Njuike sisdoaluide

Utti jeagárregimeanta hárjehallá fas davvin – Sámis hárjehallamat vuhttojit easkka guovvamánu loahpas

Utti jeagárregimeantta soahtehárjehallamiid vuosttas oassi bistá guovvamánu 6. beaivvi rádjai. Nubbi oassi álgá guovvamánu 28. beaivve ja dalle doaimmat vuhttojit maiddái Sámis.

Govas Utti seivvonjeagárkompaniija soalddáhiid sirdáseapmi giđđat 2020. Govva: Kaija Länsman / Yle

Utti jeagárregimeantta dálvehárjehallamat leat álgán ikte 20.1. Davvi-Suomas. Hárjehallamat bistet gitta guovvamánu 6. beaivvi rádjai. Utti jeagárregimeantta njunušgotti jođiheaddji evearstalutnánta Janne Sallila muitala, ahte hárjehallamiid vuosttas oassi mii dál álggii, ii vuhtto Sámis.

– Vuosttas oasi hárjehallan lea smávit ja dat vuhtto eanáš Rovajávrri hárjehallanbáikkis, Sallila muitala.

Hárjehallamiid nubbi oassi lea viiddit ja dan lágidit 28.2.–18.3. Dalle hárjehallamat vuhttojit maiddái Áŋŋelis, Anáris ja Eanodaga duottarguovlluin.

Sallila namuha, ahte Utti jeagárregimeanta hárjehallá jahkásaččat Davvi-Suomas. Ulbmilin lea skuvlet researvaolbmuid ja soalddáhiid doaibmat earálágan birrasis go masa sii leat hárjánan. Son lohká, ahte sis lea buorre ovttasbargu badjeolbmuiguin.

– Mii váldit Bálgosiid ovttastusa bokte oktavuođa boazoisidiidda. Mii oažžut doppe dieđu gos guovllus bohccot leat amamet heađuštit ealuid.

Jeagárregimeantta hárjehallanossodagat johtet čuoigga dahje muohtafievrruiguin. Hárjehallamiid áigge helikopterat ja hárjehusbáhčimat sáhttet dagahit alla jienaid ja doaimmat leat maiddái ijaid.

Hárjehallamiin leat váldán vuhtii koronavirusdili ja soalddáhiid leat juohkán uhcit ossodagaide.

Utti jeagárregimeantta njunušgotti jođiheaddji Janne Sallila muitala jeagárregimeantta jahkásaš hárjehallamiin Davvi-Suomas. Jearahallan lea suomagillii.

Beaivvi ságaid ja Yle Ođđasiid Sámis sáhtát maid guldalit Yle Areenas.