Njuike sisdoaluide

Guldal jiena: Mánnu bivdá mánáid ja nuoraid sáddet filmmaid Sámi álbmotbeaivái

Videodearvvuođat bohtet oidnot sámedikki álbmotbeaidáhpáhusas neahtas.

Mánu doaimmajođiheaddji Petra Magga-Vars šálloša, ahte koronadili dihte ovttastallan dáhpáhuvvá dál neahta bokte. Sámi álbmotbeaivve doalut ledje diibmáge neahtas. Govva: Linnea Rasmus / Yle
Doaimmaheaddji Jovnna Aikio lea jearahallan Mánu doaimmajođiheaddji Petra Magga-Vars.

Sámi álbmotbeaivi lahkona ja lea áigi dearvvahusaid lonohallat. Sámi mánáidkulturguovddás Mánnu hástala beaiveruovttuid, skuvllaid ja giellabesiid sáddet dearvvuođaid.

– Mii hálidivččiimet mánáid ja nuoraid dearvvuođaid Sámi álbmotbeaivve. Dearvvuođat ožžot leat vaikko makkár hámis, vaikko luohti dahje dikta dahje vaikko tevdnet juoidá man birra muitala. Hápmi lea video, man sáhttá ipadiin dahje telefuvnnain govvet, go beare lea doarrás dat govva, ja guhkkodat livčče eanemustá 1 minuvtta ja 30 sekundda, muitala doaimmajođiheaddji Petra Magga-Vars.

Su mielas livčče somá oažžut olbmuid oassálastit álbmotbeaivvi dáhpáhussii vaikko leage neahtas. Mánu ulbmiljoavku lea mánát ja nuorat, danin Magga-Vars sávvá, ahte sis livčče mokta oassálastit dása.

– Videodearvvuođat bohtet oidnot sámedikki álbmotbeaidáhpáhusas ja mii geahččalit oažžut buot dearvvahusaid neahttasáddagii, dadjá Magga-Vars.

Videodearvvuođaid galgá sádde dán mánu áigge sámedikki dieđihančálli Johanna Alatorvisii. Oktavuođadieđut gávdnojit sámedikki neahttasiiddus. (siirryt toiseen palveluun)

– Videodearvvuođat gullet maiddái mediabajásgeassimii ja dasa mo mii sáhttit čatnat media bokte mánáid ja nuoraid iežamet álbmogii ja servodahkii sihke beroštit iežamet olbmuin ja muitit dan min álbmotbeaivvi, oaivvilda Magga-Vars.

Beaivvi ságaid ja Yle Ođđasiid Sámis sáhtát maid guldalit Yle Areenas.