Njuike sisdoaluide

Lappis leat olles fártta válmmaštallamin boahttevaš buresbirgenguovllu organisašuvnna – sámeáššit leat mielde bargolisttus

Buresbirgenguovllu gaskabottosaš válmmaštallandoaibmaorgána lea bargan maid sámeáššiin, muitala Sámedikki nammadan áššedovdilahttu Tuuli Miettunen.

Tuuli Miettunen mielde hástalus lea, ahte sámegielat bálvalusaid dálá ordnenvuohki ii doaimma nu bures go sáhtášii ja dan dihte politihkkarat galget viehka jođánit álgit smiehttat mo dili sáhtášii buoridit. Govva: Tuuli Miettunen
Guldal dás Sámedikki áššedovdilahttu Tuuli Miettunen olles jearahallama.

Guovloválggat lahkonit, jienastanbeaivi lea sotnabeaivve 23.1. ja boahttevaš Lappi guovlostivra álggaha barggus jo dál njukčamánus. Organisašuvnna válmmaštallan lea olles fártta jođus vai politihkkariin lea mas álgit, muitala Sámedikki nammadan áššedovdi Tuuli Miettunen Lappi buresbirgenguovllu gaskabottosaš válmmaštallandoaibmaorgánas.

– Mis lea stáhta addán guhkes bargolisttu maid buot áššiid buresbirgenguovllus galggašii válmmaštallat ovdalgo sode- ja gádjunbálvalusat sirdašuvvet guovlluide. Jus muittán riekta, de sullii 600 sierra barggu, muitala Miettunen.

Válmmaštallandoaibmaorgána lea bargan maid sámeáššiin mannan borgemánu rájes go orgána ásahuvvui.

– Doppe leat dihto čielga áššit, mat leat mielde stáhta bargolisttuinge, ovdamearkan gielalaš vuoigatvuođaid sihkkarastin. Ja de leat dakkár áššit maid vealttekeahttá ii fuomáš, ahte dat leat sámeáššit, ovdamearkan áššehas- ja pasientadieđut, čilge Miettunen.

Lága mielde Lappi buresbirgenguovllus galgá leat sámegiela lávdegoddi.

– Lágas dasa leat mearriduvvon dihtolágan sámegielat bálvalusaid árvvoštallan- ja čuovvunbarggut, muhto láhka addá maid vejolašvuođa addit earáge bargguid dasa. Dat lea dasto politihkkariid ovddasvástádussan smiehttat, ahte livččego juoidá eará, mas sámegiela lávdegoddi galggašii leat ovddasvástádusas vel.

Son ávžžuha, ahte buohkat, geat hálidit váikkuhit sámegielat bálvalusaid boahttevuhtii, jienastit dáin válggain.

Válmmaštallandoaibmaorgána bargu galgá leat gárvvis guovvamánus. Njukčamánus álgá doaibmat ođđa guovlostivra ja ođđa buresbirgenguovllut fas ođđajagimánus 2023.

Yle čuovvu guovloválggaid Lappi eanangotti ja Sámi oainnus Sámi válgalávvu -siidduin. Válgalávus gávnnat ođđasiid guovloválggain ja sáhtát oassálastit chat-ságastallamiidda.

Beaivvi ságaid ja Yle Ođđasiid Sámis sáhtát maid guldalit Yle Areenas.