Njuike sisdoaluide

Eanodaga gielddahoavddas lea maŋimuš bargobeaivi, sirdašuvvá jođihit ránnjágieldda – "Mađe unnit gielda, dađi dehálut rolla"

Jari Rantapelkonen sirdašuvvá eará bargguide ja guođđá Eanodaga gielddahoavdda stuolu guđa jagi maŋŋá.

Jari Rantapelkonen álggaha Gihttela gielddahoavdan. Govva: Anneli Lappalainen / Yle

Eanodaga gielddahoavda Jari Rantapelkonenis lea odne bearjadaga maŋimuš bargobeaivi dálá virggistis. Rantapelkonen sirdašuvvá jođihit ránnjágielda Gihttela.

Rantapelkonen dadjá, ahte Eanodat lea álo su váimmus. Dehálamos fuopmášupmin Eanodaga gielddas sus lea dat, makkár luondu Eanodagas lea ja makkár luondduoktavuohta Eanodaga olbmuin lea.

– Buorre miella lea, go geahčan maŋosguvlui áiggis 5–6 jagi. Dáppe leamašan hirbmat buorre vuoigŋa ja movtta ovddidit gieldda. Gieldalaččat leat hui lahka gieldda bargiid ja luohttámušolbmuid, muitala Rantapelkonen.

"Maidege ii olmmoš oaččo áigái okto"

Gielddahoavda oažžu olu máhcahaga gieldda olbmuin. Rantapelkonen muitalage, ahte son lea ožžon measta beaivválaččat gieldda olbmuin iešguđetlágán máhcahaga – sihke positiiva ja negatiiva.

Doaibmabijut ja áššiid sirdin mearrádusdahkamii leat dehálaš oassin gielddahoavdda barggus. Rantapelkonen háliida dadjat, ahte maidege ii olmmoš oaččo áigái okto.

– Mađe unnit gielda, dađi dehálut rolla gielddahoavddas lea, árvala son.

Rantapelkonen rábmo eanodatlaččaid das, man olu sis leat ođđalágán jurdagat ja evttohusat. Su mielas daid leat maid ovddidan ja dolvon ovddosguvlui.

Ođđa hástalusaid maŋis Gihttelii

Duottar-Lappis lea buorre orrut ain, árvala Jari Rantapelkonen go sirdašuvvá jođihit ránnjágielda Gihttela. Rantapelkonen válljejuvvui Gihttela gielddahoavdda virgái juovlamánu beallemuttus.

Son muitala iežas lohpidan jođihit Eanodaga gieldda golmmas viđa jahkái, ja dan lohpádusa son lea doallan. Loahpa loahpas son barggai Eanodagas measta guhtta jagi.

– Eanodat lea máŋggakultuvrralaš gielda. Lean ilus, ahte lean iežan beales leamašan ovddideamen máŋggakultuvrralašvuođa, lohká Rantapelkonen.

Beaivvi ságaid ja Yle Ođđasiid Sámis sáhtát maid guldalit Yle Areenas.