Njuike sisdoaluide

Skábmagovat-filbmafestiválas čájehit 52 filmma miehtá máilmmi: loga dás festivála dáiddalašjođiheaddji filbmaávžžuhusaid

Skábmagovaid dáiddalašjođiheaddji Jorma Lehtola šálloša, go neahtas eai sáhte čájehit buot filmmaid, mat galge čájehuvvot festiválas.

Jorma Lehtola lea duđavaš, go Skábmagovain bastet čájehit eamiálbmotfilmmaid viidát miehtá máilmmi pandemiijadilis fuolakeahttá. Govva: Kevin Francett / Yle

Eamiálbmogiid filbmafestivála Skábmagovat álgá ihttin duorastaga neahttalávddis. Festivála ordnejuvvo dál juo 24. geardde. Skábmagovain čájehit dán vuoro oktiibuot 52 filmma nu Sámis go maiddái miehtá máilmmi.

Festiválas leat olu buorit filmmat maid gánneha geahččat, oaivvilda festivála dáiddalašjođiheaddji Jorma Lehtola. Prográmmas leat olu sihke guhkit ja oanehut filmmat Sámis, main Lehtola ávžžuha geahččat Sunna Nousuniemi bagadan Boso mu ruovttoluotta.

Dan lassin Lehtola ávžžuha geahččat maid earret eará Jolanda Magga filmmaža Miessemánnu, mii muitala miesi riegádeamis.

– Filmmaid fáttát leat oalle viidát, muitala Jorma Lehtola.

Filmmat Austrálias ja Aotearoas gitta Kanádai ja Hawaii'ii

Filbmadahkkit ožžot ieža evttohit filmmaideaset čájehanláhkai Skábmagovaide, muhto dan lassin festiválaorganisašuvdna čuovvu maid eamiálbmotfilmmaid eará filbmafestiválat miehtá máilmmi čájehit.

Skábmagovain čájehit dán jagi eamiálbmotfilmmaid Austrálias ja Aotearoas, Ođđa-Selánddas gitta Kanádai ja Hawaii'ii.

Lehtola ávžžuha geahččat ovdamearkka dihte inuihttabagadalli Marc Fussing Rosbach nu gohčoduvvon science-fiction guhkesfilmma Akornatsinniittut – Kiinappalik / Among Us – The Masked Man. Filbma muitala guovtti oarbbes nuoras, geat galgaba vuoitit iežaska báluid ja dáistalit stálulágan vašalačča vuostá, amas sevdnjesvuohta njielastit sudno.

Lehtola ávžžuha geahččat maid maorifilma Cousins, man leaba bagadallan Ainsley Gardiner ja Briar Grace-Smith.

– Dat gieđahallá fuolkevuođa. Das leaba belážat, geat ohcaba nuppiideaskka olles eallima. Dat lea hui fiinna filbma, cavgila Lehtola.

Daid lassin ávžžuha geahččat maid Zacharias Kunuk bagadallan animašuvnna Angakusajaujuq – The Shaman's Apprentice. Kunuk lea dovddus das, go ráhkadii vuosttas inuihtta guhkesfilmma 20 jagi dassái. Guhkesfilbma válljejuvvui Kanáda buoremus filbman goassige moadde jagi dassái.

– Su ođđa inuihtagielat animašuvdna lea hui miellagiddevaš ja dat vuođđuduvvá dološ inuihtaid máinnasárbái. Animašuvdna muitala olbmos, guhte vuolgá Kannaalukii, sáivui, viežžat veahki go sutnje lagašolmmoš buohccá.

Oasi álgoálgosaš prográmma filmmain eai sáhte čájehit neahttalávddis

Festivála dáiddalašjođiheaddji Jorma Lehtola lea duđavaš dán jagi prográmmii, vaikko eai sáhtege čájehit neahtas buot filmmaid, maid áigo čájehit báikki alde Anáris.

Okta filmmain, mii báhcá dál oainnekeahttá lea sámi-blackfoot filbmadahkki Elle-Máijá Tailfeathers filbma Kímmapiiyipitssini: Empatiija mearkkašupmi.

– Pandemiija sehkkii veháš, galggaimet geahččat ovdamearkka dihte Liselotte Wasjedt bagadan guhkesdokumeantta Sunna Nousuniemi dokumeantta oktavuođas, mii muitala seksuálalaš veahkaválddis sámeservodagas. Dat livčče lean buorre beassat ságastallat dán dehálaš ja unnán hállojuvvon fáttá birra dokumeanttaid olis, lohká Lehtola.

Festivála olles prográmma gávdno Skábmagovaid neahttasiiddus (siirryt toiseen palveluun). Filmmat leat geahččanláhkai 27. beaivves gitta guovvamánu 6. beaivái.