junná gávdno Instagram-bálvalusas @yleunnajunna -nammamearkkain.
