Njuike sisdoaluide

Alimus hálddahusriekti linnjii: Boazodoalu doaibmanvejolašvuođaid ferte sihkkarastit bieggafámu plánedettiin

Bálgosiid ovttastumi doaimmajođiheaddji Anne Ollila jáhkká, ahte alimus hálddahusrievtti jahkegirjemearrádus linnje boahttevaš diggegeavada ja čájeha geainnu mo bieggafápmofidnuiguin rasset boazodoalloguovllus boahttevuođas.

Guossáma gávpot lei merken oasseoppalašlávvii Tolva bálgosa eatnamiidda oktiibuot 54 bieggamillo sturrosaš párkka. Čájáhusgovva. Govva: Juuso Stoor / Yle

Alimus hálddahusriekti lea dahkan guokte jahkegirjemearrádusa, mat gusket Guossáma Maaninka bieggafápmofidnu Tolva bálgosa guovllus.

Jahkegirjemearrádusa mielde (siirryt toiseen palveluun) Guossáma gávpoga dahkan bieggafápmooppalašlávva lea lága vuostá, go das eai leat vuhtii váldán boazodoalu doaibmanvejolašvuođaid ja bieggamillopárkka váikkuhusaid boazoealáhussii, nu mo eanangottelávva eaktuda.

Alimus hálddahusriekti cealkáge, ahte boazodoalu doaibmanvejolašvuođaid ferte sihkkarastit bieggafámu plánedettiin.

Guossáma gávpot lei merken oasseoppalašlávvii Tolva bálgosa eatnamiidda oktiibuot 54 bieggamillo sturrosaš párkka. Bálggus váiddii áššis Davvi-Suoma hálddahusriektái go oaivvildii, ahte bieggafápmu livččii dagahan bálgosii stuorra váttisvuođaid ja lei sáhka bálgosa deháleamos guohtumiin.

Davvi-Suoma hálddahusriekti gomihii láva ja čujuhii dasa, ahte bieggafápmofidnu dagaha stuorra váikkuhusaid boazodollui. Guossáma gávpot goit váiddii ášši alimus hálddahusriektái, muhto doppe ášši ii rievdan ja AHR doalahii duomu.

Ollila: "Dál lea biddjon rádji dasa, ahte man olu boazodoallu galgá sirdásit"

Bálgosiid ovttastumi doaimmajođiheaddji Anne Ollila jáhkká, ahte alimus hálddahusrievtti jahkegirjemearrádus linnje boahttevaš diggegeavada ja čájeha geainnu mo bieggafápmofitnuiguin rasset boazodoalloguovllus boahttevuođas.

– Dát mearrádusat addet nana signála das, ahte boazodoalu ja boazoealáhusa ferte váldit vuhtii eanangeavahanfidnuid plánemis boazodoalloguovllus, dadjá Ollila.

Ollila mielde boazodoalloguovllus leat dálá dilis jođus máŋggat bieggafápmoplánat, mat sáhttet dagahit stuorra váttisvuođaid bálgosiidda.

– Jáhkán ja sávan, ahte dát mearrádusat dál oahpistit plánema dan guvlui, ahte boazodoallu vuhtiiváldojuvvo plánenproseassain. Jus nu ii dahkko, de dat áššit gevvet diggái, árvala Ollila.

Bálgosiid ovttastumi doaimmajođiheaddji Anne Ollila jáhkká, ahte alimus hálddahusrievtti jahkegirjemearrádus linnje boahttevaš diggegeavada. Govva: Vesa Toppari / Yle

Nubbi jahkegirjemearrádus guoskkai (siirryt toiseen palveluun)Davvi-Nuortabađaeatnama eanangotteláva bieggafápmomerkema, man alimus hálddahusriekti bisuhii fámus. Eanangotteláva mielde guvlui lea ain vejolaš hukset bieggafámu, muhto dárkilut plánemis galgá váldit vuhtii boazodoalu doaibmanvejolašvuođaid, cealká alimus hálddahusriekti.

Anne Ollila mielas AHR mearrádusat čájehit, ahte mii dahje makkár beare eanangeavaheapmi ja huksen ii leat vejolaš.

– Deháleamos lea, ahte dál lea biddjon rádji dasa, man olu boazodoallu galgá dahkat saji ja sirdásit, oaivvilda Ollila.

Beaivvi ságaid ja Yle Ođđasiid Sámis sáhtát maid guldalit Yle Areenas