Njuike sisdoaluide

Skábmagovat-filbmafestivála ovdabileahtaid leat vuovdán unnán dan maŋŋá go filbmafestivála mearridedje sirdit nehttii

Skábmagovat-filbmafestivála álgá ođđajagimánu 27. beaivve ja filmmat leat oaidnimis Skábmagovaid neahttalávddis guovvamánu 6. beaivvi rádjai.

Skábmagovaid buvttadeaddji Diinu Bouras Ohvo vuordá, ahte vuovddašedje čuođi ovdabileahta neahttafestiválii. Govva: Kirsti Länsman / Yle

Eamiálbmogiid filbmafestivála Skábmagovaid ovdabileahtaid vuovdin álggii bures, muhto festivála sirdin neahttaoktavuođaid geahčai lea váikkuhan dál bileahtaid vuovdimii ovddalgihtii.

Iešguđetlágan festiválapássaid ja bileahtaid ovttaskas čájáhusaide ledje vuovdán báikki ala badjelaš 100. Fysalaš dáhpáhusa bileahtaid mákset ruovttoluotta iige daid sáhte njuolga lonuhit neahttabileahtaide.

Neahttafestiválapássaid ja čájáhusbileahtaid leat vuovdán dál sullii 20, muitala festivála buvttadeaddji Diinu Bouras Ohvo.

– Dieđus festiválii lea veháš vel áigi. Ferte oaidnit, gal mun sávan ahte dat online-veršuvdna meneštuvašii bures. Lean ásahan alccen ulbmilin, ahte jus vuovddašeimmet 100 bileahta, muitala Ohvo.

Skábmagovat-filbmafestivála álgá ođđajagimánu 27. beaivve ja filmmat leat oaidnimis Skábmagovaid neahttalávddis guovvamánu 6. beaivvi rádjai. Buvttadeaddji Diinu Bouras Ohvo vuordá festivála álgima movttain, vaikke su mielas leage váivi, go festivála rievddai neahttadáhpáhussan.

– Buot dáiddasurggiin filbmafestivála heive online-hábmái bures. Doaivvu mielde buohkat miehtá máilmmi, geat leat beroštuvvan eamiálbmotfilmmain, gávdnet min neahttalávddi. Sávan, ahte bileahtavuovdin ealáska vel dás, lohká son.

Beaivvi ságaid ja Yle Ođđasiid Sámis sáhtát maid guldalit Yle Areenas